التوبه
وفى أواخر أيام شاعرنا محمد القاضي اعترته الأمراض فأنهكته وهدت قواه وبدأ يصارع المرض حتى صرعه المرض فتوفاه الله وكانت آخر قصيدة قالها بحياته قصيدته المشهورة والتي سميت ((توبة القاضي)) وفيها يتجه إلى الباري عز وجل يطلبه العفو ومنها هذه الأبيات :
يا محل العفو عفوك يـا عظيـم=ولطفك اللي كافـل كـل الآثـام
يا سميع ويابصيـر يـا عليـم=يا قوي ويا متيـن ويـا سـلام
يا حميد يـا مجيـد يـا حكيـم=يا عزيز ذو الجـلال والإكـرام
يا عطوف يا رؤوف يـا رحيـم=جلَّ شانه مـا يهـام ولا يـرام
بنورك اللي يوم ناجـاك الكليـم=دك سينا خرّ موسـى ثـم قـام
مُوحد ٌ يدعيـك بالليـل البَهيـم=وبالتخضع والتضـرع بالظـلام
خاشع لك خاضع لـك مُستقيـم=اسألك وادعيك بأسماءك العظام
أن تَروف بحال من جسمه سقيم=عِلته تبراه له خمسـة أعـوام
داونـي بـدواك مِـن داءٍ أليـم=واشفني بشفاك يا من لا يضـام
من انتحالي دوك حالي حام حيم=والمرض رض الأعضاء والعظام
مدلـه نفسـي بتدليـه العظيـم=عن لذيذ النوم مع طيب الطعـام
ولا لي مشكى غير للرب الرحيم=بحق السبع السمـاوات العظـام
ذا ومع ذا لـو تمـادوا بالنعيـم=فإن عمر المرء مـرده للعـدام
كل ابن انثى ولـو طـال سليـم=لا زم ٍ يشرب بكاسـات الحِمـام
من عميم إحسانك ارحم يا رحيم=يوم نزع الروح وإن جاها حمام
قام يصعدها ويحدرهـا غريـم=في عضاه من الدماغ إلى البهام
شاخص طرفه وريقه ريق هيـم=كل عرق بالعرق يرشح شمـام
يوم نزع الروح لجـنَّ الحريـم=وجضوا أهل البيت واشتغل الغلام
والشفيق اللي يـوده والرحيـم=يستشين بشان تجهيـزه قـوام
والخشب دن مع الخام الرخيـم=وفصلولـه وزره فوقـه حـزام
ثم شاله كـل شغمـوم حشيـم=مرجليـن معجليـن بالهـمـام
ووضعوه بمُوحش قبـر ٍ ظليـم=ووسدوه اللِبنَ عن ريش النَعـام
وكشفوا عنه الغطا قبل الهديـم=وفككوا عنه العصايب والحـزام
ورصفوا فوقه من اللِبن ِ الضخيم=وادخلوه وودعـوه بـلا كـلام
وحدوه بموحـش مالـه نديـم=غير ما قدم مـن أعمـال قِـدام
عند خلق ٍ بارزين فـي صَميـم=صامتين مـا يـردون السـلام
حال ما خلـوه بالبـرزخ مقيـم=جاه من ناجاه عن خمس ٍ تَمـام
اسأله يلهمك رشدك يـا غريـم=فـي ثباتـك للملائكـة الكـرام
وعقب هذا البعث والهول العظيم=يوم حشره يـوم نشـره للأنـام
يوم يبعث كل ذي عظـم رميـم=في صعيد للحسـاب والخصـام
يوم نَصبه للسـراط المستقيـم=لنسل يافث ثم حـام ثـم سـام
حاسريـن عابريـن بـه نظيـم=ذا يصيح وذا يطيح من الزحـام
وذا جريح وذا عطيب وذا سليـم=وذا يمر مرور برق ٍ في غمـام
وذا يُسرُ وذا يُجَرُ إلـى الجحيـم=وذا إلى الفردوس من باب السلام
وذا يُخلدُ بالنعيـم اللـي مُقيـم=وذا مسيم في لظى دوم الـدوام
كيف من ييقن بهذا يـا غشيـم=يفنى الدنيـا ويغـرى بالحطـام
وين ابوك وين جدك؟ يا عديـم=وين خالك وين خِلك والعمـام؟!
ويـن شُبـان يهـدون العديـم=وين شيبـان ٍ شغاميـم كـرام
صُيروا في قبورهم مثل الهشيـم=خامديـن هامديـن فـي هـدام
تبـرم الدنيـا وينقـض للبريـم=واخيرها منقضية مثـل الاحـلام
يا (أحد) يا (واحد) شانه عظيـم=يا (صمد) يا عالم كـل العـلام
سامع في غِبـة البحـر البهيـم=صوت يونس يوم نادى بالظـلام
يا إلهي خذ بيـد قلـب ٍ سليـم=عن عذابك يوم للخلق ازدحـام
من بحر مجدك وجودك يا كريـم=نفحة نَسعَـد بهـا دوم الـدوام
أنا دُسـت الخطايـا مـن قَديـم=طالبك صفحك وعفوك لي ختـام
الهوى والنفس أغواها الرجيـم=ونشر فضلك واسع ذا والسـلام
ذا وصلى الله على طـه اليتيـم=وآله والصَحب ما هـل الغَمـام
عدد من طـاف بالبيـت القديـم=بين زمزم والحجر هو والمقـام