السلام عليكم ورحمة الله وبركاته
مساكم / صبحكم الله بالخير ...
للتواصل مع قلوبكم تقبلومني فيض المشاعر...
تفضلو بكل سرور ...
7
7
7
7
7
يابونهار اللي له الروح نهديه=يابلسم الجرح العليل المداوي
لك منزل ٍ بالقلب شيد مبانيه=شرواك غالي بالذهب ما يساوي
قدرك على روس الشواهيق معليه=فوق المشارف معتلي كالنداوي
يالغالي اللي بين الاخوان نغليه=حيثك شقيقي والرفيق المخاوي
فيما مضى بالعهد الاول وتاليه=أنت الرفيق اللي على الدرب ضاوي
وانت الذي لاضاقت الحال ناتيه=واشكي له اللي صابني من بلاوي
وانت الذي لا بيّح السد ّ خافيه=ألقى لها صدر ٍ وسيع ٍ وحاوي
أتعبني الكتمان ماودي ارويه=خوفي من الشامت ردي ّ الهقاوي
اللي حريص ٍ للنمامه مساعيه=ماجاب لي غير النكد والشقاوي
كنه كما اللي ناقل رداه بيديه=على الردى في نقل الاخبار هاوي
أشبّهه بالجارة اللي تلاقيه=من كل بيت ٍ سيّرتها الخطاوي
للصمت حكمه لا بكت في معانيه=وللصمت صوت ٍ بالضماير حكاوي
خذ من كلامي صمتي اللي سكن فيه=وانت اللبيب اللي على العرف قاوي
ومانساك ياخالد عضيدي وباطريه=ياخوي ياللي دايم ٍ لي مداوي
شهم ٍ ولد شهم ٍ أصيلة مباديه=الوافي اللي يبرد القلب وياوي
يامسندي عند اللوازم أناديه=ماقال (لا) في يوم وماهو ب ناوي
يامحزمي واشد بالظهر انا فيه=عند الشدايد واختلاف الهقاوي
وللصمت حكمه ماشكينا خوافيه=وللصمت صوت ٍ للمعاني يداوي
عبدالعزيز بن سعد العمار
1430هـ