القـوافي عصنّي ترفض اني اسـاير = وامدح اللي يبي مدحه بعذب القصيد
ولا بغيت التحدّث عن جروح الضماير= سابقنّي مـثل خيلٍ على ما اريـد
وان بغيت الغـزل والحبّ فالفكرعامر= من خيال بخيالٍ من قـديم وجديد
في حصون القوافي والرجـال الاكابر= يفضح الحرف فكري من قريب وبعيد
ياهـل الحرف ربعي بين كاتب وشاعر= الحذر من حروفٍ مثل نار الـوقيد
تكتب الحرف لاعمى ما حسبت المخاطر= ومن كتب لك تظنّه عادي{ن} او بليد
الـركاده سعــاده لا تعجّـل تقــامر= لين تسمـع وتنظر وتفهم اللي يريد
الرجـاجيل مخبر لا حـروف ومنـاظر= بعض صفرٍ وبعض الماس سعره يزيد
اضبط الحـرف دايـم واترك العقل يامر= والـوساوس بعيـده دون شيّ{ن} اكيد
ناقـل الهرج احـذر ثم حـذّر وحـاذر= من حكى لك حكى بك لو بدى لك عضيد
احضر اللي نقل لك ومن نقل عنه حاضر= تكشف الصحّ والكذّاب لـو هم عـويد
كان جاهل يعـلّم ، وكان حـاقد ومـاكر= اقطـع خطـوط وصله لا يجي له بريد
مثـل هذا ترى حقـده بقلبـه خنـاجر = يقتـله ما يطـوّل مثـل سـمّ الـوريد
وانتبه للعـذارا بعضهن خـوش تاجـر= صيـدة الرجـل مهنة من شرفها زهيد
ولا تفكـّر تصيد اللـي عفيفـة وطاهر= من رمى بيت غيـره ينتظـر للحصيد
العقـوبة قـريبـه من عليـم السرايـر= يـوم تبلى بعرضك وكل صـايد مصيد
ويا بنـات النشـاما احـذرن كل داشر= في حـروفه خـديعه رامي{ن} للبعيـد
ينصب الطعـم في ردّه وفي الخبث ماهر= يعجب اللـي خفيفـه بالكـلام الحميد
تبتـدي الشـات تثغي ثم نقض الظفـاير= ثـم جـوّال يرقص عند موعـد سعيد
لين ياخـذ مـراده ، سـددي للخسـاير= وردة العمر ديست ، بعـدها وش يفيـد