[الطائر المهاجر]

يمّه قولي ويش صاير ابتلينا بالرزايا = أمة الإسلام ضاعت وافتقدنا للهويّه
وش حدا بالغرب يحقد ,,وش يخبي من خبايا= مايكفّيهم بأنّا ما بقى منّا بقيّه
الأعادي ما تغيّر لو يخبوا للنوايا = العقيده يكرهوها واهلها معها سويّه
كل يومٍ قتل فينا من شبابٍ أو صبايا= والسجن للي يطالب بالحقوق الأوليّه
استحلوا كل ارض وزرعوا فيها الخزايا= ونهبوها عيني عينك ما لقت يدٍّ حفيّه
يمّه من يحمي العقيده كود يبقى لو بقايا= ومين يحمي مقبل الاحفاد اذا مابي حميّه
اسلحتنا وفي يديهم بدونهم حنّا عمايا= ماسكينٍ بالعلابي وكاشفينٍ للطويّه
ماعدا شيٍّ وحيدٍ كامنٍ وسط الخلايا = صعب يكشف من يشيله حتى باقمارغبيّه
يذكرونه وقت روما وكيف سوّا للسوايا = وبعدها دكّ القواعد للغزاة الصليبيه
خايفينٍ منه دايم ينتفض جوّا الحنايا = مثل بركانٍ مدمّر ينفجر وهْم الضحيّه
وبتدوا في غزو فكري قصده عقول البرايا= لمسح آثار العقيده والمبادي اليعربيه
وجّهوا اقمار ترسل سمّها لاصغر ضحايا = من رآها ما يفكّر وش وراها من بليّه
والطفل منها يتعلم كل اصناف الخنايا = لارقيب ولا حسيبٍ يحمي النفس البريّه
ما يفكر غير ياكل ويتبطح بالزوايا = لا صلاة ولا عباده مدمن افلامٍ رديّه
ينسى دينه..ينسى ربّه .. يكتسب خسّ السجايا= ما يعدّل بعد كبره صار غربي ميّه ميّه
كل عقله في الشهاوي ولا يفكّر في الخطايا= لا عقيده ولا ضمير يمنعه عن سوء نيّه
ولا حميّه للمحارم لو مشن حتى عرايا = ولا شهامه لو يشوف الذيب يفري في الضحيّه
يمّه هذا اليوم يومك لا تخلّين الضنايا = الطفل عندك أمانه لا تخونيها .. وصيّه
وش تقولي يوم يسأل رب يدري بالخفايا = وش تظني يوم تجني ..غير حقران وأذيّه
ازرعي يمّه جميلٍ تحصدي أجمل هدايا = تكسبي دينٍ ودنيا قبل لحظات المنيّه

هذه القصيدة ومعها 3 قصائد اجتماعية اخرى
تم تسجيلها على كاست من قبل مؤسسة محطات الكويتيه
ووزعت كعمل خيري في دول الخليج