[عرق الماس]

المشاركة الأصلية كتبت بواسطة حبشينو

هاتي ودنك يا صبية
واسمعيني..
راح اقولك سري بس
اوعي تفضحيني..
قربيلي...
جسي نبضي
هاتعرفيني...
قربيلي
شوفي اسمك جوا
ضي عيني....
شوفي اني لسة شاري
مهما تبيعيني...
شوفي شوقي
ده انا مهما اداري
- عنهم -
انتي لازم تفهميني....
هاتي ودنك
واسمعيني...

جاي افضفض
جاي احكي
جاي اشكي
ايه هتمنعيني..؟
ولا ع الفاضي هتسيبني ..؟
مش مهم
الاهم انك تحسيني ..
وتعرفي ازاي
انا_ واللي زيي_
عايشين سنيني...
انا حلم ع الرصيف
بيحلم بالرغيف
و باوضة ليها سقف
... مش مهم حتى يكون
نظيف..
المهم انه يحمي من مطر الشتا
وشمس الصيف...
انا شاب العمر بيجري بيه
ولا اي قطر فيكي راضي بيه
قطر الحب
كله كدب
هانعمل ايه.؟؟
قطر الشغل
زي الفل
بس كارت مين ده
اللي يجيبلي مكان فيه ؟
انا مش وطني!!!!!!؟
لا والله وطني.
بس مش كل وطني يا صبية
بتظبطيه..
فيه وطني فقير
فيه مليونير

فيه عصامي
وفيه حرامي

وللاسف هو ده
اللي بتتباهي بيه...

اسرق ؟ لاء بلاش
اصل السرقة فن
وانا الفن ماليش فيه..؟
ياصبية
قربيلي ليه هتمشي
وتنفضيلي...
ايه زعلتي اني باشكي
ولا من كتر ما سمعتي
مني ومن اللي زيي
زهقتي
وهتوزعيني؟
طب اقولك حاجة جديدة
مش هاحكي عن الناس البعيدة
اللي مش لاقية ماية
واللي في الدنيا تانية
ولا هاقولك
ان فيه بيعيشوا ا عالة
واللي بتمد ايدها للزبالة
ولا هاحكي عن
ولادك
اللي ياعيني حالتهم
حالة
ولا اعيط على اخويا
اللي هاجر..
اللي خد تحويشة امي وابويا
وقال هاسافر..
اللي اترمى في الموج ياعيني
والموج يقولوا ياااه لسة فاكر
موت يا مصري
موت ياعصري
موت ياللي عشت
ايا مك صابر وثابت....
موت اساسا انت ميت
ماهو لو كنت عايش
عمرك ما كنت تبقى
ساكت..
.
حتى لما نعوز نهج منك
نلقى الف الف حاجز يعاند...
ليه بتمسكي فينا لما نهرب
ليه دراعك منا يرقب
لما نباعد...
ياما قولنا فيكي
يا ما حبك ميل عليكي
وناداكي .. يا ملاكي ..
ياللي ما فيش سواكي ..
انتي فين ..؟ مش بتشوفينا ؟
ولا مغيبينك؟
ولا شمس الحقيقة
اتزيفت
ولا غابت ...

هاتي ودنك ياصبية
وركزي شوية معايا
هاحكيلك بقى
اغرب حكاية

وانا واقف قصاد نيلك
المليان هموم واللي كل يوم
يشهد على بكايا...
واقف مش لاقي ناسي ..
كلهم نفس الوشوش
والطباع مش هي اللي
انا اعرفها من البداية...

كله ماشي بيشتم ..
او بيلعن
او يتمتم غنوايا ...
غنوة فيها هبل وهطل
ايه اللي حصل لولادك
هي دي نوبة جنان ولا ايه الحكاية
عنف قتل جرايم تشيب
والطيبة بقت حاجة
تعيب
حتى انا ماعرفتش نفسي
لما بصيت في المرايا...
وانا واقف اقرا اية...
جم عليا اتنين
حبايبك
انت مين؟
انت ايه ..؟
انا عادي يابيه
انا واقف ع الكورنيش
زي باقية البرايا...
بابص ع النيل الجميل
اصله منظر ع لى هوايا
هات بطاقتك
طب اتكلم بالراحة معايا
اه ياعيني
يا كرامتي
ضربة جامدة في قفايا
المهم
خناقة جامدة
وطبعا انا المضروب
مهزوم
من البداية للنهاية
جوا زنزانة مرمي
ياصبية ..
شوفتي اللي بيجرى فيا
انا ابو قالقلم
اللي ي اما كتبلك ..
يجرى كل ده ليا...
ضرب تاني
كل يوم ..
يا خونا انا مظلوم
ايه تهمتي؟
مافيش تهمة
بس هو كيف
مش ده فيلم ؟
ههه لا ظريف
اضربوني
وبالبطيء اقتلوها
وكل كلمة حق موتوها
والاقلام الحرة يلا كسروها...
والاماني في عيون الصبية
اسرقوها...
هي كده راضية
انتوا اللي هترفعوها ..
اما انا ع الارض مرمي
ولسة فيا نفسي
واحتمال الجنازة بكرة يعملوها...

معلش يا صبية
نكدت عليكي ...
دي حكاية كان نفسي يسمعوها..
بس عارفة رغم كل ده...
لسة في انفاسي كلمة
مش هيقدروا يشلوها
هي اسمك... ياصبية
هاتي ودنك عشان اقولك
رغم كل ده
بحبك

حضرة الأخ محمد..

خاطرة جميلة جداااا...

تتعالى صرخاتها من صميم الواقع المؤلم..

تسلم يدك..