[ماجد الزيد]

يصعب النّظر إلى الشّمس مباشرة , والجميع / يرى بها الجميع

قرّبوا لي ما يشيّب له الطّفل الرّضيع=موج بحر ٍ مالسابع عميقه ايّ قاع
في بحر شمس الملوك إن غطس جاب البديع=درّة لعنقّا تسمّت لها بآخر صراع
انتهوا نصف العفاريت مقتول و صريع =وربعهم من خاتم الانبياء يشكي الصّداع
انبياء القاف ما شافوا الأمر الفظيع =من جمع كلّ الرسالات في نفس اليراع
من شهد قتل الزّناتي تخثّع مستريع=ومن سِمع قتل الخفاجي تكوّر ثمِّ زاع
سيف ابو زيد ٍ بدمّ القصايد له نقيع= اتعبه ما اتعب السّابقين بقينقاع
باني ٍ قصر القوافي على انقاض ريع=شاده لياقوتة ٍ ضاوية عند السّماع
يا عناقي من يجاوب على لفح الصّقيع=هل اياب ٍٍعن غياب ٍ فداعي الشوق داع
كم دعاك الي يلبّى على صوته سريع=ما وصلْك اللي وصل للخلايق ما اذاع ؟
بالصدر وحش ٍ موادع ولو ماهو وديع=ما شكى جور الدّهر يوم قلّ الاستماع
كم خفج في مخلبه جالٍ وضربه شنيع=بالضواري طوّع اللي لغيره ما اطاع
وكم غزا لعيون شمّا سبع ماهو سّبيع=وكم صفق جنب ٍ تخاله عقب صفقه شراع
وش لقى غير المواجع ونكران الجميع =كم خطف صيد الغضنفر متاعيس الضّباع
ما يضيع الطّيب عند النشاما ما يضيع=والرّدي لا كلب وافي ولا ذيب ٍ أراع
ناكر المعروف مهفي الجمالات الوضيع=مدّله روحك يقفّي بها والطيب ضاع
الله اكبر والفضاء كلّ جزلة به تشيع=والهزال تموت ما تبرح من الجوّ باع
لك ولا لغيرك يبنّى من البدع البديع=عاصمة فيها القوافي اميرات ٍ تطاع
عاصمة وانتِ عليها مليكة ما تطيع =غير قرم ٍ راضع العزّ من صغره رضاع
والله انّك في خفوقي مثل ورد الربيع=والمطر دمّي لعينك غذّا كلّ البقاع
سيّدة سادات قلبي شراها ما يبيع=والوفاء جاري بدمّي مخلّد ما يباع
ما هويتك من فضاوة , وحبّي لك رفيع=بيننا سيف ٍ وشلفى لو إنّ الليل فاع
انزفك طهْر الصباحات والنّور السطيع=وتعشقين الوجد صوت بْسنوات الضّياع ؟!
خطْر ٍ انّك لو نفختي على شوك وضريع=صار ورد ٍ مندفع لك على النّور اندفاع
ليه اموت الفين مرّة ولا لي من شفيع=وليه اشمّ الفقد وآنا عنّ احضانك ذراع
مصغي ٍ سمعي لبوحك وترجي لك سميع =مرخص ٍ عمري لعينك وعينك في متاع
لو تبين ارقى الثّريا لعينك استطيع=والشّعر لاذّنيك اشبع جماهير ٍ جياع
كلّ ما اقنب فوق مرقب خسى ميّة رقيع=وكلّ ما اظهر كبّر سْهيل وازوَر بالرعاع
كمّ ديجور بْكفوفي غفى باكي صفيع=وكمّ بدر آنار من شمسي وعوّد شعاع
لولا خوفي يقظة قْبور مكّة والبقيع=لانْقر الناقور وارمي عن العرش القناع
ولو يسر النّاي راع الشّليّة والقطيع=ما يسرّ العازف الي عشق ساح القِراع
وش يهمّ اذان مكّة اذن احمد قريع =ووش علي من امّة اتحطها بظهر الخداع
بين عرش ٍ خالع وبين مملوك ٍ خليع=ما يسرّك شوف لحية ولوهي للكراع
الشّجاع الي يحامي عن عيونه صنيع ؟!=والجبان الي يقاتل ولد عمّه شجاع؟!
انربط نابل دِمشق بْحبل قوس المطيع=واختلط زمزم بْنفط الخليج اللي يْضاع
ضاق بي صدري ولوهو قبْل هذا وسيع=علميني هو خفوقك لزاله لي وساع ؟
هذا انا / ناسك تعبقر ولا هو بالتّبيع=طاهر وحبّك تغلغل به لحبل النخاع
صاحبيه بْعسره ويسره وصدره منيع =والله انّك به مليكة ولك أمر ٍ مطاع
وبشريني من كلامي (ا)هو شاب الرّضيع=او مثل فهم أغلب النّاس وطبعه كالطّباع