عرض مشاركة واحدة
قديم 22-09-2009, 01:04 AM   رقم المشاركة : 1
الطائر المهاجر
** (عثمان العبدالله) ** المؤسس والمشرف العام
 الصورة الرمزية الطائر المهاجر





معلومات إضافية
  النقاط : 20
  الحالة : الطائر المهاجر متواجد حالياً

 

افتراضي قصائد الفطاحلة في الوطن وضد الإرهاب


في هذه الموضوع ارجو من جميع الشعراء والشاعرات ، وضع قصائدهم عن الإرهاب والإرهابيين وسلامه سمو الأمير محمد بن نايف من محاولتهم الفاشلة والغادره ،

قصائد الطائر المهاجر
1- الحمد للي يرد الكيد لاصحابه

الحمد للي يرد الكيد لاصحابه= ويحمي بلدنا من اللي ناوي نيّه
وممن غدا مثل سيف يعض بقرابه= وخان الوطن في فعالٍ كلها سيه
طاوع هل الحقد في افكار مرتابه= وصار امعه في يديهم مابه رجيه
واللي حصل ما يبي شعرٍ ولا كتابه= يبغى حلولٍ تعالج ميه بميه
نحفظ شباب لقفتهم يد مغتابه= من كل ماكر بسمٍ تنفثه حيه
بالعلم والوعي نمحي كل اسبابه= وبالشغل نشغل شبابٍ ضاع في الهيه
واللي عطي ثوب ماظني من ثيابه= حتى استغل العقيده بطرق ملويه
نرجعه للعقل كان ان العقل سابه = وإلا بنار على علباه مرهيه
ممن يشوفه غدا عالم ولايابه= بحق الوطن لو يشب النار في حيه
يفتي بليا دليل بكل ماجابه= وهو تليميذ يخدع نفسه وخيه
ويرسل علينا طيورٍ وقفت ببابه= تاخذ بأمره وحنا نصبح ضحيه
مايدري انه خدم طهران واذنابه= ممن يبي الثار من يعرب واهاليه
فكل المراجع تقول الخصم يتشابه= لو هو لبس ما لبس او غير بزيه
حتى ولو هدد اسرائيل باالعابه = معروف حلفه معاها منكشف طيه
فحنا الهدف دامنا من كسر انيابه= فاجدادنا من غزوه وانهوا لغيه
في صالحه تشتعل نيران شبابه= ويضرب بعضنا بعض عن جهل ونخيه
لكن رجال الأمن بعزوم وثابه= بقيادة الفارس اللي مدرك النيه
انهى جذور العماله واحرق اطنابه= ووعى المواطن وسار الكل في فيه
يبقى الوطن فخرنا نعلي من ارتابه = ما نرحم اللي يحاول يطفي لضيه

2- يا دار لا تخشين عـادي وغـدّار

يا دار لا تخشين عـادي وغـدّار = حتى ولـو هـو منك خاسر رهانه
انتي الجبـل ما هـزّه بيـوم تيّار= وانتي الشمس تحرق غيوم الرعانه
اللي حدث ما هوب من فعل الاخيار= مهما الهـدف والعـذراسمه خيانه
ما قـال ربي نقتـل معـاهد الدار = ولا قـال نذبج مسلمٍ في ومانه
عقـلٍ مـدبّر يختفي خلف الانظار= يغسل عقـولٍ ما بهـا من ذهانه
طيورٍ ظمـايا صادها تحت الاشجار= والطعم جـاهز في صكوك وضمانه
طـارت عمـايا ما تميّز للاخطـار= والحبـل في يـدّه وهـو في مكانه
ولـو ما تنفـذ تنقتـل دون إنـذار= ماسك عليهـا عهـدها والأمـانه
محـدٍ تنبّـه يفهـم طيـورالاسرار= ولا حـدٍ يوقظهـا بعقـل وفطانه
ولا حـدٍ تفكّر ليش طـارت للاوكار= وصارت هـدف للي خدعها لسانه
السر واضح ما يبي عصر الافكار= شبـاب ضـايع مافتهمنا لشانه
محـدٍ بحث وضعه وهمّه ولامرار= طيّـر وحصـل وكرٍ زود جنانه
اعطـاه دنيـا وآخـره وسيف بتار= فيه الهـويّه يـوم ضاع بزمانه
صار البطل من عقب ما هوب محتار= وكلٍ يشجـع والنشيــد بـأذانه
ما عـاد له هـمٍ سوى اللعب بالنار= مـوته بـداية مرحـله لاطمنـانه
ما يـدري انّـه صار بيـدين تجّـار= كسبوا ثمن فعـله ومـوته مهانه
لا بـد ما نفهـم ونحمـي للاطيـار= ونمنـع بـذور الشر في كل خانه

3- سعوديين ما نقبـل تطول الـدار الانكادي
هـلا بك عيدنا الغالي هلا والحب لبلادي = هلا بالـورد والكادي ابارك للسعوديّه
تعودونه سنين طوال بفخر وعز الامجادي = رفيعي الراس بالعالي على العادي نداويّه
عبرنا للعـلا نبني حضاره فوق الاجسادي = وكلٍ يفتخر انّه سعودي اصل وجنسيّه
حميّة دوم تلقـاها وشهـامه للكـرم حادي = رجالٍ وين ما نمشي سباعٍ حزّة الهيّه
سعوديه من اقصى الشرق لاقصى الغرب والوادي = ومن اعلا الشمـال لتهمها والروح نجديّه
هلا بك عشقي الأول هلا بك فجر ميـلادي = هلا بك والغرام اكبر بقلبٍ صادق النيّه
تعالي افرحي حبّي وغنّي واطربي الشادي = على حبّك تلاقينـا ياشمس الكون يافيّه
سعوديين يالعزوه يا فخري بكل الأعيادي = نبي وقفة رجل واحد لاجل أمن السعوديّه
جسد واحد فكر واحد ما بين الحضر والبادي = وحب الدار يجمعنا على خـوّه وحنّيّه
حصاني الحقد لو كثرت تبي الفرقه والافسادي= نعرّيها ونحمي الدار ونكشف من خفى غيّه
سعوديين ما نقبـل تطول الـدار الانكادي = نفاديهـا بدم القلب والأرواح مرهيّه
نعيش بحاضرٍ احـلا ونبني مجد الاحفادي = حمـاك الله يا بلادي بعالي المجد دريّه

4- ليله غريبه بحيّنا

ليله غريبه بحيّنا/ ماهي مثل كل الليال= صوتٍ كسر صمت السنين/ وما عرفنا من سكينه
صوت الرصاص وطائره/ من فوق راسي في المجال= ترصد طيورٍ ذائره/ من بعد فعلتها المشينه
عقل انغسل/ صابه شلل/ يبحث عن دروب الزوال= مسحور والساحر هُبل/ يصدر له امره من عرينه
برمجه صوره قبل صوت/ القتل شغله بالختال= روبات يمشي بالرموت/ وان ما مشى يقطع وتينه
يدفعه يبحث عن هدف/ ويقول له يا عزّ غال= فجّر ودمّر لاتخف/ فالشر كله في المدينه
وان كان تقتل لاتخف/ تذهب لحور وقصر عال= مثل الذي قبلك سلف/ شفت الكرامه في جبينه
يقتل بلا رأي سديد/ ابكل غدرٍ واختيال= والساحر الخادع بعيد/ وراه حتماً من يعينه
كلش ولا أمن الوطن/ يامن تريده باشتعال= تريد يغرق في الفتن/ من شان احقادٍ دفينه
مهما اختلفنا نلتقي/ فالأمن فوق الإحتمال= ومن هو بشرّه منتوي/ يلقى لدينا مايهينه
ماظنّ عاقل يرتضي/ نصبح كما جار الشمال= ولا ظن قلبٍ ينبضي/ يقبل بتخريب السفينه
مهما يكن حنّا بخير/ نحسد على امنٍ وحال = وما فيه كامل/ غير ربٍ من أمانه نستعينه

5- ظلمك الـوقت يا حبّـي

ظلمك الـوقت يا حبّـي وكثر الحقـد والحسّاد = تخاوى ابليس والشيطان وقلوب تحبيها
احد غافل واحد جاهل واحد ياطى السريح اعناد = واحد حصني بوجه انسان لو ذيله يغطيها
يبـونك مثلمـا غيـرك تعيشي الهـمّ والانكاد = يخـدمون المعـادي والذي نيّتـه يخفيها
وكلٍ ما سـأل عنّـك يفكـّر بالطمـع لو زاد = نسى تاريخه الماضي وبطنٍ كان طاويها
نسى حـالٍ به اجـداده يبي ذاك الـزمن ينعاد = يبي نمشي ولا نامن ولو خطوات نحصيها
نسى ثارات بين النـاس ولا احـدٍ يهتني برقاد = نسى امراض فتّـاكه ولا به من يداويها
لئيـم النفس لـو يكرم تمـرد وابتـدا الافساد = على نفسه وعلى غيره طبـاعه ما يخلّيها
الا يا عاقـل اسمـع لي وتفكّـر قبلمـا تنصاد = مثل عنزٍ لجحر الذيب جرّتهـا خطاويها
ترى اللي صـايرٍ واضح مخطط لعبة الموساد = تبي بديـارنا الفوضى وتكسب من تداعيها
فتقنـع كل هـذا الكـون بأنّا الشـرّ والاحقاد = على انفسنا وعلى هالارض واللي ساكنٍ فيها
تحقـق حلمهـا الاكبر بدولـه تحكـم العبّـاد = تهودهم بلا رجعه .. كذا التوراة يرويها
تحسب إن الهدف خيّر مثل غيرك من الاجـواد= لأنك ما تشوف اللي على خطّـه يمشّيها
وغيرك انخـدع قبلك رجــالٍ بالنفس زهّـاد = ورجـالٍ تنتخي للدين وما تدري مواطيها
تثـق في اللي يحرّكهـا وهو يستقبـل الاكواد = ومن شافه لحسن الظنّ يبعد عن هقاويها
ترانا في خطـر يا صـاح تنبّه وافهـم الأبعاد = فدين الله في محنة واخـاف إنك تغذّيها
نحسّ الغبن والأمرار بفعـل الكفـر والالحاد = ولا نقـدر مع الكثره نجـاهر في تحدّيها
ضربنا بعضنا في بعض وصرنا للبعض اضداد= وغدينـا كننا المعزا تنادي الذيب يحميها
واذا منّـه فـرس وحـده يفسّر فعـلته بركاد = خطيره بالفكر تنوي بقـايا المعز تغويها
متى نصحى ،متى نفهم ،وندرك خطّة الاوغاد = نلمّ الشمـل نتسامح ونسهم في مبانيها
ترى في ديننـا فسحه عطتنـا ماضي الأمجاد= واشوف اليوم يغلقها فكر يجهل معانيها
فكلٍ يصدر الفتوى ولـو يجهل حروف الضاد= وبعضٍ ياخـذ الكلمه ولا فكـر بتاليها
تـرى الفتنه إذا تبـدا حـريقٍ ماوراه اخماد = فليش النـار تشعلها وربك قال تطفيها

6-بيني وبينك عهد ما نيب ناسيه
بيني وبينك عهد ما نيب ناسيه= عهد الوفاء والحب طيلة حياتي
وبيني وبينك وعد لابد ما اوفيه = اني ادافع عنك حتى المماتي
ياديرتي والحب في القلب يحييه = ينطق بحبك في جميع اللغاتي
احسه بقلبي مع الدم يرويه = واحسه بروحي كياني وذاتي
انتي فرضتي الحب والقلب شاريه= بافعالك اللي تنطق الراسياتي
حبيبتي والفعل لايمكن احصيه = ياصعب تعداده على الحاسباتي
يشهد لك التاريخ والحق يهديه= يقول انتي آية المنجزاتي
ياديرتي والحب لا يمكن اخفيه= يعلمه ربي عالم الخافياتي
حبك معي في القلب دايم الاقيه= في صحوتي في نومتي في غفاتي
دايم احسه واسمعه ثم اناديه= مجنون ليلى ما يسوي سواتي
حنا عيالك ما تقولين لبّيه= نفداك بالغالي نرد الغزاتي
حنا معك في الخير والشرننهيه= نبيك فوق سهيل والساهراتي
يمه ترى حب الوطن دوم نغليه= تاريخنا معروف سهل وسراتي
حب الوطن ماهوب بالهرج نبنيه=ولاهوب نثر وشعر او اغنياتي
حب الوطن ايمان والدين يمليه= وطاعة ولي الأمر في الموجباتي
وحب الوطن قولٍ وفعلٍ يوازيه= اخلاص في جدٍ وصدق النياتي
ضمير حيٍ يرفض الشر يغريه=ويرفض دروب الشك والمغرياتي
وحب الوطن انك من القلب تعطيه= في كل صدق بالفقر والغناتي
وحب الوطن انّك الى المجد تعليه = والكل في دربه لمجده بناتي
وحب الوطن دمٍ على الأرض نرهيه= نفداه بالأرواح حتى المماتي
هذا الوطن بالروح والعمر نفديه= وهذا الوطن حبه بدمي وذاتي
مادام ابو متعب على الدرب نمشيه=رجل المهمه صانع المعجزاتي
يحمي حماك وما طلبتيه يعطيه= يبيك نجمٍ يهدي التايهاتي
شهمٍ عظيم الشان والعز يبنيه= يعلي صروح المجد في العالياتي
يحفظه ربي خالق الكون واليه = ويديم عزه نهتني بالحياتي
7-وين الدين لو كنتوا تعرفوا بعض مضمونه؟

الا يا طير وش لك بالحمام اللي سهل ينصاد=ابيك تدوّر طويرٍ على طيوري يهدونه
شغل فكري وخلاني سهير الليل دون ارقاد = ينوح ولا بدا نورالفجر غيّر من لحونه
ينادي كود تطلع له عصافير الهوى تنقاد= يعلمها على الالحان ويسحرها بمكنونه
يمشّيها على كيفه على فكره على الميعاد = وإذا من تسمع لهرجه يثير الشك مضمونه
يمنّيها تصير صقور وتبني في السراب امجاد= وتهاجم من يعارضها تحسب الشر بعيونه
انا ما همّني نوح القماري صرت له معتاد= أبي من علمّه يرطن وابفهم من يغذّونه
الا يا طير لو تلقاه قل له يفهم الابعاد = ويترك دارنا تامن ولا نحتاج له عونه
كفانا من الزمن غبنه كفانا كثرة الحسّاد = كفانا مجدنا الضايع هدمنا عالي احصونه
على اسبابه تفرقنا وصرنا بالجهل اضداد = شيع واحزاب تتصارع وكلٍ حط قانونه
بلا استقرار ما ننهض من الطيحه بقاع الواد= ولا نقدر نقاوم سيل هذا الوقت ومجونه
تكاتفنا يحل اشكالنا كانه نوي الارشاد = غني القوم لو يكفل فقيرٍ ثقلت اديونه
وشبابٍ عاطلٍ يلقى العمل لو صار له إعداد = لشغلٍ يمسكه وافد ولا يحتاج للشونه
ولا يا طيور عميانه تركتوا سيرة الاجداد= ومشيتوا درب باسبابه فرح بوش وشارونه
عطيتوهم عذر ندخل متاهات الزمن افراد=وطعنتوا قلبنا المثخن بجراح الوقت وطعونه
تجيزوا قتلة المسلم وتسعوا في الأرض بافساد= فوين الدين لو كنتوا تعرفوا بعض مضمونه؟
تناقض واضح في الفكر والأعمال والإسناد = تعيشوا شبه غيبوبه ودرب الشر تمشونه
جميع الشعب متنبّه ويدري فعلكم بالكاد = يخدم اللي يعادينا ولا ظنيت تدرونه
وإذا ما تعرفوا فانتم ضحايا لعبة الموساد = توجّهكم لضرب الدين واهله كيف ترضونه؟

8- السفينه لا لقت رجلٍ حكيم

السفينه لا لقت رجلٍ حكيم = قادها والموج عالي ما يهاب
لو يخفّف سرعته فهو الفهيم= عارفٍ بالبحر وانواع الشعاب
كل دربٍ لو بدى لك مستقيم = البخيص أدرى وحاسب له حساب
لا تعجّل بالحكم تصبح خصيم= للسفن اسرارها وقت الضباب
ديرتي تفخر بمن فيها زعيم= في قراراته رسم درب الصواب
يجتهد يختار مَنْ فكره سليم = للمواجب رجلها عال الركاب
ولا تبيّن وانكشف إنّه غشيم = بالركاده يسنحه ببلا عتاب
والمعادي لو نوى أمرٍ عظيم= يكسبه بالود في حسن الخطاب
كاشفٍ سرّه ويدري به سقيم = ينتظر يقفي مثل زل السحاب
خطنا الواضح على الوضع القديم= ما تغيّر يوم عن شرع الكتاب
ومن تغيّر بالتطرف من خميم= وصار ضد الدار ماله من صحاب
طوعوه اللي يبونا في جحيم = يخدمون اللي دفع كشف الحساب
انعمي يادار بالخير العميم = ولا تخافي من حصاني أو ذئاب

9- في مبايعة الملك عبدالله

نحمد المعبود علاّم السريره = من عطانا رجال تحكم بالعداله
من ذراري فارسٍ ساد الجزيره= وشيّد البنيان ساسه باعتداله
امس حنا في ذرى المذكور خيره= وابتدينا اليوم مع راع الأصاله
مرحبا بك الف شيهان المسيره= يابو متعب من سبق فعله مقاله
كل شعبك جاء يبايع عن بصيره = كلهم مستبشرٍ يا طيب فاله
خادم البيتين حنّا لك عشيره = والشعب كله يحبك لا جداله
من البحر للبحر وجبالٍ عسيره= شرق ولاّ غرب ولاّ اقصى شماله
موطن واحد كبيره مع صغيره = مملكه وحده على هدي الرساله
مرحباً مليار ماهي بالكثيره = بابو متعب من يشوف إنّا عياله
ومرحبا مليار عضده يا نصيره= ياولي العهد يمناه وشماله
ابو خالد فخرنا في كل سيره= درعنا والحصن في قو احتماله
عهدنا الميمون ما نخشى مصيره= دامكم فيّ نتفيا في ظلاله
نفتخر بافعالكم في عز ديره = ونشكر الله حكمكم ما به مثاله
الشعب لو نام بعيونٍ قريره = انتم اللي بالسهر ترعوا حواله
انعموا يالشعب بخيورٍ كثيره = وارجهنوا كل واحد في حلاله

10-هذا رفيع الشان هذا السعودي

ذا نجـم ولا بارقـات الرعــودِ = والا شهابٍ محـرقٍ كل وجـاس
اشـوف يوضي مستمر بصعـودِ = ما هاب في دربه من الجن والناس
ولا خاف من عاذل ولا من حسودي = فطويق ما هزه عواصف ونسناس
هذا رفيع الشان هذا السعودي= رمز الكـرم والمرجلة طيـر قرناس
فخر العرب واصل العرب بالوجودي= درع العقيده عزها الركن والساس
حامي حمى الإسلام ضد اليهـودي = ومن سولت نفسه على كل الاجناس
اصل الحضارة من قـديم العهـودي = يشهد له التاريخ ماهوب هوجاس
ومن يخطي التقديـر فيه الشهودي= يسأل صحارينا عن قبور الادنـاس
ومن يستغـل لطيبنـا في برودي = للصبر حد كان ظلمك من خسـاس
ومن مد يدّه صادقٍ بالوعــودي = حنا نحشمه دام للخيـر غـراس
يـادارنا حنّـا رجـال العهـودي= نفدياك بالارواح مايلحقـك باس
نخضـع لأمرك دايمٍ لك جنـودي= ولغيرك فلا والله يخضع له الـراس
إلا سجــودٍ للطيـف الــودودي= رب خلقنـا دوم للـدين حـراس
ولا من انتخيتي انتخيتي اسـودي = قبايـلٍ تاريخهـا رفـع الاقـواس
وان دندنت ابواقهم بالجحــودي = حنا رجال الجد للحرب مقبـاس
يا عزوتي يا تاج راسي عضـودي = الــدار تبغي منّكم كل نومـاس
تبـي رجــالٍ واثبه كالفهـودي = في دين في عقلٍ من العلم لبّـاس
يتجنب الـزلات يبـذل جهــودي = كـلٍ بدربـه بـاذلٍ كـل الانفاس
لاجل الوطن نعمل نغيض الحقودي = من قال ما نقـدر بليّـاه نحتـاس
ولاجل الوطن ندرس علوم تفـودي= في يوم نستغني عن الغرب الانجاس
لك يا وطن حق وعلينا السـدودي = ومن لا يسد الدين للحق بخّـاس

11- صرتي بعهد الفهد نبراس الامثالــي
poem=font="Simplified Arabic,6,white,bold,normal" bkcolor="seagreen" bkimage="" border="double,4,white" type=2 line=0 align=center use=ex num="0,black"]
يا مالك الملك تحفظ صرحها العالـي = دار بها الليث من عزمه يفاديهـــا
عشرين عام عطاها العمر والمالـي =بيض أياديه كل الخلق تدريهـــا
سحايب الخير حتى في الربع خـالي =هلت على الدار برق الفهد يحييهـا
الكل يجني ثمر من أفضل الغالــي = والكل آمن يربع في مفاليهـــــا
الفهد ساهر على شعبه ولا يبالــي = يبي المعزة لدار السعد يعليهــــا
صرنا بحال بقول الفهد وافعالـــي = خلى دياري مع النجمة تباريهــــا
رفعت راس العرب يا طيب آلفـــال = وغدا لنا اليوم هيبة من يجاريهـــا
الشعب كله أمير ومن بقى والـــي = من وين يمشي ترحب به أراضيهـا
يا تاج راسي فداك الروح والغالـي = مهما فعلنا ديونك ما نوفيهــــا
يا دار نامي بلا تفكير بالتالـــــي = عين الفهد ساهرة والنوم جافيهــا
صرتي بعهد الفهد نبراس الامثالــي = وشمس على الكون من يقدر تحديها
منهجه واضح تطور دون إخـــلال = بحكم الشريعة ولو وقته يعاديهــا
لا للتطرف ، نعم للعقل طـــــوال = الدين يسر كتاب الله يفتيهـــــا
العدل دربه فلا عم ولا خـــــا ل = يمكن يؤثر على فكره ويثنيهــــا[/poem]






توقيع الطائر المهاجر
 
تفاعلك مع غيرك يشجعهم على التفاعل معك
  رد مع اقتباس