يالله يــا مــن لــه العـربـان يـرجـون
ياحـي يـا والـي علـى العـال والــدونْ
يـا عالـمـا ســري ومــا كــان مكـنـونْ
يــا مـخـرج الـمـا مــن سـحـاب ثـقّــال
يــا خـالـق الكونـيـن يــا حــي بـاقـي
يا اللي خلقت العـرش سبعـا طباقـي
فيـه القمـر والشمـس تشعـق شعـاق
والنـجـم ثـاقــب فـــي لـيــال طـــول
يـا مـن خلقـت لمـا علـى مـزن سـبّـاح
يـسـيــر مــــن دارالــــى دار نــفّــاح
مـالــه جـنــاح الا تمـشـيـه الاريــــاح
فــوح العـوالـي والـصّـبـا والـشـمـال
يا من خلقت الارض واجريـت الانهـار
خلقتـهـا وانــت عـلـى الامــر قــدارْ
واخرجت منهـا رزق مـن كـل الاثمـار
كـرامــة للـعـبـد مـــن كـــل حـــال
يا من خلقت آدم مـن الطيـن واحيـاه
بنيـت جسمـه لـيـن سـويـت مبـنـاه
وزرعــت روحــه بـيـن دمّــه ولحـمـاه
جلّـيـت فــي قـدرتـك يـــا ذا الـجــلال
وخلقـت حـوّا حـالْ مـن جـسـم حـالـه
خلقتـهـا واخرجـتـهـا مـــن شـمـالـه
وجعلـتـهـا زوجـــة وحلـلـتـهـا لــــه
جـمـعـت مـــا بيـنـاتـهـم بـالـحــلال
واخرجت منهم ناس خلقٍ بعـد خلـق
ذريتهم في الارض من غرب الى شـرق
الاصـل واحـد والنسـب بينهـم فـرق
والـكـل عــن شـرعـه ودربــه بـســالِ
يا اللي خلقت الحوت في بحـر ظلمـات
محبوس فـي الغبـة ولـه رزق مـا فـات
من حيث ما يمسي ومن حيث ما بات
يـلـقـى نصـيـبـه جـــوف مــــاءٍ زلالِ
يـــا رازق الاوحـــاش فـــارضٍ خـلـيّـه
لا مـــــال يـغـنـيـهـا ولا مـمـلـكـيّـه
ولا درت بـالــرزق فـــي ايـــات نـيّــه
رزقتـهـا وانـتـه عـلـى الـكـل والـــي
هذا ويـا راكـب علـى وسـق منسـوب
حـرّ ليـا مـا حثّـه الـصـوت مـرعـوب
يشدي لصقر خيل الصيـد فـي الجـوب
لـــم جنـحـاتـه والـضَّــرَم بـالـعـجـالِ
والا يـشـادي مركـبـا هـبــه الـفــوجْ
مدوا شراعـه وانعـدل مـا مشـى روجْ
مـاتـاه فــي الغـبـة ولا صـكـه الـمــوج
اســرع مــن الـبـرّاق فــي الاعـتــدالِ
حـــرٍّ مـنـسّـب وافــيــات عــــدوده
تسعـة جـدود اللـي حسبنـا جــدوده
مـربـاه خــد يـرتـعـي فـــي نـفــوده
دونــه ( عتيـبـة ) مفْرقـيـن الـسّــلالِ
مشعل حسن كا لقوس فـي عـود خـلاَّن
مــذرَّجَ الاحـقـاف مـفـتـول سـيـقـان
ولـــه وروك كـنـهـا الـــواح بـيـبـان
مكبوس زابر مـن حيـا الصيـف كالـي
نابـي المتـن فـجَّ النحـر شـف عشـنـاق
لا هــو بصـلـفـوقٍ ولا هـــو بمـصـفـاق
ولـيـا طــرح راســه كـمــا راس زرَّاق
دايـــم وركَّـابــه عـــن الـهــم خـالــي
فوقـه شـداد مثـل صـقـر القرابـيـس
شـرا عقيلـي شاغلينـه هـل العـيـس
فضـة ملبَّـس قيمتـه ( يـوز سكّـيـس )
ولـو كـان ( بكّـي يـوز ) ماهـو بغـالـي
بيِّـتْ ونـوِّمْ واعقـلـه بالـمـرس خـمـس
حيثه جفول ومحتـذر مـا يبـا اللمـس
خلـه مكانـه ليـن تبـدي لـه الشـمـس
وانصـا الملـوك اهـل الكـرم والنوالـي
والختم صلـى الله علـى ساكـن الشـام
عــد الشـجـاري والثـمـاري والايـــام
وعـداد مــا خـطـوا حــروف بـالاقـلام
عـلـى النـبـي طــه بـهــيّ الـجـمـالِ