لا تعاتبني وتجرح قلبي وكني جماد=وأرحم اللي في غيابك عايشٍ عمره وحيد
في غيابك ما تصدق اني عايش في جهاد=معتزل هالناس كني بالعمر اكبر زهيد
ما بغيت ازيد همك يكفي انك في بعاد=ما بغيت اشكي ولا احكي لأنْ ما عندي جديد
هذا قلبي ما تغيّر وانت عمري والمراد=حتى لو قل اتصالي وانقطع عنك البريد
يكفي اني في غيابك منتظر منك معاد=يعني اني من فقدتك انتظر وقت سعيد
والسعادة في جنابك يا أرق من الفؤاد= الفؤاد اللي يحبك وأعلن وعينك سيد
لا تفكر في غيابك اني هايم بالبلاد=لا حشى واصلا ما اقدر شوف قلبي يستقيد
اجلس لحالي وافكر وانتظر طيف ووداد= واحترق من شوق فيني ما يقل ابداً يزيد
أمس كان الجو حر وزاني منك براد= يوم شفت الطيف جاني صرت كني بيوم عيد
وانثنى طيفك وغنى وانقشع حزني وباد=كنه الا يطلب اني أبتدي أبدع قصيد
بأبدع المعني و وصف مثل ما قال بسعاد=كعب ياللي شاعر البرده أبو موقف مجيد
بانت اشواقي وطلت نجمة بين العباد=صوبت قلب برمش غير أحوال الوريد
رمشها ريش على طاووس لا يمكن يصاد=من خلقه الله تعلم يأسر عيون و يصيد
يعطي ألوان تزغلل ثم يعود للسواد=ويتحرك في تأني هاديٍ ماهو طريد
يحمي عيونٍ عطاها البن لونه ويوم جاد= في وسطها لمعة نجومٍ وسبحان المعيد
فوقها حجاجٍ كما قوس المحارب بالعتاد=يسحر الأنظار شوفه منحني مثل الجريد
وان رجعت لجيدها جيد كماجيد الجياد=مهرةٍ شهبا بلا سرج ولا حذوه حديد
كالعبيّه هَملَجتها لـ سرعت بأرضٍ شداد=أتبختر في توازن هيج حروف النشيد
تنثر القذله على وجهٍ يزينه العناد= ناصية تجذب يديني تحتها ذاك الخديد
يفعل بكفي كما طفل مكتف بالمهاد= نايم في حجر دافي بعد شبعه مستفيد
واتذكر في ثواني عمر عدى في بعاد=وأذكر هموم خذتني عنكم يومي بعيد
وارجع اقول اعترافي والحكي هذا وكاد=واعذر اللي من بعادك غايب الفكر وشريد
العمر كله بدونك يستوي مثل الحِداد=وانت عارف بالحِداد الناس ماتحكي وتعيد
اَنتظر لحظة رجوعك واِنتظر وانت العماد=اللي قام البيت فيها واستوى قصر شديد
لا تجرّحني بقولٍ لأنتهينا يستعاد=وألتفت لأحلى الثواني وانتبه عنها تحيد