[الطائر المهاجر]

ابرحـل إلى النسيـان لا تنشدي المقهور = عن اللي جرى له او على ويـن مشـواره
واذا من نشدك الناس عن كوخي المهجور = قـولي لهم هـاجر ولادري عن اخبـاره
ابخفي جروحي في جناحٍ غـدا مكسـور = وادوّر بقايـا طفـل فـي داخلـي نـاره
اذا من تحـرّك يوهـج القلـب كالتنـور = اهاديه لا يغضب ويخـرج عـن اطـواره
أسولف واغنّي له واقول الدمـع معـذور = مدامك فقـدت اللـي يراعيـك بانظـاره
يجاوب بحرقه توضح انّه كما المقبور = جسم حـيّ لكـن تنعـي الـروح زوّاره
سنين العمر تاهت على عقدهـا المنثـور = احـاول اجمّـع مـا لقيتـه مـن اثـاره
انا لا ذكرته اوجس القلب كالمعصور= يحارب جيـوشٍ تنـوي اليوم بحصاره
مابين الحزن والياس واقف كما المأسور = يطالع بحاله واعلن الوقت اعسـاره
خسر كل شي لاجلها مـا سمع للشـور = خسر حلـم كان بيوم يبقيه بدياره
يحسب الزمن يصفى وثاري الزمن معذور = فحنّـا سبـب جـزره ومـدّه واعصـاره
نفوسٍ تغيّر بالمبادي بلا محذور= فلا عاد يفرق بومهـا اليـوم واحـراره
ولا عاد به في الحب شـرعٍ ولا دستـور = فكـلٍ يغنّـي عـازفٍ أكـذب اوتــاره
نست حب يجمعنا بعفّه علـى الميسـور = نست يوم قالت انت لي الكـون وانـواره
كلام كثيرٍ لين مـا اصبحـت كالمسحـور = تبيعه وانا اشري وادفـع العمـر لغبـاره
وترحل وانا مدري وترسل ثـلاث سطـور = "نصيب ومقدّر ينتهي الحـب واسـراره"
حبيبي تعال اليوم واكشف عن المستـور = من اللي شرى قلبـك وخاويت لاطياره
لتشطب على قلبٍ شويته كمـا العصفـور = بلا ذنب غير انه وطـى لاجلـك اخطـاره
ابرحل لعل انسى واذا غبت سبع شهـور = فصلّي على الغايب رحل لاخـر اسفـاره