[الطائر المهاجر]

مع مرشد البذال

أوصيك لاتبحث سدود المغيبــين =ولاتجهــــــر اللي غارقن بغفلاتـــه
ترى النميمه تمحق الرزق والدين =والمنـزل العالي تهدم اطبقاتـــه
لاتحسبن أهل الظليمه بخيتـــــين =كلـــــن يوافق ما عمل في وفاتـــه
وانـذرك حق الضعيف المسيكين =اللي علـــى حقــــه يهـل اعبراتــــه
ترى الضعيف الليا غدى الليل ليلين =يدعـي وعند الله توافق ادعاتـــه
الظلم فان الظلم يفنى السلاطين =ياويــــل راعي الظلم من مقبلاتــه
وانذرك عن ربعة رخو من هياسين =اللي سوالفهــــم بــوده وهاتـــــــه
ويا عبيد الأقشر لوصفا لك نهارين =نهــــار ثالــث جاك يرفع عصاتـــه
والله عندي ربعة الناس الأقصين =ولا صديقـــا يبلشـك في حياتـــــه
ترى الرجال ابهم فهود وحياويــن =جاك الكـــلام اللي صحيحـا ثباتـــه
ان كان ما تدري ترى الناس دراين =الرجل مدحـــه بالمجــالس طراتــــه
رجلـن تعلــق به رجالــــن مسلمين =عز الرفيـــق ولابتــــه والحماتـــــه
ورجلن تشوفه جسم وعيون ويدين =ولولا الشعـر ما تفرقه من خواتـــه
كم واحد بالبيت يضرب بسيفين =وأن جـاء حزم كلاب قبع عبادتـــه
والحلم عن الغيض ينجي الشياطين =يكفيك شر إبليس هو و دحراتـه

الصدق له مع سايد الحق مطلاع=والكذب له مع غير يمه مطاليع
كم واحد مغريه رايه ولو ضاع=في خاطره عنده لمن ضاع تسنيع
وكم واحد للي يشيرون مطواع=للي عطاه الراي ممنون ومطيع
قلبه ليا شاروا هل العرف سماع=أخذ من الأريا ثمرها بلا بيع
وكثر التجارب درس والدرس نفاع=فيها لذربين الرجاجيل ترفيع
احرص على ربعه شريفين الأطباع=لوهم من الأجناب فيهم منافيع
كم نازح يشرى والأقراب تنباع=بيعة رجا ماهيب بيعة تقاطيع
لاتستوي بالغيض صارم وجزاع=على رفيق شفت منه التواجيع
لاعاش من دايم على الربع صعصاع=ومقطع جيبه يدين الفراريع
وان طعت راي اللي درس كل الأوضاع=الميز هو مصراع كل المصاريع
رجل بلا ميز ولو طال له باع=يضيع افعاله من الجهل تضييع

دنياك

لـو تعطيـك زيـن المعوشـه=تالي سوالفهـا تعـود علـى مـاش

الرجال طيور توصـف للحـرار=كـل طيـرن فـي جناحينـه يطيـر
وين طير يحتريلـه كـل جـار=ويـن طيـر مايصيـد إلا الشعيـر
لو تقول إن الشجاعـه بالطيـار=كان فضلنـا القطـاه بمـا يصيـر
وين طير وإن هوّا شق الستـار=وين طير يذعـره صـوت الصفيـر
النداوي له على الصيـد إقتـدار=والحمامـه بالمـحـل وتستـديـر
ربعة الطيـب تزيـدك بإنتصـار=ترفعك رفـع العمـد بيتـن نظيـر
والردي عرفه مثل بيـر هيـار=تنقبـر فيهـا ويدفـنـك الحفـيـر
لا ترابع واحـدن بالعهـد بـار=وإن وفى لـه مـرة خيـره كثيـر
التجارب خلهـا لـك مستشـار=لاتبي غيـر التجـارب لـك شويـر
والرجال إبهم فهد وإبهم حمـار=وأنت فكـر بالفهـود مـن الحميـر
وانت في دورك عليك الدور دار=لاتحسـب إنـك مخـلا يالفقـيـر
وقر العالم وتلقـى لـك وقـار=وإن حقر حقرت لـوك إبـن أميـر
والشرف لايستوي فيـه إنهيـار=الشرف هو مقضب السيف الشطيـر
والقناعة مرجلة والضعف عـار=وأطلب النجدة مـن الوالـي القديـر
لاتجي للنـاس طلباتـك إكثـار=كـل ديـوان تجـي يمـه مغـيـر
ما خبرنا بأهل الشحـذه تجـار=غير فقره كـل نفـس لـه تعييـر
خل عز النفس للعـوره ستـار=لو فراشك في طرف بيتـك حصيـر
الكريم معان والفـارس مجـار=مـدّي الواجـب ونطـاح الذخـيـر
الغنـى بالـذل مذمـوم مـرار=والفقـر بالعـز لأمجـادك يثـيـر
طربة الدنيا مثل لعـب القمـار=لو جمعت المال شفت تالي المصيـر
لو جمعت من الذهب حمل القطار=عند نزح الروح ما أنت بي له دبيـر
صار بين الوارثين بـلا مشـار=ينعزل حـق الكبيـر مـن الصغيـر
واهني اللي مشى طلـق شكـار=سالم من ظلم عمـر ومـن عميـر
لوّه بالدنيـا بحالاّتـن إعسـار=يرتجـي بالآخـره فرحـة نظـيـر

لاخيـر فـي جيـلٍ يلفّـق تلـفّـاق=الجيل عنـوان اهلـه فيـه ملـزوق
والنـاس كـل لـه تعابيـر واشـواق=والهم على الطامع مشاريـه وحقـوق
وليا اشتبهنـا مصـدر الحـق فـراق=الحـق لـلأول بـلا شـك وارهـوق
من حسب الدنيا علـى جبـر ودقـاق=ماطاب عيشه لويحوّق الذهـب حـوق
ماضاع حرفّي علـى السفـن حـدّاق=ولادام من عد الذهـب وزن وعـروق
والبخـل مايغنـي ردييـن الأوفــاق=كثيرهم ثوبه علـى المتـن مشقـوق
لو تشنقه ما ادرك ثمن موس حـلاق=إن كان ما حدٍ خلصه مـات مشنـوق
والجود مايضعـف زكييـن الاعمـاق=اللي عن الزابن دفـع منهـم السـوق

أوصيك لا تبحث سـدود المغيبيـن=لا تجهـر اللـي غـارق بغفلاتـه
ترى النميمه تمحق الرزق والديـن=والمنزل العالـي تهـدم أطبقاتـه
لا تحسبن أهل الظليمـه ابخيتيـن=كل يوافق ما عمـل فـي وفاتـه
وانذرك عن حق الضعيف المسيكين=اللي علـى حقـه تهـل اعبراتـه
ترى الضعيف اليا غدا الليل ليليـن=يدعى وعند الله توافـق ادعادتـه

يالقلب انا ابهدي عليك النصيحه =هرج القفا بالك تحطه على البال
ما اشوف به كود العنا والقميحه =من بين غادين الجدا قال ما قال
ناسٍ يحسبون النميمه مديحه =وهي توصف من خبثات الاعمال
زلة صديقك لاتجي لك نحيحه =لو كان عايل قل حشا اليوم ما عال
عزه عن الهكمه وزين سميحه =خله على وجه البعيدين رجال
ماكل نفسٍ من عناها مريحه =لابد ما يبدي لكم بعض الاحوال
ليا بدت بعض العلوم الصحيحه =كل ذكر مجناه من حيث يحتال
احدٍ تنجا حقته من نطيحه =واحدٍ يورى للشريعه وما قال
رجلٍ بلا ربع سوات الذبيحه =تطاه شمطان اللحى وطيت نعال
الشر تحدثه الوجيه الوكيحه =سبة هبيلٍ تبتلش فيه عقال

كان الكلام من المعادي على هـون=بعض المسبـه بالمجالـس مديحـه
تجيـه عربـانٍ مـن الله يخافـون=عن الظليمـه ينصحونـه نصيحـه
لو كل خلق الله على الحق يمشـون=كان القلوب من الخطـا مستريحـه
كم واحدٍ بعروض الأجواد مفتـون=وهو سلومـه يفضحنـه فضحيـه
وكم واحدٍ يطعن وهو فيه مطعـون=يذم ريح النـاس والشيـن ريحـه
بعض كلام الناس تهمات وضنـون=قـولٍ تنميـه الوجيـه الوقيـحـه
الظلم لو فازوا هلـه مـا يدومـون=راع الظليمـه لاتباطـى مطيحـه
والناس هذا الناس من عصر ذالنون=كلن على دربـه ركابـه مشيحـه
مقرود يامن بـدل اللـون باللـون=بعض الكلام يحرفه عن صحيحـه
والصدق هو والكذب ماهو بمقرون=كان إنها تـدرس بلهجـه فصيحـه
مايمدح الرجـال بالشكـل واللـون=إبحث معه لينك تعـرف القريحـه
تراك تعرف عنه وأنتـم تهرجـون=يبين لك من كـل جـودٍ نضيحـه
المستريح اللي من الشـك مامـون=مع كل خلـق الله علومـه مليحـه
كم واحدٍ حيٍ لـه النـاس يثنـون=وإلا توفـى قـالـوا الله يبيـحـه
وكم واحد لو هو باالألحاد مدفـون=ذكراه عند الناس بيضـا صفيحـه
وكم واحدٍ يجمع ملاييـن وخـزون=مـالٍ تنميـه اليديـن الشحيـحـه
لا تشكره رملى ولا فـك مديـون=ولا حل مشكلة النطيـح ونطيحـه
ولا له على جاره من الفضل ماعون=لو إن جيرانـه تشـوف الذبيحـه
وكم واحدٍ جيران بيتـه يحمـدون=للجـار ريـف وللجماعـه منيحـه
وكم واحدٍ منه العـوادي يخافـون=زبن المخيف اللي كثيـرن فحيحـه
ربعه نهار الضيـق فيـه يتـذرون=لا جا نهـارٍ فيـه لجـه وصيحـه
وبعض الرجال بهم شريفين وعفون=كلن علـى ماقـال يرجـع لكيحـه
وبعض الرجال بضحكهم يستغلـون=يجيبها مـن نـوع زلقـه بطيحـه
هذاك بين له من الهـرج مدفـون=خلـه إلا شافـك يزيـن سميحـه
الهرج لـه نقـال والـرد للشـون=مزح الجزع يثر بكبـدك جريحـه

من لا يحوش باول العمر طوله=تالي شبابـه صعـب التبديـل
من فات عمره ما مدح بافعاله=قعد بوسـط الطيبيـن رزيـل

العباثه والجهـل مـا فيـه خيـر=الهدايه نـور والجهـل اظلمـات
ما يصير ان العمي مثل البصيـر=اسمعوني يـا القلـوب الواعيـات
العمي ما هـوب عيـان النظيـر=كم عما قلـب اعيونـه صاحيـات
لو تشوفـه شايـب وسنـه كبيـر=يمكن افهم منه ابو عشر سنـوات
ون نشدته قال مدري وش يصيـر=مـا درا بالماضيـه والمجبـلات
والليالـي لـو تديـر وتسـديـر=ما يثبت وين راحت ويـن جـات
والشرف ما ينحقر عنه الصغيـر=كم اصغار ينطحـون الموجبـات
كم صغير يجتـدي فيـه النشيـر=وكم كبير صار من عرض الخوات
لا تقـول ان المراجـل للنضيـر=ما يفيد النظر كـان القلـب مـات
ولا تقول انـي غنـي ولا فقيـر=استعبري يـا النفـوس الموهبـات
ما لك الا ما كتب لك لـو تطيـر=الوهايـب بالجبـيـن امقـيـدات
والقدر وان حل ما يفيـد الغريـر= لو علي بابـك اقفـول امغلقـات
المنايـا مـا طـرش لـك نذيـر = وغـارت الدنيـا توجـه بغفـلات
مـا تعلـم ويـن نيتهـا تغـيـر= عند ما تدرون هاك الفعـل فـات
ماذكـر ايحـول للدنيـا عشـيـر= ولا صفت لاحد علي طول الحيات
واحد تعطيـه مـن غيـر اتغديـر = واحدن تسلـب اثيابـه والعبـات
اللسان اهو اكبر الشـر الشريـر=كم كلام صـار شبـة مشكـلات
والحيـا والمرجلـه درب عسيـر=وجتناب النفس عن كل اشهـوات
لا تطيع النفـس وابليـس العثيـر=ارجم الشيطان في سبع احصوات
كان طعت ابليس خـدرك تخديـر=حط في عنقك اعقـود امبرمـات
الرجال اشطار كان انـك شطيـر=كان الك دوره لهم سبـع ادورات
لا تقول اسبق علي العـد الغديـر=(ان جهمت اركاب غيرك ساريات

لو كل من قال المثايل عسفها=ماصار نقص(ن) بالمعاني ولا زود
والبندق العوجا تجنب هدفها=لا صار منظرها عن القطر مصدود
وغاية جميع الخلق محد(ن) عرفها=رضا جميع الخلق ماهو بموجود
لاشك تدي كل نفس(ن) نصفها=وترى كلام العدل يظهر له اشهود
من رابع العقال نفسه صرفها=عن تيهة(ن) يشقى بها مابها فود
اسمح عن اللي تيهته ماعرفها=يمكن يرد ليا لقى الدرب مسدود
ماكل اجاويد(ن) تبعها خلفها=لابد مايخلف حمد سيرة احمود
كم واحد(ن) يمة جدوده نسفها=على الشمال ورد مع دربه اردود
درع بأمور(ن) مانشد عن كلفها=وكدّر سماه وصار بالجهل مزيود
نفسه غضب غيره لعب في شرفها=اصبح بخيت(ن) لابس(ن) ثوب مقرود
كم واحد(ن) ربعه يعدل عجفها=من حشمته صاروا مشاكيل وفهود
عنهم مهمات الأفاعي كتفها= محد(ن) يجيهم بطش والحق مريود
دنياك بالغفلات يضرب طخفها=لمحة بصر ماله سنا برق وارعود
غدارة(ن) لو ضحكتك بطرفها=تراك عقب الضحك ببكاك ماعود
ان اقبلت قامت تمشط ازلفها=هنوف عرس(ن) طيبها المسك والعود
وان ادبرت شفت الكدر من حرفها=تمسي تسيد وتصبح الصبح مسيود

واحذر تصير لمن وثق فيك خداع=ترى أقشر الحالات حال الخداديع
الخدع لو راعيه بالزود طماع=تراه مثل زراعة مالها ريع
من طاب لك بالمد قدم له الصاع=ولاتفتخر كانك تعرف المواضيع
الصدق له مع سايد الخلق مطلاع=والكذب له مع غير يمه مطلايـع
كم واحد مغرى برايه ولو ضـاع=في خاطره عنده لمن ضاع تسنيع
وكم واحد للي يشيرون مطـواع=للي عطاه الراي ممنون ومطيـع

ماكتب بالألواح . . ماهوب ممسوح=اليوم هو توضيح . . عطب الجرايح
من عاش بالأفراح . . لابد من نوح=ساسٍٍ بلا تسليح . . خطر اللوايح
والعقل هو مفتاح . . بيبان مصلوح=وينزحك تنزيح . . عن كل سايح
عن ربعة السفاح . . يالقلب منصوح=لاتتبعه وتطيح . . ما به ربايح
مثلك ليا من طاح . . خلاه مسدوح=أترك ردي الكيح . . زين السنايح
زبن الرفيق شناح . . بالطيب له نوح=من ورد عين السيح . . عاف الضحايح
نفسه على الأمداح . . قد شاحها شوح=ذكره مع أهل الفيح . . وأهل البرايح
خله وراك سناح . . عن كل كاثوح=ينجّحك تنجيح . . رجل المدايح
كانّه بكرب شباح . . للضد ذرنوح=صميدعٍٍ زحزيح . . عطب الجوايح
ليا عدّي المياح . . في جانب الصوح=كان الروّي تشنيح . . للدلو مايح

ترى

المرجله حمل(ن) تشيله لحالـك=وإلا السفـاه إبليـس عـنـك يشـيـل
يرقص قدام وجهـك ويمـدح فعلـك=ويـعـاونـك ياخـيـبـة الـزمـيـل
لعين(ن) يوصلـك المهلـك وينثنـي=تقعـد بمظـمـأ مامـعـك صمـيـل
من طاع شور إبليس والنفس والهوى=عاف النهـار وحـب مسـرى الليـل
من لا يحوش بأول العمـر طولـه=تـالـي شبـابـه صـعـب التبـديـل
من فـات عمـره مامـدح بأفعالـه=قـعـد بـوسـط الطيبـيـن رزيــل
المرجلـه فـي كـل فعـل طيـب=فعـل يصـيـر لصاحـبـه قنـديـل
أشر الحيا والعقـل والحـق أمشـه=وعلـى حـقـوق الـنـاس لاتعـيـل
من داس قدر الناس داسو كرامتـه=يجـيـه سـبـع نـكـلـه تنـكـيـل
بعض الرجال إذا حضر في مجلس=جالـه بوسـط الصامتـيـن صهـيـل
ماهو صهيل حصان من زود السطر=صهـيـل عـيـر شـايـل جـلـيـل
متهـزي بالنـاس وهـو الـهـزوه=ولا يختشـى مـن خبـقـة الزبـيـل
لو تنصحه مايعتبـر فـي كلامـك=فـيـه الهـبـال مخـيـم ومحـيـل
وبعض الرجال إذا حضر فزوا لـه=شوفـة شـرف ومشـاهـدة جمـيـل
إذا نشدتـه جـاك زيـن أعجوبـه=مثـل الحليـب مقنـد فــي هـيـل
وإن مانشـد خـلا كلامـه عنـده=ولايعتـرض للنـاس فــي سبـيـل
قصرة لسانـه مـن شكالـة راسـه=وإلا بــدرب المرجـلـه حلـحـيـل
وترى كبير النفـس تكـره طينتـه=مــرد راعــي الكـبـر للتسفـيـل
إذا حصـل ثـور كبيـر راســه=يشـيـل كـبـر ولا وراه حـصـيـل
إذا قعـد وسـط الرجـال مزلغـم=وهرجـه يرتـل هرجـتـه ترتـيـل
يغتـر فيـه الأجنبـي وإن شافـه=واللـي يعرفـونـه تــراه دحـيـل
ينوي مناوي الحـر وهـو البومـه=يبـي يصيـر الـراس وهـو الـذيـل
ترى الكذب عذروب الرجال وعارهم=راعيـه لا يجـزع مــن التفشـيـل
شاهد على شي(ن) وهـو ماشافـه=ومصـور هــرج وهــو ماقـيـل
هـذاك بالدنـيـا كبـيـر عــاره=وبالآخـره فــي حـامـي الملـيـل
راعـي الظليمـه ماتسـرك حالـه=حـتـى الشفـاعـه عـنـه تستقـيـل
واللـي قتـل نفـس بغيـر السنـه=تــراه يـاقـع مثـلـهـا قـتـيـل
وإن طال عمره من قـرادة حظـه=حسابـه قــدام ماينـفـع التمهـيـل
وترى العطا من غير حاجه ضايـع=مثـل دفـق مـاء بالتـراب يسـيـل
إذا صار معروف الأثنيـن مماطـل=حـيـال وإلا لــك وراه شـغـيـل
لا يربح الطالب ولا أجر لمن عطى=بالباطـل مابيـن الأثنـيـن عـزيـل
ياراعـي النعمـه تحمـد ربــك=لا تحـسـب أن اليـسـر مستطـيـل
لاتأمـن الدنيـا تـراهـا مـغـره=هنـوف تعاشـر كـل وقـت خلـيـل
تفتـر بيـن إقبالـهـا واقفايـهـا=فـر الهبـوب الصـلـف للكتـويـل
أحـد تزيـن لـه مبـادي وقـتـه=وأحـد عليـه بـلا خـمـال تعـيـل
أن أقبلت نم حـدر جـذع النخلـه=وعليـك العثـوق المرطبـات تمـيـل
وأن أدبـرت لا تعتبرفـي قـوتـك=لـو أن حيلـك مثـل حـيـل الفـيـل
تـراك لـو أنـك شجـاع صامـل=تصيـر مـن جـور الزمـان ثعـيـل
واصبر اذا مسك مـن الوقـت شـده=تــراه ماينـفـع كثـيـر الـويــل
والصبر موعود بالأفـراج صاحبـه=ولا شــده إلا عقـبـهـا تسـهـيـل
ولا تفضي أسرارك على كل صاحب=إذا صـرت ممـا صايـبـك علـيـل
تغتر في رجـل(ن) قبـل تجروبـه=تخمـل علـيـه بهقـوتـك تخمـيـل
وهو مايقـر العلـم بيـن ضلوعـه=إلا ان يـقـر الـدهـن بالغـربـيـل
تـراه للعـدوان ينشـر سرايـرك=والسـوء علـمـه للمـعـادى تـيـل
بعض رجال الوقـت هـذا مغـره=والـلـي تومـنـه الـسـدود قلـيـل
أيضـا إذا رابعـت رابـع طيـب=كـد بـأن فعلـه مثـل نجـم سهيـل
تـرى الرجـال يطالعـون قرينـك=دايــم علـيـك عيونـهـم دربـيـل
إن مانجحـت بعينهـم مـن فعلـك=والا حسبـت مـن الحـمـام دويــل