يابو محمد عسـاك تـدوم وتعيش=يانســل قـوم تشـرفنـي بخوتها
اللابـه اللـي نواظـرها مباشيش=يفرح بها الضيف وتنـومس ضيافتها
قبل الـرخا في سـنين مابها عيش=شــهران تـاريخها رمـــز لثقافتها
والعزوه ابن القحم ربـع مداغيش=ما احـد تجـاهل لغـارتها وفزعتها
لادندن الحـرب وبروقه مراهيش=فـوج بمـيرادها وفـوج بصدرتها
خيـالة القـوم فـرسان وحنانيش=توسـع الجـرح ماتـرحم بطعنتها
دخيلها لاحصـل بالعـلم تهويش=سـنه وشـهرين يبقى فـي حمايتها
ماتقبـل المخطـيه ولا البخاشيش=والديــن لاسـلام يالله عز رايتها
تاقف مع الحق والعـزوه نيانيش=وسلاحها الذكـر والسـنه شريعتها
وما تقبل اللي يحبـون التحاريش=اللـي تحـب الـفتن وتـزيد غلتها
علـومها هـايفه وتلـوذ بالحيش=لـوكـان تغـريك لاتقبل صداقتها
فلاح بعد العصـر مريت بشويش=بالـديـره اللـي تسـليني طبيعتها
نبـاتها السـدر تسـقيه النشانيش=واشجارها مورقه من زيـن تربتها
ظلالهـا ضافي مـن غير تبريش=كـنت اتـمنى نقيـل تحـت فيتها
ونشوف من لبسها زيـن الدناديش=غير البلا النفس مافـرحت بهقوتها
كـنت اتوقـع تراحـيب وتفريش=ودلال بــن نحلـيها بتمــرتها
ماكنت اصدق يجي بالـبر شاويش=الا بعد ما اقبلـت عـرفت مشيتها
فلاح لاعـادها الله مـن مطاريش=الله لاعــاد سـاعتهــا وهيتها
وردت عـد تمـوت به المعاطيش=تخايـل المـاء ولا تروى بوردتها
ماناشنا من مطـرها لو رشاريش=مدري متى ترعـد وتمطر سحابتها
ياكيف ترضى على مثلي مغاشيش=رميتنـي بيـن أيـاديـها وقسوتها
بسـبابها كـن ينهشـني نواهيش=فـلاح ماصـابنــي جعله بذمتها
عرش بقلـبي معه بالجـو تعريش=ياعزوتي صـار قلبي تحت رحمتها
علامتـه فـارقه بيـن الدراويش=ماقلت لي من اول ان هذي علامتها
لوكان وضحت لي ماصار تشويش=ولا انهــزم خــافقي قدام هيبتها
الجادل اللي خذاها الكـبر والطيش=من حقها غــير وش خلت لخيتها
فلاح انا صـابنـي منهـا تناتيش=السـاحــره ماعرفنا ويش قصتها
الجـادل اللـي جدايـلها عكاريش=يـوم اقبلت قـامت تقصر بخطوتها
ظبي خلاوي صغــير مابعد نيش=زاد الـغلا بعدمـا شـفنا وسيمتها
يالعنبـوهـا زعيـم يتبعـه جيش=واسـتيسـرتنـي بهيبتـها وقوتها
العـود ريـان وعـيونه مراييش=يالتينـي ماعدلـت وشـفت وقفتها
كلمتها غـير مـاردت علي ليش=قصدي شريف ولا ادري وش نيتها
ياليتني طـاير واطـير بالريش=واطـير من ديرتي وامسي بديرتها
والله ماني من طـيور الخفافيش=اللـي تدور بتـالي اللـي فرصتها
ابيه فـي سـاعة بيضا مناويش=واشرح لها اللي حصل منها وسبتها
همش على خافقي بالصك تهميش=يالـيت عينـي طفت قـدام شوفتها
يالـيت بالـبر دوريـه وتفتيش=وتـرد بعض العـرب منها وجيتها
لو خيروني بغـيره قلت مابيش=ما احد من الناس يدخل في محبتها
ابليس يابنت لـو طعتيه يغويش=يلعب على النفس لين تطيح قيمتها
يابنت لو تنظرين لحـال مغليش=الابتسـامه كـرم وحنـا بحاجتها
قفلتها يـافـلاح اليـوم بالشيش=اللعبه اللـي خسـرنا مـن بدايتها
وختامها بعد هرجي والخرابيش=صلوا على شافع الامـه وصفوتها
وسلامتكم
ابو خاااااااااااالد