الجزء الاربعين


كان حمدان يالس فوق يبل حفيت يفكر وهو مظايق بفطيم...صارله ثلاث ايام ماسار بيت عمه ويحس شي ناقصنه... ماتعود على انه يقطعهم ...بس كيف يسير وفطيم هناك..؟؟ ورد يعقد حياته معصب.. صراحه الحركه اللي سوتها بايخه جدا.... ريال شكبري تقوم اجب عليه عصير..؟؟ اوكي الواحد يتهور لكن كل شي له حد..!!!...المفروض تحشم بعد هي ....وابتسم شوي يوم ذكر شكلها والعصير يمشي على ويهها... وفجاه مارام يمسك نفسه ونقع من الظحك بصوت عالي.. ساعتها حمدان فبيت عمه ماقدر يظحك لانه كان معصب.. وماشاف الجانب المضحك من الموضوع... اما الحين وهو يذكر شكلها..!!!..صراحه تمنى انه كانت عنده كاميرا يصور شكلها....لانه مايتفوت...بس تستاهل والله اللي ياها.... ومب حمدان اللي بيسكت عن وحده مفعوصه ماتعرف منو حمدان تي واجب عليه العصير عشان كلمتين مزح...!!!...الا برد عليها بشكل اخسسس بعد...عشان تتادب وتعرف انه انا ماينلعب وياي...وخلها تروح تشتكي عند اخوها جان تروم...بيعطونها هي طراق لانها ظاهره جدامي....ويوم خطرت هالفكره فباله خاز الظحك من خاطره....فطوم تنصفع..؟؟؟ لا والله حشى... ما صار ولا استوى ولا انولد بعده اللي بيصفع فطوم...الا جان انا ممكن..انا غير....بس غيري لا..يخسي...!!!.. ولازم انبهها عن تتهور وتخبر حد بعد...مينونه تسويها اذا عمتها العصبية...!!!
رن تيلفون حمدان في هاللحظه وطلع ربيعه ...
حمدان: هلا والله ملاااااااايييين...
محمد: ولااااااااايسدن في ذمتيه...مرحبا بالمزيون...
حمدان: حبيبي انته.. ترفع معنوياتي دوم...
محمد: افااااااااااا ثرها معنوياتك محطمة..؟؟؟ بلاك.؟
حمدان: ماااااااااشي ليش تحيدني اتاثر من اي شي...؟
محمد: ظاهريا لأ...لكن اعرفك قلبك حساس وحنون....
حمدان: اشوفك تتغزل فيني....؟
محمد: ياخي احبك...تتزوجني.؟؟
حمدان: هههههههههههههه خسك الله يالسبال... وين دارك..
محمد: ماتسمع الحشره يعني.؟ يالسين في الموووول...
حمدان: ماعفتووووه..؟؟
محمد:... لأ ...
حمدان: هههههه اوف صريح بعد...!!!..منو عندك.؟
محمد: عندي الله يسلمك شبيهك رشووود وعزوووز..وسالم...وسعود متصل وقال ياي في الدرب...وانته.؟
حمدان: والله انا فيبل حفيت..
محمد: ياااااه...!!!..شعندك؟
حمدان: متفيزر فوق واراقب..ام دويس تتريا فريسه شو بعد شو عندك..!!!!.
محمد: اهاااااااااا ..ثرك انته ام دويس المشهوره..!!!.وانا اقول ريحتك ليش دوم حلوه..
حمدان: يييييييييييييه علينا..!! شياك تفصفصني اليوم والله بشك فيك بقوم افحصك في المستشفى يتاكدون من جنسك شو من الشي..!!!
محمد: هههههههههههههه يالخاااااااااااام....
حمدان: هههههههههه عورتك الظربه هاااا..!!...عيل تووووب...انا حبيبتي ماتغزلت فيني شراتك...قامت وجبت العصير عليه....
محمد: هااااااا..؟؟؟ حبيبتك...؟؟؟ من ذي.؟؟؟
حمدان: افااااااااااااا بس افااااااااا...كذا مره شايفنها انت.... معقوله ما لاحظت شوقي ونظراتي صوبها...؟!
محمد: تغربلت...منووو من الغراشيب اللي طيحتك..؟؟؟
حمدان: خدامتنا ام ظروس صفر...!!
وظحك حمدان يوم سمع ربيعه ينقع من الظحك بصوت عالي.. والله ان هالربع خبايل وما وراهم شغله...
محمد: ويا راسك انا قلت انته مب ويه حب....
حمدان: لا والله..شدراك عاد....عيل نحاسه فيك والله اني احب...
محمد: افااا..تحب منووو....
حمدان: احب ابويه وامي...ويالله اجلب ويهك...
محمد: انزين تعال بنكمل سوالف وياك....
حمدان: بسير ادرس...
محمد: احين الدراسه يتك على حظنا...؟؟؟
حمدان: خلاص خلاص بيييكم بس مابطول ترا وزهبووووا العشا قبل ما ايي..مافيني اترياكم...
محمد: تــــــــــم...انته بس تعال...
حمدان: خلاص احين ياينكم..فمان الله...

سكر حمدان تيلفونه ونش وركب سيارته وروح صوب العين مول..
في بيت حمد الكتبي.... وبعد العشا..فطوم توها مسكره عن امها ..سارت ويلست عند نوره اللي حاطه اللاب توب جدامها وتلعب به..وحصه اللي تحني اييد امها..وبو خالد اللي يالس يطالع الاخبار ولاهي عنهم...
فطوم: اووووف ياهي حاله..
نورة: بلاج اتقحطنين جنج عيوز سارقين عشاها..!!..
فطوم: احين منو بيوديني الشارجه..؟؟؟؟؟؟؟؟؟
نورة: افا والله افا..ماظنيتج عايفتنا لهالدرجه...
فطوم: حرام عليج مب جي السالفه...بس الاجازه بدت وابا اسير عند اهلي صراحه متولهه عليهم..
رفعت حصه راسها وقالت..
حصه: انزين تريي لين ما ايون قوم عليا وفيصل بتردين وياهم..
فطوم: فيصل داش دوره من ثلاث اسابيع وما بيخلص الا بعد اسبوعين... ولين ما ايووونا يمكن تصير ثلاث او اربع اسابيع الله اعلم...يعني شهر...وبتخلص اجازتي وانا ماسرت عند هلي ولا قضيت اجازتي...
فطوم كانت مبرطمه...من الخاطر متولهه على اهلها...
قالت نوره وهي تشتغل فكمبيوترها....
نورة: قضي اجازتج ويانا...ترانا كل يوم نطلع...كل يوم نسير مكان يديد...خلصت الاماكن في العين من كثر ما نطلع ونتحوط ويفتكرون فينا اهلنا واخواننا ويجابلوونا...ترا هم امممره مايجابلون حريمهم..ولا يبدونهن علينا..يعني اذا مب نحن مبدااييين نكون متعادلين...
كان واضح وايد ان نوره تطنز.... ابوها ماسمعها ولا افتكر فيها بس امها حزت فخاطرها هالرمسه..وعصبت بعد انها تطنز عخوانها جدام بنت خالها..
ام خالد: وابوي نوروه....اوووص يالله..صدق انج ماتستحين ولا تخيلين...
نورة: صدق امااايه...عيالج ولا مفتكرين فينا...خص خالد....يظهرون حريمهم ويحوطونهن ونحن طابينا... اوكي يظهروون رواحهم ماقلنا شي ...بس مب كل الروحات رواحهم...
ام خالد: يوم بتعرسين بيحوطج سعيد ولا بيقصر فيج احين انطمي واسكتي...
نورة: ادري بسعيد مابيقصر....بس انتوا عندكم الوحده ماتعيش حياتها الا اذا عرست..؟؟ كل شي ممنوع علينا حتى الظهره وياكم..؟؟؟؟
ام خالد: احين انتي شو تبين..؟؟؟؟ محتشره وتلعلعين جنج زطية...
نورة: الله يسامحج يا امايا....ظهرووونا..حوطونا نحن في اجازه...
ام خالد: ويدي...!!! وين تبيني اوديييج..؟؟!!!
ردت حصه ترفع راسها عن ايد امها اللي قاعده تحنيها...
حصه: خالد واعدني بسيرة البرر من زمان...وانتي واعدتني بالعزبه....
ام خالد: تبن العزبه..؟؟؟ قولن من اول بوديكن باجر...
نورة: لا امايا..شو نبا بالهوش والدياي والبقر نروح نجابلهن..؟؟؟ نبا نسير كلنا لمة عايله نروح نقيل في البر ونطبخ ونسوي ذاك القرص..ونعين خييير ونستانس...والا شو رايك يابووووويه..؟؟؟؟

بو خالد: ......................... (لابسنهن ولا سمعهن)..
ام خالد: هاه..!!..ولا حافلنج ابوج...
طبتها نوره وزقرت بصوت اعلى...
نورة: ابوووووووووووويه...!!!
صد بو خالد بسرعه عن التلفزيووون صوب نوره....
بو خالد: هاااااا...!!!
فرت نورة اللاب توب على فطيم اللي قافطة انها سوت هالسالفه كلها.... راحت نوره وتفيزرت عدال ابووها تتمصلح...
نورة: اقول ابوويه نبا نظهر كلنا نسير نقيل في البر ....نتفري شوي ونغير جوو..وترانا في اجااااازه... والناس تطلع في الاجازات والحين الجو وايد حلووووو ويصلح للطلعه....شو رايك.؟؟؟
بو خالد: تبن تسيرن البر...؟؟؟؟
نورة: هي ابوويه...انته وامي واخواااني ونحن البنات....
بو خالد: وقوم عمج..؟؟؟؟
متعود بو خالد مايسير رحلات الا ويا اخوه....
نورة: وقوم عمي ان بغيت المهم اطلعووونا ابويه دخييلك الشيمه زهقنا من البيت والدراسه نبا نغير جوو فديييييييييييييييتك.... (وتقربت من ابوها تصاصره) ولا تنسى عندنا فطيم بعيد عن اهلها لازم نحوطها شوي ابويه فظيحه....
بو خالد: انزين مايخالف.....اخر الاسبوع بالخميس....
نورة: بعدنا بالخميس ابوووويه..؟؟؟؟ اليوم الاحد...
ام خالد: وابوي الناس اشغاال ودوامات مب متفيجيلج انتي وحواطتج....
نورة: انزين انزين...اخر الاسبوع الخميس ...تراكم وعدتوووونا....
ام خالد: لا وعدناج ولا شي انتي اروحج حشرتي عمرج...
شافت نوره انها بتكنسل....
نورة: امااااااااااااااااااااااايه... .!!!!!
ام خالد: خلاص خلاص يصير خير...فكينا بس من حشرتج...
سحبت حصه ايد امها وهي مبتسمه وكملت حناها.. ونوره ردت ويلست عدال فطوم وهي تبتسم بمكر... وصاصرتها..
نورة: شفتي كيف دبرت لج حواطه...هذي سياستي..سياسة المظلوم اسمها.و ترا رحلات ابويه شي ثاااااااااااااااااااااااني وبتشوفين بنفسج ان شاء الله... والله انها احسن عن أي مكان سياحي...يكفي النشاطات اللي نسويها في الرحله..
فطوم: أي نشاطات بعد الا هي سيرة بررر وبنقعد مجابلين....
نورة: هههههههههههههههه صدق انج راعية بحر ماتعرفين سيرة البر كيف...
فطوم: يالله على ايدكم بنتعلم..
وبدت فطيم تتحمس من الحين.... وتفكر بسيرة البر اللي ماتعرف عنها...خلصت حصه حناها ...وقالت..
حصه: يالله بسج امايه..لا تخربينه عاد تراه مانشف...
ام خالد: يزااااااااااج الله خير يابنتي ماقصرتي...
حصه: يالله انا بسير ارقد عندي دوام..تصبحون على خير...
فطوم +نورة: وانتي من اهل الخير...
ام خالد: نوم العوافي فديتج...
ركبت حصه غرفتها وبدلت ثيابها.. وفجت شعرها لانها رابطتنه من الصبح ويعورها...كانت لابسه بجامة نوم (بنطلون وقميص) لونها وردي وعليها دباديب صغار...فتحت حصه كبتها تطلع ثياب تلبسهن باجر للدوام...وبعد ما اختارت اللي تبغيه وجهزته بندت الليت وشغلت الابجوره اللي عدال السرير...وانسدحت...سالفة شغلها هذي فتحت نفسيتها شوي عالدنيا...حست انها تطلع من جو البيت وتشغل نفسها بشي يفيدها ويفيد غيرها... مجموعة الحريم والبنات اللي تشتغل بينهم وايد طيوبات وشاطرات في شغلهن...اغلبهن يتنقبن..بس في منهن يتحجبن..اللي منهن معرس واللي مخطوووب واللي بعده عزابي.. امس كان اول يوم فدوامها...تلقفتها وحده وعرفتها على الشغل والدوام والقوانين...كان كل شي فنان وحلو... واليوم الصبح يوم حشرها ناصر وهو يشوفها ظاهره من البيت...وماعرف هو اصلا ليش حشرها..اول ماشافها وقفها ودقق النظر فيها وهي متنقبه...وهز راسه وقالها النقاب ماينفعج.... ويوم قالت له ليش قالهاعيونج وايد تجذب الواحد بييسون يطالعونج..!!!!... حاست بوزها حصه على هالرمسه.... وقالت له انته اللي طلبت مني اتنقب..احين شو تباني اتغشى..؟؟؟؟...وماعرف له عذر وشو يسويبها...يالله ماعليه ربها خالقنها جي..وين بدس عيونها يعني..؟؟؟...وخلاها تروح لشغلها...وهو مب مقتنع....لكن كان معاه حق... ذاك الموظف اللي ماتعرف شو شغلته لين الحين ماخوز عينه عنها من شافها...كان ياي يسلم واحد من الملفات لاي وحده في القسم...لكن الحبيبات وحده عندها اجازه ولاده..والثانيه مريضه...وشي منهن مشغول والباقي طالعات على باقي الاقسام... فاضطرت انها هي تطلع وتشل الملف.. اول ماشاف سواد عباة رمس ومد الملف..
...: هذا الملف لــ....
وسكت يوم رفع عينه ورد سحب الملف من يديها.....على باله انها غريبه...تمعن بعيونها بشكل وقح..وهو بصراحه اول ماشافته حصه ذكرها بحمدان...نفس الملامح تقريبا خصوصا الحواجب...
اطالعها بفضووول..
...: انتي منو..؟؟
حصه: موظفة يديده...امس داومت...
استوعب الريال الوضع..وهز راسه..
..: اهااااا.... انا راشد ..موظف في الحسابات....
حصه: والنعم..الملف لو سمحت ..
اعتفس ويهه راشد من هاللبسه المعتبره..وعطاها الملف...وهوقافط..
راشد: الملف لآمنه...خليها تراجعه وتخلصه وترده عليه.....لا تنسين راشد من الحسابات...راشد..
اطالعته حصه بنظرة سكتته...وتبين انه طولها وهي قصيره...انزين وراشد من الحسابات شو يعني..؟؟ انا يديده وطبيعي اني بحفظ اول موظف التقي به!!!..مب من كثرهم اللي شفتهم يعني...راشد من الحسابات من صعوبتها..!!!...
حصه: مشكور...
وصدت عنه حصه ودخلت القسم...وحطت الملف على مكتب امنه..وردت لشغلها..اما راشد فتم مجابل الباب.. يفكر بعيونها...عذاااااااااااااااااا اااااب...من هذي اللي يابوها وحتى ماقالت لي اسمها...!!!!...لازم اني اكثر اشغالي في هالقسم...!! ورد لمكتبه بعد ما نسى سالفتها...
تذكرت حصه كل هذا وهي طايحه على شبريتها..وظحكت من خبال شباب العين يوم يشوفون البنات... مدت ايدها تحت المخده وطلعت صورة سيف...وابتسمت له لاول مره من توفى....وباست صورته بكل حب...
حصه: واللــــــــــــه مايســــووووونــــــــــك يالحشيــــــــم....تصبح على خير
وردت دستها تحت المخده ورقدت بعد ما ظبطت المنبه عشان يوعيها ست ونص....

في الثلاث ايام اللي طافن كانت الاتفاقات على السيره نشيييطه...خالد ماطاع لانه عنده زام بالخميس..لكن ميره وعيالها بتسير وياهم..ناصر او مارمسته حصه في السالفه قالها فالج طيب ومستعد يروح لانه ماصدق حصه تطلع من الموود اللي هي فيه...بيت العم...وافقوا بعد...الشيبه وحرمته وولده سلطان وحرمته بيسيرون.. اما حميد مايقدر لانه من قبل واعد حرمته بسيرة دبي...وشي طبيعي العنووود اول المتحمسين للسيره.... اما حمدان من كثر طلعاته محد خبره بالسالفه لين يوم الاربعاء...وهو لين الحين ماراح بيت عمه ومب قادر يقاوم السيره اليوم..متوله عليهم...
اول ماوصل بيت عمه وكان المسا بعد ماطلع من دوامه في الشركه...تم يالس فسيارته شوي..يفكر لو انه شاف فطيم شو بيسوي...لكن يوم عيز من التفكير نزل واللي يصير يصير....جي مب ياي عشان فطيم هو...دخل البيت وهو قلبه يدق...توه يحس انه متوله عليها...بس ماشاف حد في البيت..هدوء...توه ياي بيدخل الصاله الا وبفطوم فاتحه الباب ويايه بتطلع..شهقت يوم شافته وبسرعه عدلت شيلتها...
فطوم: ماتعرف ادق الباب...؟؟
سكت حمدان وماقال شي...قعد يتامل بويهها..لاول مره فطوم تكون قريبه منه لهالحد..!!...بينه وبينها شبر...هي ماتراجعت ولا هو بعد تراجع....وقف جذي مجابلنها وحط يديه فخابيه.... ماكون حمدان ان فوتها عليج يافطيم...!!!
وقعد يطالعها بنظرات تنرفز..وفطيم حست بالاحراج...
فطوم: شو اطالع بعد..!! رد عورا عشان اظهر....
تم يطالعها بطريقته وبطى لين مارد عليها..
حمدان: انا ..حمدان بن محمد....اتراجع عشان انتي تخطفين..!!!....ليش؟.. شيخه وانا مادري.؟
تجتفت فطيم بعصبية وقالت تغايظ...
فطوم: هي نعم...
حاس حمدان بوزه وهو ماخوز عينه عن عيونها وقال بسخريه...
حمدان: هه..!!.. ذاك اول..!!.
تلفتت فطيم بظيجه..
فطوم: حمدان خز عن الباب عشان اخطف ولا تفظحنا...
حمدان: انتي اللي بتنفظحين انا شلي...!!..
فطوم: عموه وريلها في الصاله يطالعون التلفزين..لا تخليهم ينتبهون علي احين...
كانت الباب شوي ملايم ...
حمدان: حمدان مايتراجع لحد اصغر عنه..انتي الصغيره انتي تراجعي عشان انا ادش....
فطوم: ماباهم يدرون اني شفتك ...
حمدان: والا ماشفتي بليس يافطيم..
حزت صدق فخاطره حمدان....
رصصت فطوم عيونها..
فطوم: انته ليش غلس جي...؟؟ شو سويت بك انا عشان تعاملني جي..؟؟؟
حمدان: جبيتي العصير عليه بعمد تبين تفشليني وتحرجيني....
فطوم: لانك ما اتوب عن مغايظك لي..وبعدين انته فشلتني واحرجتني اكثر اوكي..!!
قرب حمدان ويهه منها وهالشي خلاها تتراجع كردة فعل...
وقال بنعومه كاذبه..
حمدان: لانج تستاهلين اللي ياج...
سكتت فطوم شوي وعقب قالت بصوت واطي...
فطوم: ياكرهي لك...
ابتسم حمدان بمغايظ...ونعس عيونه ورقت ملامحه بشكل يعرف عدل انه ياثر على كل البنات...خص ان عيونه كانت تلمع...
حمدان: وياااااااااحبي لج يالطويله....

سكتت فطيم وبطلت حلجها وعيونها وارتخت ايدها على جوانبها... وخازت كل الانفعالات عن ويهها ماعدى الدهشه.... وهي اطالع بويهه مب مصدقه اللي سمعته منه... بس حمدان مارحمها ولا خلاها تستوعب...حاس بوزه وصد عنها يانب وهو مغمض عيونه ..عقب صد صوبها ومد ايدها ومسك يديها من فوق..(ذراع)..وسحبها على طرف...
حمدان: فجت لي حلجها...طوفي طوفي...
سحبها على يانب بعيد عن الباب ودخل وسكر الباب وراه بالقو شوي وهو يبتسم...مستانس انه بيخليها محتاره اذا يعني كلمته او يمزح ويغايظ....احين كل مابتشوفه بتتوتر وتستحي..هههههههه احسن خلها تحس شوي...
دخل على عمه وحرمه عمه ويسلم عليهم ويلس ياخذ علووومهم ويسووولف... اما فطيم...فتمت علىحالها واقفه في الممر جدام الباب الرئيسي... مب قادره تصدق اللي سمعته...وفوق هذا بعد لمسة حمدان لها خلتها تحترق....ياربي ماتحمل هذا شو ناوي يسويبي....يقولي هالكلمه عقب يصكني.... لالا بركب فوق السطح بنتحر ابرك لي....ياويلك ياحمدان ان كنت تمزح...!!!...يالله محلاها وهي ظاهره من حلجه الحلوو... شكله كان يعنيها...عيونه كانت تقولها قبل لسانه....طالع انا بعد على منو اقص...!! حمدان لعاب.. ويقدر يقول هالشي حق الف بنت ويبين انه يعنيها...بالله من اسبوع جاب على راسي العصير بدون رحمه احين بيي يحبني..؟؟؟ ياربي بشو افكر والابشو اقتنع...هو من اول ماشافني وهو طايحبي...؟؟...ونوره تقول انه يحبني... وهو في يوم حاول انه يتغزل فيني بس ما بالغ....!!..اووووففف اسير اقول حق نوره ابرك لاني مب عارفه بشو افكر...!! عقلي مب عندي ...
ركبت الدري وربعت صوب حجره نوره ودقت الباب...
نورة: مفتوووووووووح....
دخلت فطوم على نوره اللي كانت توها طالعه من الحمام متسبعه وقاعده تسحي شعرها وتحط له بلسم...
نورة: بلاه ويهج معتفس...؟؟؟
سكرت فطوم الباب وراها ويت صوب نوره وقعدت على طرف الشبريه ...
فطوم: ولد عمج....
نورة: حمدان هني..؟؟ من زمان ماياانا...شو سوااااابج..؟؟؟؟
فطوم: ياوييلي يانووره ياويلي ماتحمل....
نورة: شو قالج عاااد..؟؟؟
فطوم: قالي ياحبي لج يالطويله....
شهقت نوره وبعدين ظحكت....وهي مب مصدقه ان حمدان نطق بها....بس وحليلها مب عارفه شو هي السالفه وكيف يت هالكلمه...
فطوم: مادريبه عاد يعنيها والا يطنزبي...
نورة: ههههههههه انا قتلج من زمان ان حمدان يحبج...وتبين الصدق واجهته مره بهالشي وماانكر...وتصرفات وايد تثبت لي هالشي...
فطوم: مثل يوم جب العصير على راسي مثلا؟؟؟
نورة: لا..هههههههههه ومابقولج لانه موصني ما اخبرج لانج بتظايقين ان دريتي....
فطوم: شوووووووووووو..؟؟؟ والله يا تقولين لي...شو مستوي..؟؟؟
نورة: ليش تحلفين..؟؟ انا مااخون حمدان ....؟؟
فطوم: من متىىىىى..؟؟؟
نورة: من حصل له فريسه غيري يغايظها وانا راضية عليه....
فطوم: والله تقولين الحين شو مستوي لا اطيحبج احين...
نورة: هههههههههههه سمعيني عيل... تذكرين يوم كنتي مريضه.... ورقدتي في الصاله..!!
سكتت نوره وظحكت....غمضت فطوم عيونها وغطت ويهها بيديها...
فطوم: لاااااااا ياربي لااااااااا.....لا تقووووولين دخيييييييييييلج....
نورة: ههههههههههه ..
فطوم: شافني واناراقده..؟؟ يالفظيحه كيف كان شكلي...؟؟؟ شيلتي طايحه والا لا... ياويلي شو قالج رمسي...؟
نورة: هههههههههههههههههه..والله يا فطوم اني ماشفته يحاتي حد كثر ما حسيت انه يحاتيج يوم شافج..ماعرف شو سوا يوم شافج ولا كم يلس عندج...بس انا يوم نزلت شفته واقف عدال باب الصاله من برا وعلى ملامحه تعبير غريب...كان يحاتيج وايد..وخايف عليج لانج راقده بهالطريقه وبروحج...قالي اييبلج لحاف لانج بردانه ... ولا اخبرج انه شافج لانج بتظايجين....واصلا من قبل يوم وصلني للبيت يوم كنتي في العياده واااااااااااااااااايد اظايق يوم درى انج مرضتي زياده وسرتي العياده ...
تمت فطيم ساكته تفكر بالكلام اللي تسمعه وتحاول تستوعبه...
نورة: انتي وايد ظالمته..بس لو تفهمين شخصيته ونفسيته...يحبج وايد ويحاتيج...بس يحب يمزح وياج ويتحرش فيج.... واذا قالج هالكلمه اليوم وبينها لج بانها غياظ...تراه يعنيها صدقيني....على قولتهم اشفي غلّي في مزاحلّي...

تخبلت فطوم...ماتصدق ان هالحمدان الحلو الرهيب اللي كل العايله متخبله عليه وعلى سوالفه يحبها هي...!!!.. هي ما تقل من شان عمرها..بس صراحه توقعت انه كان يلعب ويقضي وقت ويمزح وياها...بس اذا كانت هذي تصرفاته من وراها وهذا سؤاله واهتمامه...اكيد انه يحس بشي من صوبها...وابتسمت...
كانت نوره تراقب هالملامح على ويه فطوم وتعرف اللي في خاطرها...
نورة: استسلمي فطيييييييم.... انتي تموتين فيه تراج ....
فطوم: لا والله...
نورة: هي..ومتاكده انا من هالشي...
فطوم: وايد متخققه بولد عمج الطويل ...
نورة: ههههههههه هي.. انا واثقه منه وهو واثق من نفسه....وبصراحه هو الواحد يتخقق انه يعرفه عن قرب...
فطوم: الله يعيني عليه يانوره...قسم بالله ياويلج ان قلتيله أي شي...
نورة: ههههههههه لا انا مابخرب خطط حمدان...بروحه يخليج تعترفين غصب طيب بانج تموتين فيه وفي الوقت اللي هو يبغيه...ولد عمي اعرفه عدل....
فطوم: بنشوووووف....ههههههههه
نورة: احين هو تحت.؟؟؟
فطوم: اظني.....
نورة: بسيرله..تصدقين تولهت عليه..!!..ابا اشوف شو مجهزلنا للسيره...!!..
نشت نورة لبست شيلتها ونزلت بسرعه وخلت فطوم تتبعها...اللي سارت حجرتها على طول ماتبا او ماتقدر اصلا تشوف حمدان الحين....
دخلت نورة الصاله وحصلت حصه داقه سوالف مع حمدان وهو مستانس من الخاطر...مسكين ماينلام.. الاسبوع اللي طاف يوم شاف حصه ما هنت عليه فطوم ... الحين بيعوض عاد...
نورة: السسسسسسسسسلام عليكم حمدااانووووه...
اطالعها حمدان بنظره كانه يتفحص اذا خبرتها فطيم شي او لا... بس نوره غصبن عنها كانت تظحك..متحسفه انه فاتتها شوفة حمدان باعترافه الملتوي الخبيث...!!..ورصص عيونه وابتسم كانه يبا يقولها انه يعرف باللي داستنه...
حمدان: وعليج السسسسلام بنت عمييييييي....شحالج؟
نورة: الحمد لله...شخبارك؟؟؟ وشوووو مسوي..؟؟؟
قالت " شو مسوي" بطريقه تقوله انه انته صدق شوووو مسوي من سواد ويه..؟؟؟ وفهمها حمدان وظحك وطلعت غمازاته اللي نااادر ماتطلع.... لانه من خاطره كان يظحك وهو يتخيل فطيم شو مخبره نوره..!!!..
حمدان: ههههههههه آآآآآيه ..احم..ماسويت شي بنت عمي ابد....ليش سامعه شي انتي..؟؟
حصه: بلاكم ترمسون بالالغاز..؟؟؟
حمدان: ابد ماشي سالفه..بنت عمج خبله يعيبها تبين للناس ان عندها سالفه وماحد يعرفها غيرها اونها خطيره...!!!
نورة: يالسبااااااااااااال....

كل هذا وام خالد وشيبتها لاهين عنهم يطالعون التلفزيون....
نوره: اسمع عاد حمدان....باجر مب ترقد وتاخرنا...خلكم جاهزين بسرعه عشان نستانس اكثر...
عقد حمدان حيّاته....
حمدان: شوووو..؟؟؟؟ شو تبيبي انتي..؟؟ اسميني الا برقد آآآآآيه ياحلات الشبريه والرقاد عليها يوم ماشي وراك....
نورة: شو ماااااااشي ورااااناااااا...نسييييييييت..؟ ؟؟
حمدان: شو نسيت عاااد..؟؟؟
حصه: وابويه حمدان ترانا باجر بنسير البر بنقيل نحن وانتوا.. ماخبروك قوم عمي.؟؟
حمدان: بتسيرون تقيلون في البرر..؟؟؟؟؟ ويانا.؟؟؟؟ محد قالي...
نورة: احين نحن قلنالك... يالله جهز عمرك انا واعده فطيم برحلة برر معتبره ماقضت مثلها فعمرها..
حمدان: لاااااااا مافيني نوره صراحه واعد عمري برقده انا ...ومافيني على حواطه البر....
حصه: حمدان...اذا ماسرت انته ويانا انا مب سايره لانه الصراحه السيره مب شي بلاك....
اطالعها حمدان بطرف عينه...وابتسم...وابتسمت هي بعد...
حمدان: عشانج والله ياحصه مب عشان حد ثاني....
نورة: ياسلااااااااااام محد معبرنا نحن...
حمدان: من كثر ما انتي زينه فيني تبيني اعبرج....؟؟؟
نورة: حليلي اساعدك..
وغمزت له...
حمدان: حليل الياعده.....هههههههههه الساعه كم بتسيرون...
حصه: ابويه يقول بنظهر سبع....!!
حمدان: ياللــــــــــــه عيل بروح من الحين ارقد....
حصه: ههههههههههه مستوي رقاد اشوفك...
حمدان: لاني ماقمت ارقد مثل قبل....ماشبع رقاد اتعب وايد..
حصه: الله يعطيك العافيه....المهم لا تسير بلا عشا... بقوم اقولهم يحطون عشانا وعشا ابووويه...
نشت حصه عنهم وقالت لهم يحطون العشا ...تعشا حمدان مع عمه وروح ..لانه فطوم ماطاعت تتعشى وحمدان هناك استحت... عشان جي الحريم اتعشن بعد ماروح حمدان....

بالباجر الصبح كان الكل مرتبش...ناشين الساعه ست وقعدوا يتريقووون...والكل فيه رقاد الا فطوم ونوره كانن متحمسات...ووصن عنود تيب كيمره الفيديو معاها... حصه كل شوي توعي واحد من اليهال...كانوا متلبسين اونهم جاهزين لكن كل ساعه حد منهم يعق براسه على مخده ويكمل رقدته...وكانوا نكته في البيت...ام خالد وميره وحمده كانن يتعاونن على اغراض الرحله ويوصن البشاكير عليها يحملونهن في السيايير...وبو خالد كل شوي يحشرهن ويتشرط هاتن هذا ولا تيبن هذا...وناصر مانش قال لحمده يوم بتخلصون اممره وبتركبون السييايير ذيج الساعه وعووووني ...
نفس الحال كان فبيت محمد الكتبي.... عنود ناشه من اصبحت بس انسدحت عالكرسي مال الصاله...وابوها متفيزر عدالها يتريق... العيوز في المطبخ ويا حرمه ولدها سلطان يجهزون الاغراض..وعيال سلطان يناقزون غير عن عيال ناصر وخالد في البيت...هذيلا مرتبشين ومستانسين..وترابعوا ورا حمدان اللي كان في المستودع اللي عدال مطبخهم وين حاط دراجته..كان يعابل فيها يشوفهااذا ناقصه شي..وترسلها بتروول وشل دبه ثانيه عشان اذا خلص البترول يعبيها... لاني يدري بالبنات بيتخبلن عليها..وجهز القالوووصه وركب الدراجه فيها وثبتها ورا سيارته...
على هالحال خلصوا قشارهم عالساعه 8.... تواعدوا في الدرب هم وقول حمد الكتبي وتلاقوا عند الدكاكييين...
قوم حمد الكتبي كانوا سايرين فسيارتين..بو خالد كان سيار في البك اب وشال عيوزه وياه...وماشي مكان لاي حد ثاني لانهم تارسين البيك اب اغراااض الرحله.... وناصر ابتلش بالحرمات... شال وياه حرمته وعياله وحرمه خالد وعيالها ومعاها حصه راكبه ورا...اما نوره وفطوم فروووهن في سيييت الدبه ...شو يسون ماشي مكان غير..
اما قوم محمد الكتبي فكانوا مرتاحين فثلاث سيايير... بو سلطان شل عيوزه وروحوا... سلطان شال حرمته وعياله رواحهم..اما حمدان شال عنود وياه ..
اول ماتلاقوا عالدرب ووقفوا عند الدكاكين عشان يتشروون بارد ورووب وداقوووس وجبس وماي وهالسوالف...وقف حمدان سيارته عدال سياره ناصر عمدا... متسفر حمدانيه ولابس ذيج النظارات الشمسية.. كانت سفرته لونها كركمي.. ونفس الشي كندووورته... بشكل مختصر كان مسسسسسسسسسكت...ومتعمد يتكشخ في هالرحله لانه يدري انه بيحتك وايد بفطيم...نزل الجامه وطلع اييده وهو يظحك بصوت عالي وياشر على غلامتين منزربات ورا جنهن قطاو..
حمدان: ههههههههههههههههههههاي...ياخي حرام عليك والله...
ناصر: شو اسوييييييييييبهن ياريال الشايب عززر الا يسير بالبك اب..
حمدان: ههههههههههههههههههههه حليلهن والله انزين انا عندي وسع خلهن حد يركب عندي منهن...
وعلى طول بدون شووور بطلت حصه الباب ونزلت لانها من الصبح مستظيجه من حشره اليهال في ثبانها..وحسدنها غلامتين ..وقامن يناقزن ورا يبن يظهرن من هالحكره باي شكل...لين ماظحك ناصر عليهن وكسرن خاطره ...جدمولهن الكرسي ونزلن..واول مانزلن صرخن...
نورة: اللـــــــــــــــــــــــــــ ــــــــــــــــه... دراجه...درااااااااااااجه ...ياسلااااااااااام..
حمدان: اركبن لا اروح عنكن...
وركبن كلهن وسلمن على عنود... حظ فطوم مره ثانيه انها ركبت ورا حمدان...ويوم كانت تركب تمسكت بالكرسي بدون قصد..ولمست جتفه..انتفظ حمدان من هاللمسه...وتمسك بالسكان بالقووووو..عقب هدى اعصابه..مجرد لمسه شاااااااارده وبالغلط شحقه اتاثر..؟؟؟

تحركوا كلهم وساروا يدورولهم بقعه حلوه ونظيفه يقيلون فيها...

:d :d :d