أسعد الله وقاتكم أيها الأحبه
اليكم هذه القصيده التي أتمنى ان تجد القبول لدى ذائقتكم
يسج فكري كـل مايطـرق البـال=من ماضي الايـام ذكـرى قديمـه
ذكرى الجميل اللي على البال لازال=طيفه نديم الفكـر داعـب نديمـه
ذكراه لاذعذع نسيم الهواء اشمـال=ناجيت ذعذاع الشمـال أبنسيمـه
أسج فـي دنيـا خيالـه ولاهـوال=بجنون شاعـر كـل وادي يهيمـه
واعيش جوه شارد الفكـر رحـال=حتى ارتكب في حق نفسي جريمه
أتعب وكابر لوتعب سجتـي طـال=مرهق ولكن ماعتـرف بالهزيمـه
ومن جوه اطلع حالتـي مالهافـال=حالة يتيم (ن) عنده اختـه يتيمـه
عاشو تحت رحمة قسا زوجة الخال=وصارت على ظعف اليتاما زعيمه
قليلة الايمان في خبـث الاعمـال=اللي تلقب بـم عيـن (ن) كريمـه
حسبي عليها هبلت فيهـم اهبـال=تنظرلهم نظرات خصـم لخصيمـه
ماخافت الله فـي يتامـا وجهـال=الله يحرمهـا الجنـان ونعيـمـه
يتيم قاصر مابيـده حـل يحتـال=صابر على جور الزمن والظليمـه
لانادت اخته وشتكت له لهـا قـال=الصبـر ولا الخافـي الله عليمـه
يصد عنها ودمع الاعيـان همـال=تقل بحرباء ذياب تطعـن صميمـه
عزاه صاحت داخلـه كـل الامـال=فقد حنان أهل القلـوب الرحيمـه
حالي مثل حاله على باري الحـال=اللـي عواقـب ذكرياتـه وخيمـه
دايم لياصار القمر بالسماء هـلال=ميـلاد عيـد الذكريـات الأليمـه
ودايم ليا من الهواء بالغصن مـال=شديت للذكرى على شـداد ريمـه
رغم الغياب اللي له اسنين وليـال=في قلب وافي مانقص حب شيمـه
والمستحيل اللي على رجعته حـال=منه نجت نفسي ولاهـي سليمـه
وياباقي الذكرى على رؤس الأطلال=صبري وحفظ اسراري اكبر غنيمه
علي العازمي