لما طحت يلعب بي على كيفـه القولـون=من العام علمي بالوناسه شهـر شعبـان
ابي كاف ودروبي حدتني لحـرف النـون=وانا خابره ترضـخ ولا تعلـن العصيـان
لو ان الذهب بالقاف نملك ذهـب قـارون=فطوري ورى لندن ونومي ورى اليابـان
ولا قيل ابن غسلان تال الشهـر مديـون=او انه عجز يشري مثل موتـر الجيـران
اصب القوافـي دون فلتـر ولا سيفـون=سبب جمرتن تقدح بجوفي مثـل راكـان
تروس الحشى تبرم سيوره على البنيـون=بصدر طفح قافه مـن الهجـر والحقـران
اذا وافق الوالي رفض حضـرة المـاذون=تصعفق على قلبن عشيره ورى السلمـان
رموش المها فتنه وقلبـي وقـع مفتـون=وجرح الهوى يمرض وقلبي وقع مرضان
انا خفت من فرقى حبيب الحشى المزيون=ولاينفع الخايـف مـلاذه ورى الوديـان
غدت حالتي حبه علـى جمـرة الغليـون=الاقدار حطتنـي علـى سكـة الحرمـان
ولكنها صـوره تجينـي علـى الكربـون=وجرح امس مثل اللي قديمن نزيفه بـان
اذا بان زول اللـي تـلالا بـلا صابـون=غنوجن تفوح عطور جسمه تقل ريحـان
كما الريم في روضن ربيعه تجيه مـزون=ربيعه من امطار السحايب كسى الجيـلان
ذعاذيعها تنعش حشى الخافق المشطـون=وبدوانها ساقت لها الطـرش والرعيـان
اذا شافني سالي رجع يمشـي الطبلـون=ومع سرعته مايخطي الـدرب والعنـوان
قعد يقصف قصور السعاده تقـل مجنـون=ولا اقدر على صد القذايف عن الجـدران
واذا طحت من ناره وقلبي وقع مطعـون=تبسم وقال اقعد على الضيـم يالغسـلان
الله عليك يالغسلان
صغتها واحكمتها وتفننت فيها
قافية طيبة من طيب جزل
عاش الأبداع المستمر مثل الماء المنهمر
لاهنت وشكرا لك عيني