بصوت خازباز
يالله يـالـلـي كــــل حــــيٍ يـسـالــك=يــا واحـــدٍ كـــلٍ يـخـافـك ويـرجـيـك
يـا قـاسـم انــوال الـمـلا مــن نـوالـك=وقبضة نواصي الخلق كلهن بياديـك
اتفـك عقـد احـبـال عـبـدٍ شـكـا لــك=مستـبـرمٍ حبـلـه بعـقـد الشرابـيـك
بعيـدٍ عـن الدانـي دعـا والتجـا لــك=يـا مـن هـو المـالـك وحـنـا الممالـيـك
ارمــي بـحـالاتـي لـذيــك التـهـالـ=كتفرج عن القلـب الـذي فيـه تشكيـك
مـا بـه مـن الحـرفـات الا الـدعـا لــك=والحـيـل قـصـر والأيــادي مفـالـيـك
فيلا اقتضى عسري بحسن الرضا لـك=فاجعل لنا صبرٍ على العسر يرضيـك
سايلـت داعـي البيـن مالـي ومـالـ=كمـن كــل صــوبٍ كـاثـراتٍ دعـاويـك
قــال إن هــذا الأمــر لا لــي ولا لــك=أمــرٍ قـضـاه آلـهـك الـلـي مسـويـك
لا تعـتـرض أم الـقـدر فـــي جـدالــك=ولا تحسب إن اللي مصيبك بيخطيك
قسمة احظوظ الخلق قسم السوا لـك=ومكتوب حظك يالفتـى فـي نواصيـك
جـف القلـم باللـوح فيمـا اقتضـا لـك=إمـــا سـعـيـد الـحــظ وإلا مشـقـيـك
وأنا اشهد أن اللي كتب لـك ينالـك=يالعبـد ربـك باسـم حـظـك ينـاديـك
كــلٍّ بتقـديـر الـولـى طـــاب فـالــك=اصـبـر عـلـى مــا قـــدر الله يـأتـيـك
ولا تـلـوم النـفـس فيـمـا جــرا لـــك=تـبـور غـالـي سلعـتـك بـيـن أيـاديـك
ويلومـك اللـي مــادرا عــن حـوالـك=ولا درا ويـش الـدهـر مـحـدثٍ فـيـك
محـدٍ درا ويـش الـذي صــاب حـالـك=ومـا جـرا لـك مـع صديـقٍ معـاديـك
بـمـكـايـده يـبـلــن الأيــــام حــالــك=وعــن الـمــوارد قـاصــراتٍ مـدالـيـك
ما شام بـك مـن ديرتـك عـن عيالـك=وما عرضـك درب الخطـر والتهاليـك
ويـن انــت والأقــدار يــوم ارتحـالـك=فـي وسـط غبـاتٍ بهـا الـمـوج عالـيـك
مــرٍ يـمـيـن ومـــرةٍ مـــن شـمـالـك=والعـرب مـن التريـك تاخـذ بياديـك
إن قيـل رد البـوش واربـط احبـالـك=ضـاقـت عـلـى احـرارهـا والممـالـيـك
فـاعـزم وشــم ولا تـضـيـق المـسـالـك=ولا تـسـوي يافـتـا شـومـت الـديــك
وافهم نبا مـا أقـول لـك طـاب فالـك=سعود الفتى بالحظ من غيـر تشكيـك
وإن جاد حظـك بـاع لـك واشتـرا لـك=فـوايـده مــن كــل الأبــواب تاتـيـك
وإن بـــار بـــك دلاّ يـهــزل حــلالــك=وبردا الثمن لزمـاً يبيعـك ويشريـك
وإن جــاد حـظـك بالمجـالـس حكـالـك=وصــدق مقـالـك كــلٍ لــك يحاكـيـك
وإن بــاربــك دلاّ يــكــذب مـقــالــك=وتصـيـر كـذبـات الـمـلا كلـهـن فـيـك
وإن جــاد حـظـك بالمـنـازل بـنـا لــك=بيـتٍ رفيـعٍ شامـخ الـطـول يـذريـك
وإن جـاد حظـك كـل شـيءٍ صفـا لـك=وقـرايــب الـخــلان كـلــن يصـافـيـك
وان بـار بـك بيـن جميـع العـدا لــك=وصــار المـحـب اعــدا عــدوٍ يعـاديـك
وإن جـاد حظـك كــل شــيءٍ عنـالـك=ويبـاشـرك عـنـد الـمـوده ويعـطـيـك
وإن بـار بــك ضلـيـت مـحـدٍ بحـالـك=ولا بفـنـجـالٍ مـــن الـبــن يـسـقـيـك
وإن جـاد حظـك قـام واطلـق اعقالـك=ومشـا معـك فــي كــل دربٍ يبـاريـك
وإن بـار بـك جـود متيـن الثنـا لــك=وعـن كـل دربٍ لـك يعقلـك ويثنيـك
وإن بــار بــك شـيـن حـلايـا خـيـالـك=إلى اقبلت تغضى كـل عيـنٍ تراعيـك
وإن جـاد حظـك كـل شـيءٍ أضـا لـك=يشبـه فــم القنـديـل نــوره يقـديـك
وإن بــار بــك عـزيـل حـالـي وحـالـك=ارذل رذيــلٍ هـافــي الـجــد يـوذيــك
يالعـبـد لــو كـثـرت حــث ارتحـالـك=وعرضتهـا درب الخـطـر والتهالـيـك
تـــازي بـــلا حـــظ بـعـيـدٍ مـحـالــك=وقـلـوص عـزمـك بالمهـامـه اتخلـيـك
تسعـيـن عــام يافـتـى مــا بــدا لــك=ولا لاح فــي بـالــك لـــزومٍ يصـافـيـك
قـل ول يـا حظـي علـى مـا جـرا لـك=إلى قـل عونـك ماجتهـادك بيغنيـك
اكتـب مكاتيـب الشقـا والعـنـا لــك=قل ول يا حظ الشقى اتعبـت راعيـك
يـقـول لــو حـظـك سعـيـدٍ نـمـا لــك=لــو عـشـرة اولادك عضـيـدٍ يكفـيـك
والـيـوم لا تـأمـن يميـنـك شـمـالـك=يبـوقـك اصـــدق صـديــقٍ يمـالـيـك
ولا يـغــرك إن لـقــاك وحــكــا لــــك=لـو عطالـك مــن المواثـيـق يرضـيـك
اخـذ الحـذر كـل الحـذر لـو صفـا لـك=عيبٍ على انك تأمـن الخصـم ياليـك
تـحـرز بـسـو الـظـن وابـصـر بـحـالـك=واحذر جليسٍ ضايـع الـراي يعميـك
من سو طبعـه إن حكـا بـك حكـا لـك=يرضـي عـدوك بالنميمـة ويرضيـك
راعي المكـر والبـوق والكـذب سالـك=وراعي الثنـا ضاقـت عليـه المساليـك
يـمـشـي ورأيـــه ضـايــعٍ بالـمـهـالـك=لا شاف من دونه على الوكـر عاليـك
مـا تنـظـر الأقــدار فيـمـا جــرا لــك=شيـوخ القبايـل يتبـعـون الممالـيـك
فاعـزم بعـون الله علـى مـا بـدا لــك=واقصد إله العـرش حسبـك ويكفيـك
صـاروا ابـطـن اللـحـود ارض فمـالـك=صبـرٍ فهـل منهـم صـديـقٍ يعـزيـك
لا بـأس لـو مـن كـل طـرفٍ جـرا لـك=هامي سحاب الوجد من فوق خديـك
يـا قلـب هـيـد عــن تـذكـر احـوالـك=واصبر عسـى رب المـلا يعتنـي فيـك
اصبر عسى تعطـا خلـف مـا غـدا لـك=رجـلٍ إلـى سامـتـك الأيــام يشـريـك
يــارب تجـعـل واحــدٍ مـــن رجـالــك=عنـد الشدايـد مزبـن اللـى يواليـك
فـي يـوم مـا تعطـي يمينـك شمـالـك=مثقـال حبـة خـردلٍ مــن حسانـيـك
تعطيني مقصودي وأنا اللى أسالـك=يـا سامـعٍ مـن جــا لبـابـك ينـاديـك
واختـام ملفوضـي لـنـا فــي مقـالـك=ازكى صلاة إلى هادي الرشد هاديـك