إلى أبصرت بالدنيـا تكـدّر لـي الصافـي=تعذّر زماني مـا حصـل صاحـبٍ صافـي
أفيّض عليه أسـرار مـا التـجّ بالحشـا=وكـل شعيـبٍ لـه مفيـضٍ إلـى طافـي
ومن عاش مـا لـه فـي زمانـه منـادم=تجرهم عمى رايه علـى جـرف ميهافـي
تخيّـر مـن أجناسـك رفـيـقٍ تــودّه=وثيـقٍ غميـق الفهـم للعلـم عـرّافـي
يتحمـل زلاتـك ويبصـرك مـا خـفـى=للقـلـب دربـيـلٍ للابـعـاد كشّـافـي
وراغم علـى الخـل القديـم ولـو سهـا=واصرم إلى بـان الجفـا لـك والاجنافـي
وترى ذهـاب الذهـن عشرتـك لاحمـق=يجوّز طغى جهلـه علـى حلمـك الوافـي
وترى عذل من لا يرعـوي لـك جهالـه=كما وصف من ينفخ بكيـرٍ وهـو طافـي
ومن اغتنى باريـاه عـن شـور ناصـح=تندّم ويِكشف لع إلـى شلـف مـا عافـي
ومن خاطب الجاهل فهو مثل مـن كشـف=وجهه وقابل شعف عاصـوف الأصيافـي
ومن لبْس تاج الكبر مـا صـان عرضـه=ولو ممطرٍ جـوده علـى الخلـق هتّافـي
ومن شـال حمـل الـزوم كـاد امتحانـه=ولا حمّـل الله عاجـزٍ حمـل الإسـرافـي
ومن طاول أطول منه مـا استـرّ ساعـة=يجاهـد جنـودٍ ينقسـم رايهـا أنصافـي
وتكلّفـك بامـرٍ مــا عـنـاك عـذالـه=وتبرّيك عمـا كـان يلزمـك لـه قافـي
ولا تسلـك إلا مسلـك الديـن والتـقـى=ولا تنزل إلا فـي عـلا روس الأشرافـي
ولا تصـافـي كــود حـيـدٍ سمـيـع=غيورٍ على الصاحـب نصـوحٍ وميلافـي
ولا تلـوم النفـس فـي جـاري القـضـا=ما لك عن المقسـوم يالعبـد مـن لافـي
وباشـر هـل المعـروف منـك بتواضـع=وهـل الشـر بادرهـم بشـرٍّ وتستافـي
تـرى اللئيـم إن لان لـه منـك جـانـب=توطّـاك ويـوري إنـه يخيـف ويخافـي
فالعوشزة لو هي على النيـل مـا أثمـرت=بوردٍ ويقوى الشـوك والغصـن غريافـي
وكم جاهـلٍ صـوّل علـى غيـره القضـا=ويجـرّم بفعلـه مسلـمٍ غافـالٍ غـافـي
وكـم بخيـلٍ فــرّش الخـلـق مـالـه=وهو منه محـرومٍ علـى نفسـه اتلافـي
كوصـف إبـرة عريـانـةٍ دبّ دهـرهـا=وهي تكسي المخلوق من قمش الأصنافـي
فالمـال لـه حـقٍّ حلاتـه مـع الفتـى=يضـرب بـه المجـرم ويبذلـه للصافـي
فمشيـي علـى حـدّ الصـراط متحسّـر=لما آقف بقعرٍ في لظى مـا لـه أطرافـي
ولا أقصـد لئيـم طالـبٍ منـه حـاجـة=لو هي بكفـه حـال دونـه جبـل قافـي
وترى الطبع ضلعٍ مـا يـزول ولـو نـزل=زحل في منزل المرّيخ ما افتـرّ بعسافـي
وجلوسـك مـع الفهـم مـمـا يفـيـدك=ومع البهم يطبع ران قلبـك عمـىً خافـي
ولا تبـدي أسـرارك لـمـن لا يـسـرك=رى أكثـر نصاحـك يريـدون الإشرافـي
ولا تـوري الرقـة إلـى اوزمـك همـة=تِرجف به الصافـي وتِفـرح بـه الجافـي
فصحيب العيا والعجـز مـا أدرك مرامـه=يفوته وهو يذري علـى راسـه السافـي
ولا تِتّبـع راي السفـيـه مــن الـمـلا=غضوبٍ على أدنى الـدون للخـل نكّافـي
ومـن عـاش يـزرع بالتمانـي رياضـه=يحصـد الهـوا ويوافـي الغبـن يستافـي
ودمـار العـمـار بــدار ذلٍّ مقـامـك=ولو تربة أرضـه تِنبـت اللولـو الصافـي
وبالعـز لـو فـي راس حـزم تـرومـه=لكنـك فـي جنّاتهـا مـرغـدِ غـافـي
ومـن شـاف بالدنيـا قبـول كمـت لـه=بْخيـلٍ مغاويـرٍ وهجـن لـه أردافــي
ومـن رامهـا عشقـان واغـري بحبهـا=فسـوفْ يـرى منهـا تناكيـر وعيافـي
ولا تكتـرب لامــرٍ تـقـدم همـومـه=ترى صعب الأشيا ما اعترض لك بالأصدافي
فالى اشتدّ حبل وسار سـوٍّ تـرى الفـرج=قريبٍ ب(ألم نشـرح) دليـلٍ وهـو كافـي
فبين افتـرار الصبـح والليـل كـم حـدث=يسـرٍ بعـد عسـرٍ والأيــام زلافــي
وابـرم دواليـبـك بالأسـبـاب ربـمـا=تِـوافـق مفـتـاحٍ للأقـفـال ويكـافـي
فمـن راس صعبـات المشاكـل بـرايـه=أدرك بـه أشيـا مـا ينولـه بالأسيافـي
بعـزمٍ فـراي العـزم كـم فـك مشكـل=ونجّم فلا تدري الشهـر وافـي او هافـي
وتزمّل عقـول أهـل التجاريـب واجتنـب=بالأريا عمى رايٍ مـع الخـوف رجّافـي
وأنا عن معانـي كـل مـا قلـت عاجـز=سراجٍ لغيـري محـرقٍ نفسـي أنصافـي
ركنـت نفسـي للهوى يـوم لـي بــه=مـرامٍ وشفّـي فيـه ميـاس الأعطافـي
خدمت القلم والطـرس للشـوق مصخـر=بعساف شرفـات القوافـي علـى القافـي
فإلى جـزَت نفـس الغريـم مـن الهـوى=فـلا ينفـع المسنيـن تذكيـر الأريـافـي
سنينٍ توالـت يـوم لـي بالهـوى هـوى=حربت الكرى ما أذكر بها ساعـةٍ غافـي
وصدّرت ولا يغنى الفتى ذكـر مـا مضـى=لا عاد عن طلـب الهـوى معطـيٍ قافـي
كذا البدر يطغى في بروجـه إلـى انتهـى=ويكسف ويِصحي صافـيٍ يـوم الأنصافـي
سلامي وتسليمـي علـى شافـع الـورى=دعا الملـك القـدّوس والـروس كِشّافـي