[ماجد الزيد]

( 2 )

ياديرتي سمـر الغرايـب قبالـه=بشرقي أجا يازين زمة حيـوره*
يازين ميوتهـا* وبـارد ضلالـه=كنه من الجنـه تطاهـا نهـوره
لكـن لجـات العساكـر محالـه=أو محمل الشامي تطابل زمـوره
من فوق دفاسـه تعـادي محالـه=وماء يحدره الوالي من وعـوره
حزة طلوع سهيل ياما عنـا لـه=من البدو زافات تطابل سفوره *
لو جمعت كل البـوادي رحالـه=أقفت من الهطالي تناضح سيوره
خطو الوديه شلتـه مـن هبالـه=بوع الى أصفرات مثاني عـذوره
بالسيف حامينـه بواتـع رجالـه=من كل طماع يبي من عشوره *
ماساقت الخاوه لحـي عنـا لـه=ولاظنتي تاخي في توالي عصوره
الله يثبـت بالمـعـزه رجـالـه=مابية عـن ميـل حكمـه وزوره
للغرس ندني من ضرايب جمالـه=حيل قنت غالي الشحم في ظهوره
تجـذب دلـي مبهمـات حبالـه=من فوق مطوي تساعـل بكـوره
يزوغ عقل اللي مشـى بالعمالـه=يزوغ عقله يوم ينهض بصـوره

بالسيف حامينـه بواتـع رجالـه=من كل طماع يبي من عشوره *
ماساقت الخاوه لحـي عنـا لـه=ولاظنتي تاخي في توالي عصوره

يقول الأديب سعد الخلف العفنان التميمي :

هذان البيتان لايعادلهما فيما إطلعت عليه أو وصل إلى أسماعي

من أشعار نجديه على مدى القرون الماضيه إلا بيت واحد

لمحمد أبو دباس وهو يخاطب إبنه حيث قال :

يادباس مايصبر على البق والحاس=إلا الـذي مالـه بنجـد عشيـره

فالتعبير في هاتين الحالتين هو تعبير عن مكمن عزة حقيقي يشمل الجميع بحيث

لايتأتى لأي فرد أو جماعه كائنين من كانوا أن يتجاهلوه أو يتعالوا

عليه أو يدّعوا الأحقية دونه ... أ هـ


* حيوره : جمع حير وهو البستان .

*ميوتها : فاكهتها .

* يقصد هنا توافد الباديه عند طلوع سهيل لشراء مايلزمهم من التمر .

* عشوره : وهي العشر 10 % يأخذها الحاكم من الفلاحين وهي غير الزكاة .