الجزء الواحد والاربعين..
كان الشايب بو خالد مطير بعيووزه .. هو واخوه ماعليهم لا من نكاكيد ولا كدش ولا شي...يطيروبهن هالعيايز حليلهن... اما سلطان وناصر اللي هم ربع وااايد بحكم شغلهم رباعه..كانوا يتبعون بعض بشكل معتدل.....
حمدان ابتلش بهالشواب...يخطفوونه من درووب هو مايروم يمشي فيها عسب القالووصه والدراجه اللي وراه.. مايروم يكسرها..عشان جي كان اييهم من درب ثاني اخف شوي...البنات عنده كانن صدعه...يسولفن ويخربطن... وهو انشغل عنهن بميحد يغني وياه ويطبل على السكان... وكل شوي يلتف صوبهن ويسكتهن..يسكتن دقيقه ويردن يتحرطمن جنهن دياي... وعنود الود ودها تعفد عندهن..مفتره عالكرسي ويالسه بالعكس خاشه راسها عندهن وتسولف وياهن....وحمدان كل شوي يدزها عن القير ...يخافها تخرب عليه..
كانوا الشواب مغربلين العالم وياهم...كل مايحصلون بقعه زينه وقفوا..ويوم تتيمع السيايير وراهم على اساس بيستقرون ..ردو وتحركوا...اون لالالا البقعه مب زين ومكشوفه ومب نظيفه...لين ماطفر حمدان...
حمدان: ياخي شو هالحاله...قومن قومن بنرد البيت ..ارقد ابركلي...
عنود: لالالالالالالالالالا شو ترد البيت...والله تكمل...
حمدان: طفروونا هذي ثالث منطقه مايخلونا نقعد فيها....!!
نورة: شوابنا يعرفوون اكثر برااايهم...تحمل شوي....
حمدان: اذا ماوقفوا عند المنطقه اليايه بروح انا... موعيني من فير الله احين تسع ونص الساعه وبعدنا ماوصلنا نحن...
حصه: حمدان..دخيلك لا تعكر مزاجك....خل مزاجك حلوو عشان نستانس وياك....
سكت حمدان...مايروم يقول لحصه شي....
حمدان: ان شاء الله شيختنا كلنا....
ويوم احتشرن كلهن وغارن (ماعدى فطيم) قالهن جــــــــــــــــــــــــب.... ولا كلمه.... وكمل طريجه ورا هالشواب... وبعد ربع ساعه وقفوا جدام منطقه فيها شير وشكلها نظيف وحلو ومرتب... اول ماوقفوا وقف حمدان وراهم ونزل على طوووول ووقف في النص بين السيايير عشان مايغيرون رايهم وصرخ على سلطان..
حمدان: طفرتووووووونا....انا مابتحرك من هني كيفكم.....المنطقه زينه.... خلاص عاد..
نزل سلطان وهو متسفر تسفيره بداو اي كلام...ولابس نظاراته الكحليه..
سلطان: شبلاك انزين محتشر خلاص بنقعد هني ماشي وقت بنطبخ الغدا...
التفت حمدان صوب سيارته وهو يصفّر....وياشر بايده..
حمدان: انزلن ياصبااااااايا افراااااااااااااااااااج.....!!
وعلى طول تبطلت البيبان وتناقزن البنات براااا....ظحك حمدان عليهن وسلطان وناصر....
ناصر: عنبووووكن مب شايفات خير.....مستقطعااااااات علىهالسيره....
المهم عربنا استقروا في المكان...اليهال نزلوا يترابعووون شرق وغرب.. والشباب ينزلوا الاغراض الثقيله..والحريم فرشن هالحصر وثبتنها بحصى على الاطراف على ما اطير عليهم وحطوا الفواله والريوق للي يبا يتريق والفواكه...والدلال..... بعد ماخلصوا تفريغ الاغراض.. ركبوا حمدان وناصر وسلطان سياييرهم وصفوووها بالعرض على اساس تفصل بينهم وبين مكان قعدة الحريم عشان ياخذن راحتهن...
البنات انخشن ورا السيايير وبدلن شيلهن وعبيهن بشيل بيظ عشان ياخذن راحتهن وما تلصق فيهن ريحت الدخان والحاله..وبعدين استر ...واحسن للبر.. وبعد ماخلصن مشن اربعتهن وتحوطن يسون جوله بالمكان...
حمدان قعد يعابل دراجته وينزلها من القالوصه ويفحصها...وكان مشغول.... الشواب يلسوا يسولفون مكانهم ما تحركوا... نشوا ناصر وسلطان وساروا على طرف ...
ناصر: اماااااااااااااااااايه....!!! يا ام خااالد...!!
ام خالد: عووووووونك ابوووويه...
ناصر: عااانج الله .. تعالي هنه شوي اباج...
وسارت صوبهم العيوز وهي تعدل برقعها...
ام خالد: ها فديتك..؟؟؟
ناصر: ترا الطبخ علينا...متراهنين انا وسلطان...
ام خالد: وابوي تبون تحرمووونا العيشه..؟؟؟؟
ناصر: افا عليج يامي... انتي يلسي بس واستريحي وذوقي طبخنا...
ام خالد: ويدي مايستوي... ماتعرفوووون....
ناصر: نعرف نعرف...جي عيل منو يطبخلنا تتحسبين في سيرات البر والقنص..؟؟؟؟ الا نحن...
ام خالد: انتوا شباب تتلايمون براحتكم اما نحن ماينفع لنا سويطكم....
اطالعوا بعض سلطان وناصر...
سلطان: افاااااا ياعموه..جنها الا اهانه....هذا وانا اللي اقول بسويلج ذاك المشواااااااااي...
ام خالد: من وين تعلمت تشوي سمج ياولدي....؟؟؟
عاد ام خالد من هل الشارجه وتفهم بشغلات السمج....
سلطان: انتي بس استريحي وسلمينا المهمه... واوعدج اسويلج مشواي ماتذوقينه فعمرج..
ام خالد: كيفكم... وانته ناصر شو بتسويلنا ونك..؟؟
ناصر: انا مجبوس لحم طبعا....
ام خالد:الله يعينا على طبخكم...
وعطتهم مقفاها وراحت... تظاحكوا عليها وساروا صوب اغراض الطبخ ..ولقطوا حصى كبار شوي يصلحن قواعد للجدووور...ويوم كان ناصر يدور... شاف البنات يتحوطن... زعق عليهن..
ناصر: حوووووووووووووووووووووه....!!
التفتن البنات صوب الصوت....
اشر لهن ناصر بايده...
ناصر: تعالن تعالن تعالن.....
ردن البنات صوب ناصر ويوم وصلن قالهن..
ناصر: بتخبركن انتن يايات تتحوطن هني..؟؟
نوره: عيل شو يايين نسوي..
ناصر: يالله انتشرن لمن حطب...
وروح عنهن...عنود وحصه ونوره متعودات على هالامر كل ما اين البر لازم هن اللي يدورن الحطب واييبنه..ومسؤوليه الرياييل الحطب الكبار اما هن الاغصان الصغيره وهالسوالف اللي تخليه يحترق ...بس فطوم مسكينه التفتت لنوره مدهووشه..
فطوم: حطب..؟؟
نورة: لمي بوووي لمي حطب...هذا اللي تشوفينه طايح صغير..يمعيهن وهاتيهن هناك عدال الجدر عشان يسوون الغدا...
مشت عنها نوره وبدت تلملم اللي تشوفه تحتها...استسلمت فطوم للامر الواقع وراحت تلم هي بعد...ولمت اللي تقدر عليه وودتهن صوب ناصر...اطالع اللي في يديها وقالها..
ناصر: بسسسسس..؟؟؟ افا يابنت هلال هاللي رمتي عليه....عليج بغافه عوووده ..سيري هاتي بعد يالله هذا مايكفي....
وظحك عليها يوم شافها سايره والياس علىويهها... على بالها جي السالفه خلصت...ثرها بعدها لازم تيمع....سارت ونشنت على غااافه وعزمت الا تجلعها وتيبها لهم يمكن يسدهم...بتسوي انجاز فحياتها...
في هاللحظه حمدان نش عن الشواب يوم زهق سوالفهم شوي...وراح صوب دراجته... وشغلها..وقعد يحمييها شوي ..عقب ساقبها شوي وحاط عالمنطقه بدون مايسرع... يوم دار من ورا شاف فطوم ونقع من الظحك عليها.. ماسكه غافه وتتخاشع وياها تبا تجلعها....ظحك من الخاطر..حليلج يافطيم شو الله بلاااااااج ببداااو واهل بررر..؟؟؟ سار صوبها ووقف بدراجته ...وهي اطالعه بعين حسووووود..غيرانه انه مستانس بدراجته وهي تيمع حطب...!!!
حمدان: فطيم...!!...شو تسوين قاعده تظاربين ويا الغاف..!!!.ههههههههههههه
فطوم: شعليك ...مستانس...اخوك يقول يمعي حطب يابس...
حمدان: وانتي شعرفج بهالسوالف...؟؟؟..انتي حدج تعرفين كيف تصيدين سمجه وبعد يالله يالله..... بس ماتعرفين تجلعين لا غاف ولاتلحقين حلجه....
فطوم: شو حلجه بعد..؟؟؟؟؟؟
ظحك حمدان من خاطره....آآآآآآآآآخ ياحبه لهالبنت.... نزل من دراجته ووقف عدالها...
حمدان: يااميي لاتشوفينها صغيره تراها متغزره وايد لقل الماء..وتمد عروقها في التربه عشان تحصل الماي.. ماعطوكم اياها في الجغرافيه..؟؟؟
اطالعته فطيم باستنكار وهي تشم عطره اللي يفر الرااس....
فطوم: احيده العلوووم...!!!
مسك حمدان الغافه... وابتعدت شوي فطوم عنه...
حمدان: تراه كله رياضيات نفس الشي....
ظحكت فطيم ... جلع حمدان الغافه بكل سهوله...الشي اللي خلا فطيم تفج حلجها...من الصبح تظارب ويا هالغافه ماطاعت تتحرك من محلها واحين حمدان في ثانيتين جلعها ..!!!!...صدق اني استويت رخوه...!!
نفظها حمدان شوي عن الرمل وعطاها فطوم وهو يظحك لها ظحكه فنانه....
حمدان: اندوج...روحي تخققي عليهم...لا تقوليلهم اني اناجالعنها لج...
استانست فطيم وشلت الغافه ومشت صوب ناصر..وهي تقول لحمدان..
فطوم: اسميني مابقووول...مشكووور حمدان....
ظحك حمدان عليها ورد ركب دراجته يكمل حواطته...
وصلن فطوم عند ناصر اللي كان يعدل الحصى تحت الجدر...ونوره عداله تكسر الحطب الكبار...وحصه وعنود سارن يلقطن حطب ثاني...شافها ناصر وهي شاله الغافه كانها شاله كاااس فايزتبه...وظحك عليها وظحكت نوره..
ناصر: اوووه اوووه بنت هلال ...يااااابعدي والله...هي توج استويتي بديويه...حطيها هنه وكسريها...
استانست فطوم من هالمدحه...وقعدت تكسر في الغافه لاجزاء متوسطه تصلح تنخش تحت الجدر...
حريم العيال كانن موزعين عليهن الشغل... اللي تعبال بالسمج واللي تعابل باللحم.. واللي تقص بصل واللي تقص طماط.. يعني الكل كانت مرتبش محد مرتاح غير العيايز والشواب...وحمدان...
عنود ماصدقت تخلص شغلها..سارت سيارة حمدان وطلعت الكاميرا وبدت بالتصوير..واسميها ماخلت شي ماصورته ولا فظيحه صغيره ماطلعتها...تبا تحتفظ بكل الذكريات الحلوه هذي...بس ياخساره ناقص عبدالله وخليفه فديتهم وفديت السيره وياهم....!!...ياترا شو مسوين بامتحاناتهم الحين..؟؟؟ الله يوفقهم ان شاء الله..
نوره عيزت من اليلسه والدخان سارت ويلست عند شيبتها وعمها...تسولف وياهم وتقرا الجريده... اما فطوم قعدت مع عمتها تريح عيونها من الدخان لانه عيون فطوم وايد حساسه...ومن اقل شي تدمع وتحمر..
حصه كانت واقفه مع عنود وتخربط وياها وهي تصور وكل شوي تلفت نظرها لحد معين ويظحكن...
كانت الساعه 12 يوم رد حمدان بدراجته ووقفها...نوره اول ماشافته فرت الجريده وركظت صوبه...
نورة: حمدان حمدان حمداااااااااااان...دخييييييييي ييلك..
حمدان: لا...
نورة: لا والله يا تخليني قووووم....
حمدان: بعد الغدا انزين مب الحين....
نورة: لالالالالا بعد الغدا عندنا مخطط ثاني قووووووم...
حمدان: شو مخططه بعد ...خلي الدراجه ترتاح شوي...
نورة: يالله يا خريطك الدراجه شو تبا بعد من الراحه..!!!..يالله يالله فدييييييييييييتك...
حمدان: يوووه لا اتفديني اخاف عرب يغاروووون عقب...
التفتت نوره لفطوم اللي يالسه عدال عمتها تاكل موز...
نورة: العرب لاهين عنك ولا حفلوووووك..يالله يالله حمدان قم...
تنهد حمدان ونش عن دراجته وتفيزرت عليها نوره..
حمدان: تعرفين كيف تسوقينها..؟؟؟
نورة: هي هي اعرف...
حمدان: يالشيطانه....لا تزرين عليها وايد عن تخترب....ولا تتشطرين وتروحين نكاكيد ترا والله ان انجلبتي انا مالي خص فيج....
لبسته نوره وحركت الدراجه وطااااااااااااااااااااااارت... وحمدان يظحك عليها ..وامها ناقمتنها بعين...وحصه وعنود يصورن وهن ميتات من الظحك على شيلة نوره اللي طايره وراها تقولون ساحره... يتهن فطوم وهي ميته من الغيره....
فطوم: والله لو شافها سعيد بيعطيها كفففففففف...الا جان دراجته هو ماعليه....
حصه: ههههههه مينونه نوره ياناس...
فطوم: ابا اسووووق....بس اخاف....بس ابا...
عنود: ههههههه احين يوم بترد نوره سوووقيبها...
فطوم: بيخليني اخوج.؟
اطالعن عنود وحصه بعض...ابتسمن وهزن راسهن بقو بالايجاب....حمدان يحب فطيم ومابيردلها طلب...بس نوره ماردت الا عقب ربع ساعه..ويهها محمر ومستانسه بهالحواطه...نش حمدان يوم شافها ومسك الدراجه عنها..وفي نفس الوقت ين عنود وحصه وفطيم...
حمدان: هاااااااا جنعتي..؟؟؟
نزلت نوره عن الدرجه.. والابتسامه شاقه الحلج...
نورة: لا... بس ايدي عورتني احس فيها مثل الكهربا تمشي.....
حمدان: هذي الدراجه تهتز جي ..مب قوية كفايه انتي عشان تمسكينها....
حصه: حمدان...فطوم تبا تسوق....
رفع حمدان نظره لفطوم اللي نزلت عيونها وهي منحرجه..
حمدان: من عيوني...تعرفين تسوقينها...
هزت فطوم راسها بالنفي....
حمدان: تبين تركبين وراي.؟؟؟
وظحك ..معروف انه يمزح عشان جي ماخذت فطوم المساله بجديه...بس اصلا حمدان كان يتمنى....
فطوم: هي عشان تيننبي تنقزني على هالعراقيب...لا ابوووي..مب راكبه وراك..
حصه: هههههههه انزين نوره بتسوقبج ركبي ورا نوره...
فطوم: لالا...علوموني وبركب ارووحي....
حمدان: انزين..يالله ركبي...
قفطت فطوم بشكل..كيف تتشلح واطلع سروالها جدام حمدان.!!!...وافظيحتااه..بس زين ان الكندوره وسيعه شوي وتروم تنزلها..ركبت فطيم الدراجه وهي تراقب ايد حمدان وهو يعلمها كيف تسوق...واخر شي قالها...
حمدان: لا تسرحين بنظرج وتعفدين على سمره والا شي...ولا نكاكيد...اخافج تنجلبين يافطيم..
فطوم: مابنجلب...
تم حمدان يطالعها خايف عليها...فطوم غافة مارامت تجلعها ...بتروم تمسك مكينه دراجه تهتز..!!!.. تم متردد مب عارف يخليها تسوق او لا..بس مستحيل يخلي هالشي فخاطرها..خلها اجرب بنفسها....
حمدان: لا تهوسين وايد على هذا...عشان ماتسرعبج الدراجه واطيرين... تسمعين..؟؟ شوي شوي لا تتفننين..
فطوم: عاد انته لا تخوفني.....
ابتسم حمدان...
حمدان: حافظنج الرب... يالله انطلق..
وانطلقت على قوولته فطيم....وامحق ذاك الانطلاق...تمشي شوي وتوقف...شوي وتوقف...شكلها كان ينقع من الظحك...يبين انها خايفه...حمدان مارام يتم واقف من الظحك....ويلس عالرمل..
حمدان: دخييييييييييييييييييلج عنود صوري لا تفوتينها دخييييييييلج...
ومات من الظحك مره ثانيه....والبنات كلهن يظحكن وفطوم ماعليها من حد....وايد مركزه على هالدراجه ...ومب حافلتنهم لاهم ولا ظحكهم عليها...كملت عنود تصويرها لفطوم وهي تظحك... في هاللحظه يتهم ام خالد تربع...
ام خالد: حسسسسسسسسبي الله على بليسكم جانكم تبون تنفدون البنت....
حمدان: طالعي شقا تسوق عمووه بالله عليج ..مابييها شي ان شاء الله..
ام خالد: يابووووي هذي اماااااااااانه عندنا موصاااي عليها البنت وانتوا جي تسووبها..
نورة: امايه ماسوينابها شي ارووحها بغت..
ام خالد: انتي جب....مسوده الويه...متقيعستلي على هالدراجه لا تستحين ولا تخيلين ....من شافج غارت منج والا البنت مابتطلب هالمنكر...
نورة: السموحه منج امايه انا يايه استانس واخذ راحتي...واذا ماخذت راحتي بين اهلي عند منو تبيني اخذ راحتي عيل... خلينا نستانس ولو يووم لا تنكدوون علينا...
ام خالد: حسبي الله عليج من بنت لسانج طويل ما تنرامين بنت حمد...طالعه على ابوج....
سارت عنهن ام خالد تشوف اخبار الشوي عند سلطان...اللي سار بعيد شوي عشان مايكدس عليهم الذباب...
ردت فطيم مسكينه بعد خمس دقايق وايديها متخشعه....مسك حمدان الدراجه وهو يظحك...
حمدان: هااااااااااااا..؟؟؟؟ ..
فطوم: يابوي خشعتني دراجتك والله ...خلاص جنعت... باييني ذرع منها اليوم...ما بروم ارقد...
حمدان: سلاااااامتج يالطويله...
ويلس عالدراجه... عنود فرت الكاميرا على نوره وهي تناقز عدال حمدان...
عنود: دوووري دوووري...
حمدان: خيبه بتنقد عليج عمتج....
عنود عاد كله ولا عمتها ....وايد تعزها وتحبها وتحترمها..وماتباتخيب ظنها...بس عنود تحس نفسها بعدها صغيره على هالتعقيدات والالتزامات....
عنود: لالا ما بتنقد... بركب وراك...عادي..
حمدان: يالله انزين...
وركبت عنود ورا حمدان وتمسكت فيه بقووو...
حمدان: يابووي لا تلصقين ماعرف اسوق جي..
عنود: لا ابوي...اخاف على عمري وراي عرس...
حمدان: وراج عرس..؟؟ انزين ماعليه....
طار بها حمدان وسمعوا الصريخ ...وقام يوديها على نكاكيد ويقفزبها وهي ميته من الخوووف...يباها بس اتووووب انها طلبت منه...وهو ميت من الظحك عليها...بعد ثلث ساعه كسرت خاطره ونزلها ورد يحوووط شوي بدراجته...
ولين ما رد حمدان كان الغدا جاهز ومحطوط والبنات ساعدن في هالشي ..غسلن الصحووون وعدلن ووزعن الروب والداقوس والبارد وهالسوالف... حطوا للحريم غدا بروحهن من الصنفين...والرياييل بروحهم...وتغدوا...
وبصراحه كان غدا ولا اروع...كلنا نعرف ان طباخ الظووو غييييييير...وله نكهه مميزه..خصوصا ان شيهتك تكون مفتووحه في الرحلات.. هذا غير انه ناصر وسلطان تفننوا....هل الشارجه ام خالد وفطوم يحبون المشواي وهذا شي طبيعي...ونوره بعد كلت منه وظحكتهم يوم قالت انها لازم تتعود وتكون من احين من هل الشمال...حتى عنود وحصه كلن منه ومن الصنف الثاني بعد... خص ان حصه تموت على اخوها ناصر وماتحب تكسر بخاطره ..ومب بس هذا السبب..لكن طبخه صراحه يشهي...مجبووس عدل...خص عاد يوم يكون وياه روب وداقووس وانته في البر...اوفففففففف...ماشي وراه امممره...
بعد الغدا اشتغلن الحريم والبنات حليلهن بتغسيل المواعين...فطيم بلشووها...عاطينها كم صحن تغسلهن...
نطت لها ام سلطان..
ام سلطان: يامييييه مب جذه الله يهداااااااااج...
فزت فطوم...
فطوم: هاا...شو خالووه..؟؟
ام سلطان: بنتي الله يهداج عبرتي الماااي... مايصبون حق كل صحن ماي من اول ويديد جذي بتعبرين الماي...!!!
يتها نوره تنقذها من الموقف...
نورة: خلاص عموووه ام سلطان انا وياها....
روحت ام سلطان عنهم تشرب شاهي...
فطوم: انا شو سويت..؟؟
نورة: فطوم... انتي جي بتخسرين الماي...صبي فلقن مااي وغسلي منه كل الصحوون...
فطوم: بس جي مابينظفن عدل...
نورة: هذا تغسيل مبدئي... عقب بيغسلونهن زين في البيت..بس المهم مايخيسن السياره...بعدين الاوليين جي يغسلووون ... ماعندهم مااي اول...
فطوم: اسميج انتي وولد عمج كل حد يعطيني محاظره من صوب اليوم...غسلي غسلي.....اندووج..سمعي....!!..و ابوووييي منو ينقع ..؟؟؟؟
نورة: هذي مسجبه ناصر والا سلطان...هذا شي طبيعي بعد الغدا يستوي..
قالت فطوم وهي زايغه على بالها حرب والا ينقعون على حيوان او شي..
فطوم: شو يستوي..؟؟؟؟
نورة: يحطووون صلب زقاره...والا غطاة دبة ماي...ويقعدون يختبرون مهارتهم بالرمايه... خليهم يشبعون منها بنطيحبها نحن عقب...
فطوم: خيبه تعرفين تنقعين بعد..؟؟؟
نورة: انا وحصه وعنوود..معلمنا ابوويه الرمايه من كنت انا عمري 10 سنين...
وظحكت نوره...وفطوم قامت تشك ان هالعايله مجرمين...والله محد هين فيهم...
كملن تغسيل وشربن شاهي... وترين لين ماخلصوا الشباب لعبهم بالمسجبه....ركبوا ناصر وسلطان سياره ناصر وساروا يحوطون شوي...والشواب بو خالد وبو سلطان متسدحين على حصير ثاني عاد اونها قيلوله...وحاطين سفرهم على ويوههم... وحمدان يالس ارووحه يقرا الجريده وعداله المسجبه والرصاص...شافتها عنود فرصه...وتقربت من شلة البنات وقالت...
عنود: يالله بنات هجووم..دوورنا...
فطوم: وين بتسيرون..؟؟؟
حصه: نستولي على المسجبه...
فطوم: انابديت اشك فيكم الصراحه...سفاحات....
تظاحكن عليها وشلنها وياهن....لازم يعلمنها الرمايه والا ماستفادت شي من يلسه العين...سارن البنات ويلسن عدال حمدان وعلى ويوههن ابتسامه عذبه يبن يقردننه...بس فطوم اللي مب فاهمه كيف ان بنات عمتها الرقيقات يعرفن الرمايه كان على ويهها ملامح على شكل علامه تعجب (!) ....
رفع حمدان نظره عن الجريده وهو يسمع حسوس اليهال يلعبون في مكان قريب....اطالع في ويوههن وحده وحده...ويوم وصل عند فطيم عقد حياته...
حمدان: اوامركن شيخاتي..؟؟؟؟
عنود: المسجبه فديت روحك...
حمدان: هه..!!..ده بعدك...ماتشوفين العيال يلعبون تسوين تسويلنا مصيبه..!!
نورة: نحن نعرف كيف نرمي حمداااان..ومش كمبتدئات بعد...
حمدان: هي بس في السنه حسنه ترمن..وانااخاف ان واحد من هالعيال يركظ جدامكن...
حصه: لالا..بنرمي هاك الصوب هناك شمس والعيال مايلعبون هناك ولا بيووونا...
حمدان: حتى انتي حصه..؟؟؟
حصه: ياخي احب الرمايه...ونبا نعلم فطيم....
انتبه حمدان ان فطيم طلع الرعب فويهها وعرف انها لا تبا تتعلم ولا شي ..بس حشر مع الناس عيد...
هز حمدان راسه..
حمدان: عز الله يبتلنا مصيبه اليوم جان بعدكن بتعلمن...
نورة:انزين انته علمها..
كفخت فطوم نوره على كتفها... ونوره ظحكت...وحمدان احمر ويهه..اول مره يحس بالاحراج...ومب من الكلمه او من فطيم ..بس من اللي تخيله ويا على طول في باله...اذا بغا يعلمها لازم يتقرب منها بشكل كبيييييييير...ومجرد الفكره هذي سببت له ارتفاع في الحراره...
حمدان: ماريد لعب انا...بحط لكن رهااااان....
عنود: شو الرهان..؟؟
حمدان: الرهان الله يسلمج اني بحط لكن صلب زقاره من زقاره ابوويه... على ذاك النكوود تشوفنه..!!
واشر على نكوود مش بعيد وايد...ورد صد صوبهن...
حمدان: لكل وحده منكن خمس طلقات...اذا صابت وحده منكن صلب الزقاره بوديكن السينما كلكن.. بس ماشي اكثر عن خمس طلقات ولا لعب من وراه...
نورة وحصه وعنود تلفتن لبعض وهن مبتسمات ومتفائلات وحاطات سيرة السينما فجيبهن....سيرة السينما كانت ممنوعه عليهن ولا كد طاحنها ولا شافن شكلها... عشان جي قعدن يصرخن ويظحن ويصفقن مستانسات...اما فطيم اتجتفت وهي اطالعهن بفضول لانه مب متفائله بشي من ناحيتها...اذا سلموا من رصاصاتها وايد زين....!!!
نورة: تمام...بس علم فطيم اول لانها ماتعرف وخلها اجرب طلقتين ثلاث بعدين عطها الخمس طلقات مالها...
تردد حمدان وترددت فطيم....
حمدان: اوكي.. تعالي فطيم..
ماعرفت فطيم شو تسوي تقربت شوي بقعدتها وشلت المسجبه ..كانت مجابله حمدان...وبدون قصد منها كان المسجبه بعد مجابلتنه..اطالعها واطالع المسجبه..
حمدان: لهالدرجه تكرهيني تبين تنقعين فصدري..؟؟؟
انتبهت فطيم وبعدت المسجبه...
فطوم: لاا والله..هههههه سوري...
حمدان: انزين صدي هناك.. قعدي عدل ورفعي ركبه وحده واسندي عليها المسجبه...
راحت فطيم وسوت اللي طلبه منها بس حطت مسند المسجبه فوق جتفها وتناقعوا كلهم من الظحك عليها...
حمدان: مب جذه...(مسك المسند وعدله جدام جتفها)...جذي... احين تشوفين هذا الخط الي جدام..هذا صوبيه على الشي اللي بتنقعين عليه... وبنفس الوقت الخط هذا خليه بنص الدايره هذي اللي هني....فهمتي..؟؟
هزت فطيم راسها بالايجاب وهي مناك مب فاهمه شي...
حمدان: اوكي هاتي بحط لج رصاصه...
حط لها رصاصه ومن ساعتها فطيم زايغه تشلها... بس تشجعت ..دام بنات عمتها يعرفن وماخذات الامر بسهووله هي شو قاصره عنهن..؟؟؟؟ رجعت لوضعيتها ...
فطوم: عاد على شو اصوب..؟!..
دور حمدان شي عداله ومسك غرشه ميرندا فاظيه وبطل الغطاه وفرها بعيد....
حمدان: تشوفينها..؟؟؟؟
فطوم: هي..
حمدان: يالله نقعي.....خلج ثابته..
ونقعت فطيم وفزت في الوقت نفسه ...وطبعا ماصابتها..
جمدان: فطيم لا تتنفسين يوم بتين تنقعين...يوم تتنفسين تحركين نفسج انتي والمسجبه ويظيع عليج التصويب...
وحط لها رصاصه ثانيه... ومايابتها بعد...فرتها على حمدان..
فطوم: يابوووي والله ماعرف ارمي....
حمدان: بتتعلمين قريب....
عنودي: انا دوري...طلع صلب زقاره حمدان...
طلعلها حمدان صلب الزقاره وسار يركزه حقهن... وفطوم تراقب عنود وهي تفتح المسجبه وتحط لها رصاص وتسكرها كاي احترافيه....والله كانها تتعامل مع علبه مكياج....شو هالبناااااااااااااااات...!!!!. ..بس صراحه اذا صارت حرب ينفعن....يعتمدن على عمارهن ويدافعن عن نفسهن....الله لا اييبلنا الحرب ان شاء الله...
رد حمدان ويلس... عنود خلصت طلقاتها الخمس ولا صابت شي بس كانت كله تيبهن شحف...وتحت..يعني زوينه ...بس هي لانه نظرها شوي ظعيف عشان جي ماتشوف عدل...ومايابت نظاراتها طبعا...
اتجدمت حصه وخذت المسجبه وخذت طلقاتها الخمس...في الطلقه الثالثه طاحت الزقاره...وصرخت وصرخ حمدان وياها مستغرب...
حمدان: لحظه لحظه...بسير اشوفها..
كان شاك بانها شحف...وان الرصاصه دزت الصلب لا غير..لو كانت مصوبه عدل جان قصته من النص...سار حمدان وسارت وياه حصه يشوفونها..وفعلا طلعت شحف والصلب صاحي الا من شطف صغير على طرف...
حصه: انزين ينحسب...
حمدان: لااااالالالالالالا...انا قلت تصيبنه مب تشحفنه....
حصه: حمدااااااان عاااد...
حمدان: اسف..الحق حق...باقلج طلقتين وعقب نوره....
رد ركز الصلب مثل ماكان وردوا قعدوا...وخلصن طلقتين حصه وهي بعدها مايابته....بس كله عداله تيبهن...حتى انها ظربت القوطي اللي ورا الزقاره على طول...بس الصلب نفسه مايابته...يا دوور نووره...هذي محترفه مسجبه لانها تموت على سوالف الشباب..ويعيبها تسوي مثلهم..خذت المسجبه ..اولى ثانيه وثالثه مايابت الصلب....اللي وترها حمدان اللي يظحك عليها...بس سكتت شوي وهي لابستنه وهدت اعصابها شوي..وحطت الرصاصه الرابعه وهي مصصره انها تيبها هالمره.... كان عنود تصور هاللقطه...وقالها حمدان تركز على الصلب عشان يشوفونه...وهذا اللي صار...وخذت نوره وقتها كامل في التصويب....ويوم هدت المهب شويه عنهم...نقعت نوره وطار الصلب فوووووق ...صرخت نوره وصرخت فطوم وياها من الحماس...
حمدان: شحف شحف شرات اختج...
فطوم: لالا انقسم نصين انا متاكده....
نورة: لا تحاول الغالي..وجهز نفسك على سيره السينما...
حمدان: صبري انزين بشوفه...
سار حمدان وماحصل غير نص الصلب والنص الثاني الله اعلم..ورد ماسكنه وهو يظحك...
حمدان: غربلاااااااااااااات نورووووووووه والله يابته هههههههههههه...بنت ابوج واخت اخوج مب هينه...
نورة: بسم الله علينا من العين.... يالله حط صلب ثاني حق فطوم..
فطوم: لا يابوج.مابا..خشعتني الدراجه واحين المسجبه ..ماريد ..
المهم قعدوا يسولفون شوي..ورد حمدان المسجبه في سياره سلطان عشان مايلعبوبها اليهال...ويوم قرب العصر وردوا قوم ناصر...صلوا العصر..وبدت شغله بو خالد الحين...بيسويلهم قرص معتبر....وعاينين العييينه في البيت من اول..سووا الجاهي حليب ويمعوا اليمر وسوووا حفره عشان يسوي فيها القرص...
اما البنات ما ادخلن في هالسالفه.....طلعت لهم نوره بمنكر ثاني...
نورة: حمدااااان...
حمدان: ننننننننعم...؟؟؟
نورة: حوطنا شوي بسيارتك...
استنكر حمدان الطلب...
حمدان: شووو..؟؟؟
نورة: يالله عاد زهقنا قاعدين بمكان واحد ..حوطنا شوي حوالي المكان...
حمدان: انا عيزت من طلباتكن كل شوي وييتني..!!!
نورة: عشااااااااااااااان عرب...بليز...
حمدان: نوروه ترا ذليتيني بهالعرب....ليتهم مفتكرين..!!
نوره: محد قالك اطفربهم...
حمدان: يستاهلون....يالله ركبن انزين انا بعد اروحي مليت من اليلسه....
ربعت نوره واستاذن من ابوها انهن والبنات شوي بيتحوطن عالمنطقه مع حمدان وماعارض...ويوم ابوها ماعارض..امها ماسوولها سالفه ههههههههه...المهم الشيبه موافق....
ركبت عنود عدال اخوها ونوره وراه..وفطوم في النص وحصه ورا العنود...وقام يحوطهن ويركبهن نكاكيد عاااليه ويقعدن هن يظحكن مستانسات وفطوم متمسكه بالسيتات وتصارخ...تموا علىهالحال فتره..وفطوم طفرت من هالغلاسه اللي يغلسوونها عليها... تقربت من حمدان بشكل لاارادي.
فطوم: دخييلك حمدان انزل انزل...دخييييييلك لاتسوون فيني جي انا اتروع...
التفت حمدان صوبها وهو يحس بالحنان من طلبها...كسرت خاطره وماهانت عليه...ومب حمدان اللي بيقعد يتلذذ بخوفها على اخر الزمن....
حمدان: فاااااااالج طيب بنت هلال....آسف والله....
ونزل من النكود شوي شوي عشانها... وقام يمشي في اماكن منخفضه...بس مطير..نوره وعنود من زود ربشتهن بطلن الدرايش ووقعدن عليها وهن متمسكات بالمقابض داخل السياره.. (يعني يالسات على فتحه الدريشه....)... وحمدان يتحظى عليهن..وفطوم مساكه كندوره نوره عن اطيح..وحصه تظحك عليهن....
ويوم وصلوا السيح وطلعوا عن الرمله كان حمدان بيلف وبيرجع...
نورة: صبر صبر صبر....حمدااان... وقف...
وقف حمدان السياره...ودخلت عنود ونوره داخل السياره ...بطلت نوره الباب ونزلت....
نورة: انزلن اباك فسالفه....
حمدان: الحين عاد...
نورة: انته تعاااال شوي..
استغرب حمدان طلبها ..نزل من السياره وسار صوبها واول ماوصل صوبها ربعت نوره وقعدت مكانه..وسكرت الباب وراها...
حمدان: لا تفكرين....
نورة: انته واعدني تعلمني السواقه....
لصقت فيها فطوم من وراها...
فطوم: نوروه شو هالخبال بعد..؟؟؟
حمدان: انتي..تسوقين الرنج مالي انا..؟؟؟؟ تحلمين صدقيني..
نورة: مالي خص بتعلمني...
حمدان: يانووروووه لا تصدعين راسي الحين قسم بالله مافيني عليج...
نورة: اول مره واخر مره اطلب منك..عقب بيي عبدالله وبيعلمني والا سعيييد...
حمدان: تريييهم لين مايعلموونج هم...تسوين تجارب على الرنج مالي انا ليش؟؟
نورة: يالله ذبحتنا بهالرنج...ماشي شير عدالنا ولا اي شي ممكن اني اشحف به السياره.... بس علمني اساسيات وخلني اسوق شوي وبنزل والله....
حمدان: اوففففففف....بنت حمد لسانج طويل...نزلي عنود ركبي ورا...
نزلت عنود وركبت ورا عدال حصه....وركب حمدان جدام....وقعد يعلم نوره كيف تسوق وكيف تبدل وشو تسوي...وهو متروع من الخاطر على سيارته العزيزه....بس نوره شاطره وبسرعه تتعلم اللي تبغي تتعلمه...وبالتالي ساقتبهم دورتين وعقب نزلها حمدان بالغصب وركب سيارته وروح صوب الباقي... ويوم نزلن...
حمدان: بس عاد لا تردن لي تبن شي ثاني بسكن اليوم....
حصه: لا مشكووووووور والله ماقصرت....انته خليتنا نستانس بالسيره...
حمدان: الحمد لله..هذا المطلوب..ويالله جلبن ويوهكن..
وخلاهن وراح عند عمه اللي يعابل القرص ...
ويوم قرب المغرب شلوا قوم حمد قرصين بيدقونه في البيت..وقوم محمد قرصين حقهم بعد...يعني تقاسموهن...ولموا اغراضهم وردوا البيت والبنات كلهن ركبن مع حمدان عشان هو يوصلهن....
وكانن تعبانات ومنهد حيلهن وحمدان اخس عنهن...وصلهن البيت ونزلن حصه ونوره وفطيم ورد روح صوب بيتهم هو وعنود....
كل حد اول ماوصل سار يتسبح ..وبعد ماخلصوا كان خاطرهم يرقدون بس ام خالد عزرت عليهم ياكلون من القرص ويتعشوون شوي عقب الرقاد....وكان القرص بعد مادقووووه لذيييذ مع سمن وشكر..وحد حطه مع حليب...وبعد ماخلصوا ساروا على طوول يرقدووووون بدون مايفكرون باي شي من زود التعب...
.