الجزء التاسع والثلاثين...
دخل خليفه قاعه المحاظره والكيس في ايده...اول ماشاف هند نزل راسه وسار مكانه ويلس ..اخر المحاظرة بيتفاهم معاها.. اما بخصوص هند..اول ماشافته فزت ..ويوم انتبهت للكيس اللي شالنه عرفت السالفه..واستبشرت بشر...
اخر المحاظرة صد خليفه صوب هند اللي قاعده تلم كتبها...نش وسار صوبها...
خليفه: السلام عليكم...
صدت هند وربعها لخليفه....وخلت هند كل شي من ايدها ووقفت على عكازها..
هند: وعليكم السلام...شحالك خليفه.؟
خليفه: الحمد لله ...شحالج انتي.؟؟
هند: احسن عن قبل الحمد لله...كل عام وانته بخير..
وابتسمت ابتسامه حلوه...عل وعسى يلين شوي....بس خليفه ويهه اعتفس اكثر...
خليفه: وانتي بخير..هند اباج فسالفه...
هند: آآآ..بروحي..؟؟؟
تلفت خليفه لربعها اللي قاعدات يتسمعن كل كلمه وصد صوبها...
خليفه: مش مهم...
بس ربعها فهمن التلميح..وشلن اغراضهن وطلعن...وشوي شوي بدت القاعه تفظى الا منهم...
هند: خير خليفه..؟؟
خليفه: احم...خير ان شاء الله... هند مشكوره عالهدية..والورد... بس ماقدر اقبلها ..
ورفع الكيس وحطه فوق كتب هند...
تابعت هند حركاته وهي متظايقه...
هند: ليش.؟؟؟
خليفه: بس...اعتبريها وصلت ..لكن ماقدر اخذها...
هند: بس انا اهديتك اياها من خاطري...!!!.. حد يرد الهدية ياخليفه..؟؟ مابتاكلك الا ساعه ..
خليفه: هند...انا مب راعي هالسوالف... بعد فتره بسيطه برد الامارات ولا بتشوفين رقعة ويهي موليه...حق شو تهديني وتبلين عمرج بي..؟؟؟
ابتسمت هند..
هند: وانا عشان جي اهديك هدية...لانك بترد البلاد...
عقد خليفه حياته مب فاهم...وكملت هند..
هند: الناس للناس ياخليفه... وانا اهديك هدية بس عشان تذكرني بها...مجرد زميله كانت تدرس وياك ..ونسخت لك محاظرات فغيابك..وساعدتها فيوم من الايام...
وظحكت... وابتسم خليفه غصبن عنه..
خليفه: بس انا مب متعود اتلقى هدايا..كيف عاد اذا كانت من بنت...!!!..ماقدر يابنت الناس...بس والله مشكوره ولفته طيبه منج...
هند: انته من شو خايف..؟؟؟... اني اتبعك مره ثانيه..؟؟ اطمن خلاص فهمنا الرساله...
خليفه: مب هذا القصد والله....
هند: اوكي..شو رايك تاخذلي هدية لي انا بعد عشان اذكرك فيها ..وجذي بنكون متعادلين....!!
خليفه: نعم.؟! ..وشو عرفني انا بهدايا البنات...؟!
هند: ههههههه حيالله شي.... عشان اتذكر خليفه اللي كان يدرس فامريكا... لاني انا بعد برد الامارات بعد التخرج...
انصدم خليفه....وبين هالشي على ويهه....احين انا متحمس ارد الامارات وسبب من الاسباب اني ببتعد عنها..تقوم تلحقني لين هناك...؟؟..الله يستر... ظحكت هند على ملامح ويهه.... ورفعت ايدها اليمين تراويه صبعها..
هند: الدنيا صغيره ياخليفه... في نفس الفتره اللي رحت فيها الامارات..يوا ناس من الامارات نعرفهم وخطبوني...وبعد التخرج بنرجع كلنا الامارات عشان العرس...بودع امريكا خلاص.... ومنو يعلم..يمكن نتلاقى في الامارات بالصدف...!!
ارتاح خليفه من هالخبر...وحس ان التهديد زال...والبنت ماتعني غير الصداقة والزماله لاغير..يعني مطرشه الهدية عن حسن نيّــــه...!!
خليفه: انخطبتي..؟!!!!!
هند: هي....
خليفه: مبروووووك...سمحيلي ماكنت ادري..
هند: وكيف بتدري بالله...؟!.... الله يبارك فيك... المهم لا تزعلني منك وترد الهدية...صدق اباك تاخذها لاني شريتها لك...
ماحب خليفه يردها لانه اطمن من حسن نيتها....
خليفه: على شرط اردها....
هند: غصبن عنك تردها ههههههه...اتريا هديتي...اباها حلوه وتستمر على طول عندي...
خليفه: هههههه تتشرطين بعد..؟؟ المهم مشكووره مره ثانيه...مابعطلج اكثر من جي...والله يوفقج ان شاء الله...
ابتسمت هند بفرح...كان واضح ان خليفه بالنسبه لها كان مجرد اعجاب لا غير وزااال الحين...سكتت فتره وعقب سالته بفضول..
هند: ليش عندي احساس انك تحب بنت في الامارات...؟!...
انصدم خليفه....شو يقولها...
خليفه: ليش يعني.؟
هند: كل تصرفاتك تحسسني بهالشي ...خصوصا صدك عني من البدايه....!!!...
خليفه: يمكن لاني شاب محافظ ماريد اسوي علاقات وابا ارد بلادي بسرعه..!!!
هند: ماقالولك ان الحاسه السادسه موجوده عند النساء اكثر شي..؟!....ابصم بالعشر انك شايف لك شوفه....
ابتسم خليفه ونزل عيونه وهو يجسف اوراق كتابه ويلعبهن...
خليفه: بنت عمي....
ابتسمت هند..
هند: ياحيها يوم بنت عمك مب وحده بعيده عن اهلك...
خليفه: لا السالفه صعبه شوي...
هند: ليش.؟
خليفه: همممممم...ربيعي اللي اقولج توفى من ثلاث شهور...كان مالج عليها...بدون مايدري اني ابغيها...والحين ترملت..ومادري كيف بيكون الوضع يوم برجع...
ابتسمت هند مشجعه...
هند: مابتحصل احسن عنك... ان شاء الله كل شي بيمشي على هواك..بدعيلك...
خليفه: مشكوووره ماتقصرين..وان شاء الله تتيسر الامور... المهم هند ربعي يتريوني عالغدا..بسير ..ومشكوره مره ثانيه عالهدية..
هند: العفوو..الله وياك..
طلع عنها خليفه وشل الكيسه معاه اللي يابه بدون فايده...راح غرفته وصلى الظهر وعقب رجع لربعه وتغدى وياهم...
في العين..ناصر طلع من بيته وركب سيارته وراح لعزبه ابوووه...وكان الوقت عصر..ومثل ماتوقع..حصله هناك موجود...والعيوز بعد موجوده..احسن شي...
ناصر: السسسسلام عليكم....
بو خالد + ام خالد: وعليكم السلام والرحمه..
ناصر: شو امسيييتوووا....؟!
ام خالد: بخير فديتك...هاااا.؟؟..اشوفك زايرنا اليوم.؟..
ناصر: افا يا امايه ...يعني اروح؟ حرام ايي العزبه..؟
ام خالد: افا عليك ياولدي حياك الله فاي وقت... بس عاد انا اقول شو خص الهندسه بالعزب والبوش..!!!
ناصر: هههههههه امايه لا تطنزين...الهندسه ماخلتني حضري اطمني...
ظحكت ام خالد..
بو خالد: صبي لناصر قهوه....!
ناصر: لالا امايه بس ماريد...انا ياينكم فسااالفه... وماحبيت ارمس في البيت ..هني احسن..
بو خالد: خير ياناصر..؟ شو مستوي.؟؟
ناصر: مب مستوي الا كل خير يابو خالد...انا ابغي ارمسك عن حصه...
بو خالد: شو بلاها.؟؟؟
ناصر: حصه قالت لي تبا تشتغل...
بو خالد: شووووو.؟؟؟ تشتغل.؟؟ شحقه تشتغل شو ناقصنها...
ناصر: يابويه هد اعصابك مب كل شي بعصبية..البنت مب محتايه شي وانتوا مب مقصرين... لكن صارلها حوالي 7 شهور وهي يالسه في البيت لا شغله ولا مشغله...وفوق هذا الحزن اللي عايشه فيه والتفكير..تبا تشغل وقتها بشي...
بو خالد: الله يعينها على ما ابتلاها...بس ياولدي انا مب متعود بناتي اخليهن يشتغلن...
ناصر: انتوا ماجربتوا..عليا ياها نصيبها بعد ماتخرجت على طول وعرست... وحصه تراها حرمه وقد المسؤوليه مب طايشه...يعني ماشي خوف عليها..
بو خالد: انا مب مرتاح للسالفه هاي..طيب واذا اشتغلت وين بتشتغل..؟؟
ناصر: انا بتكفل وبدورلها شغل فيه حريم بس...لكن انتوا وافقوا....
بو خالد: شو رايج انتي ياموزه..؟!
ام خالد: والله يابو خالد انا اعرف بنتي حرمه وثقييله....واللي صابها تعبها وايد..وماتهون عليه بنتي اشوفها تذبل جدام عيوني... على ما اسير فوق كل مسى اسمع صياحها ... اذا كان الشغل بيفيد نفسيتها انا ماعندي مانع...
ناصر: ابويه..ترا والله مافيها شي..والبنات احين كلهن يشتغلن عااادي...لا تصعبون الامور...
فكر شوي بو خالد في السالفه..هو مب متعود على هالشي..ولا كد صارت في عايلتهم....لكن عشان خاطر حصه...بيتقبل هالفكره..
بو خالد: خلاص على ظمانتك ادورلها شغل مناسب...
ناصر: يطولي بعمرك يابووويه...ولا يهمك امرره ...انا بتكفل بهالسالفه...
استانس ناصر يوم ظمن موافقه الشواب... وسكر السالفه وقام يسولف وياهم لين المغرب....وعقب رد بيتهم...
مرت الايام والاسابيع..والجو في الامارات قام يشتي ويبرد... وعربنا قاموا يرضفوون على عمارهم اللبس...ويدلغووون ويلبسون هالجاكيتات..حمدان بسبب ظروف شغله ماقام يحصل وقت يروح بيت عمه كل يوم...وقلل سيراته لمرتين في الاسبوع... كان اول مايرد من دوامه يدرس شوي لين العشى...وعقب يتعشى ويرقد لين باجر الصبح...مثل الميت..من زود التعب مسكين.. فطوم ونوره لاهيات بالجامعه وبلاويها..ومبتلشات بالبروجكتات والبحوث اللي لازم يخلصنها...وكل يوم والثاني ركظن مكتبة زايد..فطوم طبعا مب من زود البحوث اللي بتسويها.. لكن لازم المرافق الرسمي لنوره .وبالمره تتعلم شوي على المكتبه... عنود وحصه دايما رباعه.. اهل عنود كانوا متفهمين موقف حصه بانها ماتقدر تطلع من البيت عشان جي كانوا سامحين لعنود تروح تسليها وتزورها دايما...وحصه كانت تنسى نفسها مع عنود..خصوصا يوم يتذكرن ايام قبل ويموتن من الظحك على الذكريات الحلوه...لكن حصه يوم توصل للمسا..وتحط راسها على هالمخده وصورة سيف عدالها...تتذكر اول ماشافت الصوره وظحكت عليه...والحين كل ماتشوف الصوره تصيح عليه... الله يرحمك ياسيف... خسارتي كبيييره وما تتعوض ...
ناصر على كثر ما حاط ودور لحصه على شغل..ماحصل لها غير في الاتصالات قسم الحريم... صحيح يقولون الاتصالات فيها اختلاط بين الموظفين...لكن المراجعين فيه فصل... ماعليه حصه حرمه ومب راعيه سوالف... لانه ماحصل غير هالشغل.. فبالتالي قدمت حصه اوراقها عن طريق اخوها ناصر وتم توضيفها..وبداوم بعد اسبوع... اسبوع واحد وبتخلص عدة حصه... مر على وفاة سيف اربع شهور وكم يوم...الله يا الايام...تمشي وتسحب وراها المصايب وتعقها فويهك..وتمشي بعدها كانه ماشي صاير...!!!
اليوم اخر يوم في عدة حصه... وعلى حسب معتقدات عيوزنا.. لازم انها تطهر كانها معيده... وتمشي للحوش وهي مغمضة واول ماتشوف تشوف شيرة او بحر.. عاد اون دلالة على الحياة اليديده والتفائل والامل... حصه صرفت النظر عن هالخرابيط...لكنها سايرت امها وسوت اللي طلبته منها.. بعد هاليوم حست حصه بشعور غريب...حلوو ومر... شعور بالتحرر من الحزن واللون الاسود...لكنها حست بالشوووق... مب معناته انها طلعت من العده ان سيف خلاص طلع من حياتها وقلبها...لا...بيتم موجوود...
يوم الخميس كان اخر يوم من امتحانات نوره وفطيم... والحبايب مسويات كيك وعصير وحالتهن حاله... ومتيمعات كلهن في الصاله.. حصه وعنود ونوره وفطيم... دخل حمدان وهي خاش يديه في جيوب جاكيته البيج في الليل وسمع الحشره... وقف عند الباب..
حمدان: هووووووووووووود...ياهل البيت...
طلعت له نوره..
نورة: هلا حمدااااااان...
حمدان: اهلين..شو عندكن؟..
نورة: حفله..
حمدان: لا والله..
نورة: هي والله..خلصنا امتحانات قاعدين نحتفل....
حمدان: ياحيكن والله...حصه داخل.؟
نورة: هي نعم...
حمدان: خلصت العدة هي صح.؟؟
نورة: هي من ثلاث ايام...عنبوو حاسبلها..؟؟؟
حمدان: تصدقين متوله عليها بشكل....خووووووزي...
خازت نورة عن دربه ودخل حمدان واول ماشاف ..شاف حصه...استانس من الخاطر...
حمدان: حصيــــــــــــــص...يابعد اهلي كلهم والله انتي...
يا ويلس عالكرسي اللي عدالها..بينها وبينه مسند.. ظحكت حصه وهي تحس انها متولهه عليه وااااايد بعد..
حصه: اهلين حمدااااااااااااان....شحااااااا الك.؟؟
حمدان: بخييييييير ..شحالج انتي... والله جنج كنتي مسافره وتوج رديتي....
حصه: شو نسوي بعد...انا دوم اسال عن اخبااارك من غلامتين....
رفع حمدان نظره لاول مره صوب فطيم اللي يالسه في كرسي حمدان المفضل جدام التلفزيون وقاعده تبدل بالروموت...وعاد اونها تسوي عمرها لاهية عنهم....ابتسم حمدان وصد صوب حصه..
حمدان: هي يابوج عفت ويوووووههن من كثر ما اجابلها..لاعت جبدي منهن..
وتعمد يرفع صوته عشان تسمع فطيم عدل...والنتيجه انها صدت صوبه بقو وعيونها اطلع شرااار.... ظحك حمدان وحصه وعنود عليها..
نورة: الا ياحظك يوم محصل بعدك انك اجابلنا ويا هالراس...
تحركت فطيم وعلى ملامحها تعبير غريب..تبتسم لكن مب من الخاطر...يت صوبهم وخذت كوب عصير تانج من الطاوله..وحطته على صحت صغير مناسب..ومدت ايدها لحمدان.. وهو يطالعها وعلى ويهه ابتسامه وهو مستغرب...
الكل كان يراقب الموقف...
فطيم: حمدان ماظيفناك...
حمدان: مشكوووووره...!!
مد ايده صوب الكوب عشان ياخذه..تعمدت ساعتها فطيم تحرك ايدها شوي عشان تدعم ايد حمدان الكوب ..وفعلا انجلب الكوب فثبانه وانجب نصه...لانه ادارك الموقف بسرعه ومسكه وهو يشهق ويوقف...
الكل شهق بقوو وهم منصدمين.....فطوم سوت عمرها متفاجاه ..و عاد اونها غطت ثمها بايدها...
حمدان فوووووووووول من الغيظ... ونفظ كندوورته وهو يصارخ عليها..
حمدان: يالـــــــــــرخــــــــــــــ ــوة...!!!...
عاد حمدان كله ولا كشخته...
فطيم: سووري حمدان ما انتبهت...ارتجفت ايدي وطاح...
جابلها حمدان وهو ماسك كوب العصير اللي نصه منجب...رصص عيونه وهو وده يكفخها...
حمدان: ارتجفت ايدج هاااا...؟؟؟... قسم بالله انج متعمده والحركه مبينه....لكن ماعليه...ذووووقي...
ورفع الكوب وجب الباقي على راسها.... طبعا مايحتاج اعبر عن الموقف.... مزيج من الصدمه والرغبة الفظيحه في الظحك....ماسكين عمارهم احتراما لمشاعر فطيم المجروحه.... حد يتنقرش بحمدان..؟!!.. الظاهر انها ماعرفته عدل..!!..تموا كلهم ساكتين مب عارفين ويا منو يوقفووون...الثنينه انتقموا من بعض واذا حد ادخل بينهم بينلدغ....
حط حمدان الكوب عالطاوله بعصبية...واطالعها من فوق لتحت...
حمدان: صدق سخيفه صايره اليوم....
وطلع من البيت وركب سيارته وروح بيتهم... وهو مب فاهم فطيم ليش سوت جي..؟؟ بس عشان قلت اني عفت مجابل ويوههن...ياخي يمزح...يممممممممممزح...اصلا يبين شوقه لها على ويهه يوم يشوفها...ليش الاستهبال هذا..؟؟؟ حس حمدان انه مظيج من فطيم ومايبا يشوفها او يرمسها... الله يسامحها ما هنّـت عليه وناستي بشوفة حصه...
فطيم من بعد من طلع حمدان ركظت حجرتها... ومحد حاول انه يتبعها احين...بس يوم ظهرت من الصاله.....تناقعن الباقي من الظحك اللي ماسكاتنه من الصبح....
نورة: آآآآآآآآخ بطني يعورني...اول مره اشوف موقف جي جدامي..
عنود: ههههههههههه..هذيلا شو بلاهم..؟؟؟
نورة: هههههههههههههههههه هذيلا الله يسلمج اثنينه يموتون في بعض بس كل واحد يبن للثاني العكس....
رفعن حصه وعنود حواجبهن مستغربات......
حصه: حلفي..؟؟؟؟؟
نورة: والله..بس من بعد موقف اليوم الله اعلم....
عنود: من متى هالسالفه...؟؟؟
نورة: الله يسلمج من شاف اخوج فطيم في ملجتج في بيتنا...وزاد طبعا يوم يت تسكن عندنا...
عنود: ياحلييييييييلك ياخوووويه هههههههه...والله مب مصدقه شكله غلط هذا يحب...!!
حصه: مسكين والله ابتلش هههههههه...عاد فطيم مب سهله...
عنود: اندووج انتي...نساني اخوويه وروح عني...هههههههههههاي...
نورة: هي والله ويا منو بتردين احين.؟
عنود: مادري جان اقول لامايه اطرش الدريول ويا الخدامه....
مسكت تيلفونهاوهي تظحك وتتذكر الموقف...واتصلت بالدريول ووصته اييها مع الخدامه...خلتهن نوره وراحت لفطيم..دخلت حجرتها حصلتها فاظيه..اكيد انها في الحمام..دخلت الحجره كثر وسارت صوب باب الحمام..
نورة: فطييييييييييييم...؟!!!
ماسمعت شي غير صوت الماي وهو يظرب ارضية الحوض..
نورة: شو تسوين تتسبحين.؟؟
فطيم:...................هي...
ظحكت نوره بصوت واطي ..اكيد العصير دخل فراس فطوم...اسميك ياحمدان..!!..انزين جب على ثيابها على شيلتها اي شي ..راسها مره وحده..؟؟؟ ...طلعت من الحجره ورجعت لقوم عنود وحصه تقعد عندهن لين ما راحت عنود بيتهم..قالت حصه انه بتروح تصلي العشا..وركبت فوق... ونوره ردت لفطوم..وحصلتها مخلصه..لابسه بجامه نوم وماسكه الفووطه وتنشف شعرها اللي يوصل لين تحت الخصر بشوي..وكان شكلها يبين انها صايحه..عيونها محمره وخشمها محمر..وقاعده تعامل شعرها بكل خشووونه....دخلت نوره وخلت الباب مفتووح عشان اذا اضطرت تشرد عن فطوم تشرد بسرعه...شكلها مايبشر بخير...!!!
نورة: هااااااا فطوم....نعيما..
فطوم: ...............
نورة: كنتي تصيحين..؟؟
صدت فطوم لنوره بعصبية...
فطوم: اصيح..!!!..عشان هذا حمدان..!!!...يخسي...
نورة: ههههههه...صراحه فطوم..انتي الغلطانه...
فطوم: لا والله..!!
نورة: هي..مهما قال يا اطنشينه او تردين عليه بالكلام..مب اجبين العصير عليه..
فطوم: انا ماجبيته ...فرط عني..
نورة: فطوووووم...الحركه وااضحه...وحمدان مستحيل يتبلى عليج ...لو درى ان الموقف كله كان حادث والله بيتساهل وايد وياج ويمكن يظحك بعد ولا يشل بخاطره...بس هو يعرف انج تعمدتي...
يلست فطوم عالشبريه بعصبية....وهي تفكر...
فطوم: اوكي تعمدت لانه قهرني..من يشوفني غايظني...كل واحد له حد يتحمل فيه...ولو بغا يرد عليه اوكي يجب عليه عصير عثيابي مب على راسي..؟؟؟ ثلاث مرات غسلته بشامبو عشان ريحه العصير واحين شعري بيتقطع....
نورة: ههههههه مابقولج تستاهلين اللي ياج عشان ما تفجين غيظج فيني...هههههههه..
فطوم: نوروه طلعي برا لا ايييج....هو بعد يستاهل اوكي...
نورة: انزين الحين شو بتسووون..؟؟؟ لازم تعتذرين منه...
فطوم: يوم بيبييظ الديج حبيبتي...
نورة: يعني جي بتموون احين عداوه بينكم.؟؟
فطوم: احسن عشان يبعد عن طريجي....وافتك من صدعته..
نورة: ههههههههههه يوووووه اسميج ماتعرفين حمدان...احين صدق بيبدا الجد عنده ...وبيسوي فيج بلاوي..
فطوم: خليه جان يروم ..اعرف ارد عليه باخس منه....
نورة: الله يهديكم....المهم انا بسير عند امايه وابويه في الصاله...تعالي عقب ماتخلصين بنحط العشا...
فطوم: مابا عشا..
نورة: بتاكلين غصبن عنج.... وودري عنج البزا...
طلعت عنها نوره وسارت عند اهلها...وقعدت عند شوابها.. في نفس الوقت دخل ناصر البيت سلم عليهم وركب فوق...دق باب حصه ودخل...كانت توها مخلصه صلاتها...
حصه: هلا ناصر...
يا ناصر ويلس عالشبريه..
ناصر: اهلين...هاااا..؟!...دوامج يبدا بالسبت...
حصه: هي ادري...
ناصر: تبيني اسير وياج.؟؟
حصه: لالا مب لازم...بس الا جان بدلـّي الدريول عشان مافيني اقعد ادليه اروحي مادل انا...
ناصر: تمام...حصه.. عندج نقاب.؟
ربعت حصه السياده وحطتها عالكرسي ويلست...
حصه: هي عندي...ليش؟
ناصر: اباج تلبسينه وانتي اداومين...وعباة مسكره بعد..
حصه: ان شاء الله...بس ليش انته مب مشغلني فمكان كله حريم..؟
ناصر: بلى..هو قسم حريم....المراجعات حريم..لكن اخافه شي اختلاط بين الموظفين عشان جي...
حصه: اهاااااا...خلاص مب مشكله بتنقب...
ناصر: تمام...لاني ماريد ابويه يسويلج سالفه..احسن لج...
حصه: ولا يهمك...مشكوور ناصر..
ناصر: العفو....واذا احتيتي اي شي خبريني...
حصه: ان شاء الله...ماتقصر...
ناصر: انزين يالله انزلي تعشي..
حصه: اووكي احين بنزل...
خلاها ناصر ونزل عنها..بعد ربع ساعه تيمعوا كل اهل البيت وتعشوا...وبعدها بكم ساعه ساروا يرقدون..ماعدا نوره وفطيم...توهن ماجزات ومخلصات امتحانات ومب ناويات على رقاد...ماصدقن يخلصن...
سعيد تقرب موعد سفره مع ربعه...وبسبب الترتيبات وقل الوقت ماقدر يروح العين يسلم على نوره.. واضطر بالدسسس انه يتصل بفطيم ويخليها تعطي نوره التيلفون عشان يكلمها...وكلمها وسلم عليها وسمع السب والمشاتم للآخر..واخر شي راضاها... ووسولف وياها شوي.... كانوا مخططين هو وربعه يسيرون كذا مكان وكذا بلاد مب مكان واحد عشان جي ماعرف شو يقولها وين مسافر..بس من سمعت طاري لبنان احتشرت مره ثانيه...
نورة: هيييي....هناك العوووق..قول من الاول ...
سعيد: اقول شو ويا هالويه..؟!
نورة: انكم تبون تشوفونهن هذييلا كاسيات عاريات...!!!!
سعيد: مابرد عليج انزين.....سباله...
نورة: ماعليه ماعليه ياسعيد....لبنان عاد..قول سوريا...لبناااااااااااااان..؟؟ ؟
سعيد: مابنتم فيها غير يومين ثلاثه.....
نورة: نص يوم كفايه عليك تشوف اللي ماينشاف عالتلفزيووووون....
سعيد: هههههههههههههه تغارين ويا هالويه....
نورة: اغار من هالفزاعات...؟؟؟
سعيد: انتي منقهره لانج قصيره شوي....؟
نورة: شو خص هذا فهذا بكفخك ترا.....!!!!
سعيد: هههههههههههههه.....نوره..ياعمر ي...والله العظيم اني ماشوف غيرج...حتى لو يابولي ملكه جمال العالم وحطولها جدام عيوني بعد مابشووووفها....عرب غييير تارسين عيوني...اخلي الحشيم والمستور واطالع البضاعة الفاسده..؟؟
نورة: احين جي استوينا نحن بضاعات عندكم..؟؟!!!
سعيد: لاحووووووووووووووول هذا تشبيييه...انتي امره وانتي معصبه ما تقردنين..!!
نورة: تعترف يعني انك قاعد تقردن وما تعني كلامك...!
سعيد: هههههههههههههههه نوروه...حسبي الله عبليسج ...انتي من وين يايبه هاللسان..؟؟
نورة: من عند ربي....لبنان ماتسير..ماااتسييييييير...
سعيد: انتي الود ودج حاطتني فحجرة وحابستني فيها....
نورة: هي والله....
سعيد: فديت الغيااارين انا....قتلج محد مازر عيني غيرج..اطمني..
نورة: بنشوووف يوم بتسير هناك كيف بتفرغ عينك عشان تشوف عدل...
سعيد: افاااا...ماعندج ثقه فيني...
نورة:.......بلى...
سعيد: عيل جب..لا تكبرين المساله....
ورجع يحاول يهديها لين ماهدت وطاااب خاطرها..سلم عليها وسكر وهو ميت من الظحك عليها...حليلها حرمتي خبله...!!! ..