هذه القصيدة وجدت من نسبها لمرشد البذال ، ولكن من اسلوبها قد ساروني الشك ، فأرجو من لديه معرفة ان
يقول ما لديه :
يقـول مـن سـوى حسيـن القـيـل=ومـسـنـع مـعـنـاه لا يـمـيــل
2 يقول مـن زيـن المثايـل طرايـف=فيهـن الذربـيـن الـرجـال دلـيـل
3 وإلا هبيـل القلـب مايسمـع النـدى=مايـنـفـع التـعـلـوم بالهـبـيـل
4 ياسامع(ن) جيلي ترى بـه نصيحـة=إلا إن كـان إنــه علـيـك ثقـيـل
5 ترى المرجله حمل(ن) تشيله لحالـك=وإلا السفـاه إبليـس عـنـك يشـيـل
6 يرقص قدام وجهـك ويمـدح فعلـك=ويـعـاونـك ياخـيـبـة الـزمـيـل
7 لعين(ن) يوصلـك المهلـك وينثنـي=تقعـد بمظـمـأ مامـعـك صمـيـل
8 من طاع شور إبليس والنفس والهوى=عاف النهـار وحـب مسـرى الليـل
9 يارجل أبـا اوصيـك منـي وصيـه=وأحـرص علـى حفظانهـا بالحـيـل
10 من لا يحوش بأول العمـر طولـه=تـالـي شبـابـه صـعـب التبـديـل
11 من فـات عمـره مامـدح بأفعالـه=قـعـد بـوسـط الطيبـيـن رزيــل
12 أول فعـول الخيـر درب الطاعـه=لـيـا خضـعـت لخالـقـك تسـيـل
13 نـور بوجهـك وإندفـاع بأجـلـك=ويمشـي أرزاقــك بــلا تعطـيـل
14 ترى راعي الطاعـة رفيـع جاهـه=يصيـر بعـيـون الـرجـال جلـيـل
15 الدين دين القلب وصـلاح العمـل=وكف اللغـى مـن كثـر قـال وقيـل
16 والنية الزينـه تراهـا تظهركمـن=آمـن بربـه صــار لــه كفـيـل
17 أوصيك برضـى والديـك وصيـة=والـدك لايمـسـي علـيـك غلـيـل
18 تـراك لـو تـدري بحبـك عنـدهم=اصـرت لـه بالمعصيـات جبـيـل
19 والوالدة مخصوص عظـم قدرهـا=شيـالـتـك بالـبـطـن والشـلـيـل
20 تسعة شهـور تنقلـك فـي جوفهـا=وعاميـن ترضعـك الحليـب طفـيـل
21 إذا أخذت يـوم مونـس ماترضـع=غــدا علـيـك أعبـارهـا همـيـل
22 عافت لذيذ النـوم والـزاد عافتـه=وتشاغـلـن أفـكـارهـا تشـغـيـل
23 ياقـرد حـظ اللـي يعـق الوالـده=ذاك وســط الـنـار لــه مقـيـل
24 تـرى حقـوق الوالديـن كثـيـره=لا شـك أنـا أمثـل لـكـم تمثـيـل
25 وأنـا بديـهـي ولانــي عـالـم=لاشـك أعـرف مـن الكثيـر قلـيـل
26 أيضا(ن) وأبين في كـلام(ن) ثانـي=كـلام(ن) يحلـى عتـمـة التعلـيـل
27 إذا صار بيـن الجالسيـن مباحثـه=وتسائـلـوا مــن بينـهـم تسئـيـل
28 إذا قايسوا لفـلان وفـلان وزنهـم=معـلـوم مـاهـذا لــذاك عـديـل
29 أحـد(ن)إذا منـه حكـم بفعـولـهم=الـلـردى فــي ماقـفـه تدخـيـل
30 مثل القمر فعلـه وهـو قـروا لـه=مـالـه لقبـسـات النـجـوم مثـيـل
31 واحـد إذا شافـوا فتايـش علومـه=قالـو عسـى أم(ن) جابـتـه تحـيـل
32 حـي علـى الرملـه وميـت ودره=واظـن كيـده صـار فـي تظلـيـل
33 دروب المراجـل يتعبـن كثـيـره=فيـهـا دروب معـجـزات تـهـيـل
34 المرجلـه فـي كـل فعـل طيـب=فعـل يصـيـر لصاحـبـه قنـديـل
35 أشر الحيا والعقـل والحـق أمشـه=وعلـى حـقـوق الـنـاس لاتعـيـل
36 من داس قدر الناس داسو كرامتـه=يجـيـه سـبـع نـكـلـه تنـكـيـل
37 بعض الرجال إذا حضر في مجلس=جالـه بوسـط الصامتـيـن صهـيـل
38 ماهو صهيل حصان من زود السطر=صهـيـل عـيـر شـايـل جـلـيـل
39 متهـزي بالنـاس وهـو الـهـزوه=ولا يختشـى مـن خبـقـة الزبـيـل
40 لو تنصحه مايعتبـر فـي كلامـك=فـيـه الهـبـال مخـيـم ومحـيـل
41 وبعض الرجال إذا حضر فزوا لـه=شوفـة شـرف ومشـاهـدة جمـيـل
42 إذا نشدتـه جـاك زيـن أعجوبـه=مثـل الحليـب مقنـد فــي هـيـل
43 وإن مانشـد خـلا كلامـه عنـده=ولايعتـرض للنـاس فــي سبـيـل
44 قصرة لسانـه مـن شكالـة راسـه=وإلا بــدرب المرجـلـه حلـحـيـل
45 وترى كبير النفـس تكـره طينتـه=مــرد راعــي الكـبـر للتسفـيـل
46 إذا حصـل ثـور كبيـر راســه=يشـيـل كـبـر ولا وراه حـصـيـل
47 إذا قعـد وسـط الرجـال مزلغـم=وهرجـه يرتـل هرجـتـه ترتـيـل
48 يغتـر فيـه الأجنبـي وإن شافـه=واللـي يعرفـونـه تــراه دحـيـل
49 ينوي مناوي الحـر وهـو البومـه=يبـي يصيـر الـراس وهـو الـذيـل
50 الكـبـر لله واحــد سبحـانـه=معطـي العطايـا الـبـاري الجـزيـل
51 ترى الكذب عذروب الرجال وعارهم=راعيـه لا يجـزع مــن التفشـيـل
52 شاهد على شي(ن) وهـو ماشافـه=ومصـور هــرج وهــو ماقـيـل
53 هـذاك بالدنـيـا كبـيـر عــاره=وبالآخـره فــي حـامـي الملـيـل
54 راعـي الظليمـه ماتسـرك حالـه=حـتـى الشفـاعـه عـنـه تستقـيـل
55 واللـي قتـل نفـس بغيـر السنـه=تــراه يـاقـع مثـلـهـا قـتـيـل
56 وإن طال عمره من قـرادة حظـه=حسابـه قــدام ماينـفـع التمهـيـل
57 قدامـه كتـاب مايـغـر ويـوهـم=محصـل كــل العـمـل تحصـيـل
58 يـوم الحشـر كـل يفـر كتـابـه=ومشـكـل بــه مافـعـل تشكـيـل
59 أحد كتابه غـي سقـر يرمـى بـه=وأحـد علـى الجنـه معـه تحـويـل
60 والله إذا منـه نــواك برحـمـه=نــزل علـيـك أسبابـهـا تنـزيـل
61 خـلاك فـي دنيـاك عبـد صالـح=مـن رحمتـه مضفـي عليـك شليـل
62 إذا من ربك عاد لـك فـي نعمـه=وأنـعـم علـيـك بـمـدة الفضـيـل
63 أحرص من الطغيان وأحفظ مالـك=وعلـى اللـوازم لاتصـيـر بخـيـل
64 اظهـر زكـاة المـال واد حقوقـه=أعـط الضعيـف وجنـب التسبـيـل
65 وترى العطا من غير حاجه ضايـع=مثـل دفـق مـاء بالتـراب يسـيـل
66 إذا صار معروف الأثنيـن مماطـل=حـيـال وإلا لــك وراه شـغـيـل
67 لا يربح الطالب ولا أجر لمن عطى=بالباطـل مابيـن الأثنـيـن عـزيـل
68 ياراعـي النعمـه تحمـد ربــك=لا تحـسـب أن اليـسـر مستطـيـل
69 لاتأمـن الدنيـا تـراهـا مـغـره=هنـوف تعاشـر كـل وقـت خلـيـل
70 تفتـر بيـن إقبالـهـا واقفايـهـا=فـر الهبـوب الصـلـف للكتـويـل
71 أحـد تزيـن لـه مبـادي وقـتـه=وأحـد عليـه بـلا خـمـال تعـيـل
72 أن أقبلت نم حـدر جـذع النخلـه=وعليـك العثـوق المرطبـات تمـيـل
73 وأن أدبـرت لا تعتبرفـي قـوتـك=لـو أن حيلـك مثـل حـيـل الفـيـل
74 تـراك لـو أنـك شجـاع صامـل=تصيـر مـن جـور الزمـان ثعـيـل
75 واصبر اذا مسك مـن الوقـت شـده=تــراه ماينـفـع كثـيـر الـويــل
76 والصبر موعود بالأفـراج صاحبـه=ولا شــده إلا عقـبـهـا تسـهـيـل
77 ولا تفضي أسرارك على كل صاحب=إذا صـرت ممـا صايـبـك علـيـل
78 تغتر في رجـل(ن) قبـل تجروبـه=تخمـل علـيـه بهقـوتـك تخمـيـل
79 وهو مايقـر العلـم بيـن ضلوعـه=إلا ان يـقـر الـدهـن بالغـربـيـل
80 تـراه للعـدوان ينشـر سرايـرك=والسـوء علـمـه للمـعـادى تـيـل
81 بعض رجال الوقـت هـذا مغـره=والـلـي تومـنـه الـسـدود قلـيـل
82 أيضـا إذا رابعـت رابـع طيـب=كـد بـأن فعلـه مثـل نجـم سهيـل
83 تـرى الرجـال يطالعـون قرينـك=دايــم علـيـك عيونـهـم دربـيـل
84 إن مانجحـت بعينهـم مـن فعلـك=والا حسبـت مـن الحـمـام دويــل
85 خذ النصيحـه ياشخـص والزمهـا=كملـتـهـا بأوصـافـهـا تكـمـيـل
86 وإن كان ماتفهم عقب ماذكرت لـك=تــراك حـيـوان غــداه قصـيـل
87 واليوم أنا أطلـب خالقـي بالتوبـة=وإلا السـوالـف مالـهـا ظـويــل
88 يالله عفـوك ياوسـيـع الرحـمـة=يالمايـن الـلـي ماعلـيـك وكـيـل
89 يارافـع الرايـات يالفـرد الصمـد=تلطـف العبـد فــي ذراك دخـيـل
90 أطلبـك يامـولاي تسمـح عـنـي=وألا العـمـل ماينـمـدح بالـحـيـل
91 ترى أبن آدم لـو تطيـب أعمالـه=لازم ذنـوبـه يرجـحـن بالـكـيـل
92 يالعبد لا ترهيـك طيـب أعمالـك=تـراك فـي يـوم الحـسـاب ذلـيـل
93 إن كان ربـك مانعشـك برحمتـه=والا تـرى لـك منـزل فـي ويــل
94 يالعبد لا تغويـك عجـات الصبـا=وان الـقـوي لازم يصـيـر هـزيـل
95 ترى طربت الدنيا وعجات الصبـا=أحــلام لـيـل مـالـهـا ذبـيــل
96 ترى كل شي له حسـاب وينتهـي=والعمـر يقضـي والزمـان طـويـل
97 وإذا أعترفت بحالة الكبر والهـزل=تــوك تسـنـع عدلـهـا والمـيـل
98 مسكين يامن فات وقته على الجهـل=وإبليس لـه فـي كـل وقـت عميـل
99 إبليـس غـر آدم بشيـن أعمالـه=ليـن أظهـره مـن جـنـه ونخـيـل
100 وان تعتبرباللـي مشـى قدامـك=تــراه نــزال وانــت رحـيــل
101 لاتحسـب أنـك يالفقيـر معمـر=والموت قبلـك كـم أخـذ مـن جيـل
102 الموت ماخـلا الرسـول محمـد=اللـي يجيـه الوحـي تالـي اللـيـل
103 والموت ماخـلا رجـال الطاعـه=الأنـبـيـاء فـعـالـة الـجـمـيـل
104 والموت ماخلا رجـال الشجاعـه=كبـار الصحـون ومقحميـن الخـيـل
105 تسدحوا حدر الثرى عقـب غيـره=توسـدوا عـقـب الحـريـر نثـيـل
106 راحوا من الدنيـا بقطعـة خامـه=وشـوى رمـل مـن جبـال رمـيـل
107 واللي فعـل منهـم فعـول زينـه=بقـت سمعتـه والا الحـيـاة تـزيـل
108 المـوت ماخـلا خبيـث وطيـب=كـل(ن) إذا جـت حـزتـه يشـيـل
109 هذي منازلهـم وهـذي وسومهـم=حنـا بعـد فــي وسطـهـا نـزيـل
110 حياة وراها الموت وش ينبغى بها=عقـب العسـل شــرى وحنظلـيـل
111 شعيب عاش ألف عديد من الدهـر=وقبـل إنتـزاع الـروح نشـد وسيـل
112 قالوا شبعت وقـال كنـي داخـل=مع هالبـاب واجـرى يـم ذاك هذيـل
113 وقارون مافكه من المـوت مالـه=ولا فـك عتـنـر سيـفـه الصقـيـل
114 عندي خبر بالعمر مثـل العدولـه=يقضـي بهـا المعـدل مـن العـديـل
115 يالله حسـن الخاتـمـه يـاربـي=نهـار أنـا وسـط اللـحـود نـزيـل
116 نهـار مقعـادي وحيـد لحـالـي=ولا صـاحـب عـنـدي ولا خلـيـل
117 حطوني الأحبـاب وأقفـوا عنـي=وغـدا لهـم يـوم الفـراق عـويـل
118 يالله تامـن وحشتـي بالحـالـي=تـمـن مخـافـة عـبـدك الذلـيـل
119 عن حر شمـس الآخـره ياربـي=تظلـنـي فــي ظـلـك الظـلـيـل
120 تمت وصلى الله على سيـد المـلا=وتمـت وعمـر السامعيـن طـويـل