[الطائر المهاجر]

شريت لي مشلح وفصلت ثوبين = ومعهن شماغ وارد الشيخ عجلان
وسهرت طول الليل اكتب من الزين= ابيات شعر امدح بعير لفلان
واحمسه كوده يجيب النياشين = يفوز لو يضلع وهو حيل جربان
من شان عين اللي رصيده ملايين= لا من تغر فالكرش بالمال مليان
واخذت تكسي ما سمح دون عشرين= وآصل والآقي الناس حضر وبدوان
شعار واجد والخلايق ضلاعين = كل يبي يدخل من الوضع طفشان
وادفش معاهم لين قربت مترين= قال الحرس ..لا وين لاتكون غلطان
قلت اسمي الشاعر ولا فيه تخمين= وعندي قصيده ما تعادل بالاثمان
قالوا تودر وامسك الدور يومين = وقصيدتك تحتاج ضبطٍ وميزان
وارجع بدربي حافي الرجل مسكين= ضاعت نعولي والبخت مابعد لان
واشوف لي حلاق احمر علابين = كنه خواجه دام اصوله بلبنان
واشكي عليه الحال والفقر والدين= لعل يفزع لو خذا النص كسبان
جلسني في الكرسي حلاقه وتزيين= بالشيب يصبغ ثم بيّض للاسنان
حتى غديت بلمعتي كالمذيعين = ثمن خذاني لصاحبه "بيه" عدنان
واختار لي بنطال لو زاد شبرين = وقميص يلمع فيه اشكال والوان
وشفته يكلم ..بس ماقال لي مين= واثره خذا موعد مع الشيخ كرشان
ورتب لسياره على يوم الاثنين = وجانا الدريول منخره تقل شكمان
سواق معه الروز كشخه بلونين = ومن قبل ما نمشي همس لي بالآذان
وفهمني الخطه بدقه وتمعين= فإنا رجال أعمال عالين بالشان
ومن يوم قبلنا وذا الخلق بلشين= فتح الطريق وفتح باب وبيبان
ولمن وصلنا الشيخ قربنا الاثنين= ودرب الطمع جره ولاهوب فطنان
وقمنا نوريه الصور والعناوين= وعماير ما مثلها شاف في "كان"
عربن على وحده بخمس وثلاثين= والثانيه بخمسين في البيع شفقان
وقلنا في امان الله من بعد يومين= نجيب لك في البيع علم وبرهان