يقـولون الشهر روّح واقـول إنّه بقى ليله = بها ينزل إله الخــلق يسمع دعـوة الداعي
نـزل فيهـا كتـاب الله بمحكم آي تفصيله = على سيد البشر للناس ينقذ جهـل الاوضاعي
سـلامٍ طول ذا الليـله ونورالله يوضي له = ومع الاصباح شمس الكون نورٍ دون اشعاعي
الا وينـك ياعبد الله كفـاك العذر والحيله = ترى فرصتك هالليـله مدام إن العمر ضاعي
تعـال وكمّـل صيامك بتكبيره وتهـليله = تعال اطلب من اللي باب رزقه مشرع اشراعي
تعـال وكفّـر ذنوبك كفى بالنـوم تطويله = تعال اقرب من اللي ما يبيك لزود الاطماعي
ترى دنياك لو ضحكت وموتك طال تاجيله = مصيرك راحل عنها ذهاب ما به ارجاعي
الى دنيـا الخلود وكل من يرحل وتحصيله = الى الجنّه او النيران بـلا جـاه ولا اتباعي
حبيبي طـالت الغربه علينا كم مضى ليله = وكم نحزن على الأمّه تعـاني كسر الاضلاعي
نبي نصف القمر يظهر نبي حـلم وتأويله = نعيش الـوقت في ذلّه فمجروحٍ وملتاعي
تحاصرنا جيوش الكفـر توراته وانجيـله = ويتعبنا الجهل بالدين وفكرٍ زادنا اوجاعي
انا ما همّنـي طيـرٍ يحسبه من ابابيـله = انا همي بصقـارٍ يدز الطير لافزاعي
خـدع طيره بلبس الدين يستر بعض تضليله= وزاد الجهل فرقتنـا لاحزابٍ واشياعي
كفانا ما حصل منه كفـانا طول تدجيله = كفانا راسنا بالارض كفانا كذب وخداعي
غدينـا كلنا نطـارد من افعاله واقاويله = مسمى ارهاب يطردنا ولا نملك له ادفاعي
حبيبي ابتدا شكّي ولو هو صعب تدليله = ولكن من مواريها اشوف الشك له داعي
احس انا ضحايا جهل باللي دوم يوحي له = اخافه يخدم العادي ولو هو بالعقل واعي
يبي تفريقنا نقتـل بعضنا بفعـل تمثيله = ولا يكفيه ما جانا من الحقران واخضاعي
فنهر الـدم يجلب دم اذا منّه بدا سيله = يشيل الكل في دربه بلا تمييز للقـاعي
الا يالله تنصرنا على من طـالنا ويـله = وتكشف دين من حطّـه وسيلة ستر وقناعي