جيـت وانتظرتِـك محل ما اتفقنـا=في ساحة الأصيل البيعرِف نضِمنـا
في روضة هوانا الوريفه انتظرتِك=معاي القمـاري البتحمِل وشِمنـا
هي ظلّت شهيدنا البيحفظ عهودنا=ويغنّي ويقوقي ويدوزِن إسِمنــا
تصفِّق جناحها وتهِشْ في وِشيشنا=تصـابِق خُطـانا وتلطّـف نسيمنا
رجـيـتِك مأمّل أقـابل ابتسامتك=وأقالــد الحنان البفيض من عيونك
أسافِــر بعيد في نضارة وجيهـك=واداعــب الـورود البِتشبه جِفونك
ادنــدن واعيــد الغناوي الحنينه=أقلّـِب دفاترِك وأعيش جوّه كونِك
محـل ما اقبّل أقابـل صباحِــك=أذوب في هواكي واغوصك واكونِك
أكــون الأراضي البتحضن جذورك=وأكــون السماد البنضّر غصونِك
اعِـدّ الثــواني البطيئـة البتحبــي=وأخــاف من غيابك يفتّق جروحي
أهيــم في طيوفِـــك وأقرِّب أغبّي=واعـــودك أعــدّل مظنّة جنوحي
أفتـّش وأنقــّب واقلــّب معاجـمي=تفــرَّ المعـاني وتتوه من شِروحي
أردِّد صداكي البكــورك وينـــادي=ألبــّي وأجيــكي وأحقِّق طموحي
أفــارق خيالـك واقابـلك حقيقـه=واخـــاف من تمُرّ الثواني وتروحي
الخميس 28 /10/2010م