[الطائر المهاجر]

صديقى عرفته الى ما لغطته = وأميز عدوي وفيهم وسايم
حجاجه وعينه لمثلي دليل = وغبى المعرفه فلا هوب فاهم
أعرف الدروس وكل الرموس= وادل الموارد بليا علايم
ولا فاتني كل أمر بغيته= محلي تعلى متون النعايم
أقول النصائح واعد الفضايح = عن اللي فعلها ولا اخاف لايم
ترى بالعذارى سواة المهارى=جنان تجارى على الشوق دايم
وفيهن ملايح وفيهن كلايح= نسمهن بوجهك سواة السمايم
وانا حرت يابوك بين العذارى= وصرت بينهن مثل بايع و سايم
ذي ما تبيني وذي ما أبيها=وذي ما توافق وذي ما تلايم
الى صار ذي حالتي يا مجلي= فخذ علم عودا لما قال عالم
أيا عاشق كل عذرى مليحة=هنوف غنوج بخدها رقايم
نظرها كحيل وقرن(ن) طويل= وخصر(ن) نحيل له الردف قايم
ومزيت ريقه عسى ما يفيد= واغضبت ربك بهتك المحارم
ولا تحسب الخير درب الفساد= وولف البواغي وركب الجرايم
ووصف المحابس وزين الملابس=وكبر العصايب وكسع المحارم
ترى الخير في راسيات الجذوع= الى دلبحن السنين الحطايم
غنين ظليله يطرب مقيله= وسمعك تمتع بصوت الحمايم
تحفظ حلالك وتفرح عيالك= ويكثر نوالك بيوم الصرايم
بهذا الزمان يبين الصديق= الى بار فيها ردي العزايم
ومن لا يميز صديقه وضده= فهو ثور هور يبي له ردايم