[شجاع عمر الأكلبي]

السلام عليكم ورحمة الله وبركاته

هذه القصيدة من بداياتي ولم يسبق لها النشر أبداً ولم تطرح في أي أمسية ولا مجلس كانت مدفونه ووجدتها ليلة البارحة ونقلتها لكم كما هي بأخطائها وشاعريتها البدائيّة موجهة للخال والشاعر الكبير محمد بن شافي الجيهاني الأكلبي وعمرها تقريبا 20سنة


تقبلوها

يالله ياخالق من اللاّش نوّه=ياخالق إبن آدم بنون ٍ بعد كاف
يامن جعلت الضعف يقفاه قوّة=ثم كبر ولا موت والكل بتلاف
أجعل لنا في مسلك الخير خوّة=وأجعل لنا في جنّة الخلد مشراف
فقم يانديبي فوق حُر ٍ فتوّة=حُر ٍ على الدرهام عاشق وميلاف
وصّل تحياتي لرجل المروّة=وسلّم عليه إعداد ماطايف ٍ طاف
ودّه لبن شافي عريب الجنوّة=الطيب ساسه والشهامة له غلاف
تلقى تراحيب ٍ وتلقى قروّة=ويذبح لضيفانه من الحيل وخراف
حاش المراجل والنواميس توّه=من بوه ورث ٍ لاببدعه ولا أسلاف
له مجلس ٍ ترتاح لاجيت جوّه=يجمع مطاليق ٍ نزيهين وعفاف
ماقال هات القاز بيشب ضوّه=كوّم حطبها وأشعل النار بالسّاف
واللي يكيّف دلّة البن هوّه=في دلال رسلان ٍ جديدات ونضاف
والبن خولان ٍ يجيبه نقوّة=تلقى مباهيره على الجمر صفـّاف
ثم بلغه بأسباب هذي اللفوّة=أبي منه في بعض الأحوال الإشراف
أبيه يعطيني الخبر والفتوّة=في بعض ناس ٍ تدعي كُمل الأوصاف
ناس ٍ على الأدنين فيهم إقسوّة=وسيوفها تشهر بريعات ورهاف
وأما على الأقصين فيهم إحنوّة=ويلبس كعب من شأن يظهر وينشاف
وأشدوقها بكل المواعظ تفوّه=وتجحد حقوق الغير وتحط محراف
فرسان في وسط البلد والحموّة=وركابهم طوع ٍ سريعات وعساف
وإن جا لزوم بعيد فيها عصوّة=مع حرانتها هزيلات وعجاف
خيّالهم وقت المحاضير بوّة=الناس تمشي قدم وذا يرجع خلاف
غرتني ضنوني بهم والهقوّة=وأثر الظنون تغر في رمي الأهداف
فلامن بغيت أسلى فلا من سلوّة=هموم ٍ تواردني ثقيلات وخفاف
عطني جوابك ياعريب الجنوّة=حيث ٍ مثلك للصعيبات عسّاف
وصلوا على المختار رجل النبوّة=للظلم طمّاس وللحق كشــّاف