اليوم عند العصر شافتني المها = قرب التلال اللي يعاتبها الغروب
من تحت ذاك البرقع اللي ضمها = قالت علامك يا فتى كنك تذوب
قلت الهوى يذبح قلوبٍ سقمها = عشق العيون اللي تذوقنا الحروب
غرقان كحـل العيـن لـو هـو طمهـا=يغرق وماله من هدبها هروب
يغار منها العطر لو هو شمها = تهدا على خد المها ريح الهبوب
سبحان ربي كيف أتقن رسمها = ميال يا غصن النقا بين الدروب
صبت على قلبي زلالة حمها = محلاك يا حم الغزالة بالقلوب
ياليت داري قرب دارك يا المها = لاقعد على بابك ولا منك أتوب
بيحت هم الروح تالي همها = في عشق ريمٍ سادلة عني الطيوب
هقيت قلبي ما يواطن إسمها = واليوم كنه في معايبها يذوب
تدلعت فينا تمايل جسمها = والخصر مايل بالشمالي والجنوب
يا مبهر النظرة صويبٍ سهمها = تكفى تعالج عاشقٍ جرحه صبوب