قم يابن نازي سو ماينعش البال= امن الكيف سوه كنت راعي شطاره
كيف لنا ماهوب كيف ٍ للانذال =اللي عن الجودا يهاب الخساره
قم سو لي ياريف الاجناب فنجال =ادغث لها الطبخه وكيف بهاره
اشقر حمره نبذل من شانه المال =وان جنب المسبوع دربه يساره
وان جو مناكيف على السير وعجال= عقب التعب يبغون منا وقاره
نقلط لهم ميسورنا مع رخا البال = يوم ولد اللاش غلس بداره
واليوم من صرف الدهر جاب الاهوال = ماقال قبلي قوي العباره
خف القنا والثقل جا مثل ماقال = خف الرديف وراعي الكور داره
واستنعج السرحان والبس ماسال = عن ذيب غدرا ً مايهاب السماره
في دارنا نطفي كدا المر بزلال = يكود برد الما يجلي حراره
دارن بها يعجز عن الحق عيال = واللاش فيها شيد اليوم كاره
دارن لعل الوسم عن جالها زال = وصيف ماحقت عليها خطاره
الحيف مايصبر على الحيف رجال = من كان في راسه زعانف سطاره
ان كان ماتنحي المعادي على الجال = ويشرب حفيف الدار منا مراره