الجزء الثالث والثلاثون.
مرن شهرين ونص على وفاة سيف...وكانت الايام تمر بشكل رتيب...وممل...وتقريباعلى نفس الوتيره... حصه بدت تتاقلم...مع انه مبين عليها انها بعدها حزيينه وايد على خسارتها...لكنها غصبن عليها تحاول تنسى عشان اهلها واخوانها..وعشان نفسها بعد...سيف عمره انتهى..لكن هي بعده عمرها ماانتهى....ولازم تعيش حياتها... وتطلب له الرحمه دايما...اتصالها مع عمتها ما انقطع ابدا...بالعكس ...زادت المحبه بينها وبين ام سيف اكثر عن قبل...كانه كل وحده تواسي الثانيه... حصه فظت تيلفونها ومسحت كل شي فيه ورجعته لاخوها ناصر عشان يعطيه لسالم....لانه التيلفون كان باسم سيف...وهو يدفع عنه...ومن بعد سيف..ماتبا التيلفوون موليه...فخذه عنها ورجعه لسالم اللي عارض في البدايه لكنه استسلم في النهاية...
نورة وسعيد تعلقهم ببعض وصل لدرجه الجنون...من عقب ماخطبها خلاص مايشوف انه يقدر يردع نفسه ويكتم مشاعره....ومسمينهم في العايله قيس وليلى ...يوم يشوفون بعض مايقدرون يشلون عيونهم او يلتفتون لاي حد ثاني....واللي حواليهم يظحكون عليهم.... سعيد من بعد ماخطب قرر انه يبدا ويبني الارض اللي ماخذنها له ابووه من سنين...وقابل مهندس زين وقام يحط وياه التصاميم الاساسيه للبيت... هو صح اول مايعرس بيسكن عند اهله فتره... لكنه مصيره بيعتزل....والارض مب بعيده عنهم ..بينهم وبينه شارع... وكان دايما على اتصال مع نوره بالنت يتشاورون كيف يبغون بيتهم ...وشكله...
فطوم كانت باذله جهدها في الدراسه...واثبتت انها متفوقه بدرجاتها في امتحانات المنتصف... صح انها احيانا تتعرض للتشويش في مخها بسبب حركات حمدان وسوالفه الي ما تخلص...!!..بس قررت انها صغيره على هالسوالف والافضل لها انها تهتم بالدراسه....لانها يايه تدرس..مب تبني علاقات....ماتعرف شو نهايتها بالضبط...!!..
حمدان يحب...خلاص اقتنع بهالشي....دقات قلبه ورجفة يديه كل مايشوفها اثبتت له هالشي...لانه هو دايما بارد وطبيعي يوم يشوف اي بنت...مايهتم فيهن اهتمام شخصي...وفي البدايه فطوم كانت من هالطايفه...لكن الحين...!! .. شي ثاني...شي قدره ومقامه عاااالي ماينلحق.... صح سوالفه وغلاسته ماودرها وياها...لكن بس يوم تكون نوره موجوده وياهم....بما ان حصه ماتطلع جدامه... لكن اذا صار وتلاقى ويا فطوم بروحهم...يقفط ويستحي...ويتم ساكت ولا يرمس...مايباها تفكر بانه يستغل وجوده بروحه وياها عشان يطفربها ويغلسبها...هو يدري انها بعدها ماحست عليه وعلى مشاعره الي تبدلت....لكنه مستانس بانها ماتدري...لانه بعده مب مستعد يواجه هالمشاعر وياها....يخاف انها تخاف وماتطلع له مره ثانيه ..وهو مب مستعد يخسرها... خلهم جذي احسن...وهو مستمتع بهالشعور اليديد اللي اول مره يحس به...وبعدين تو الناس على الجدية بهالمواضيع...بعده صغير...21 سنه مب سن مناسب للخطوبه والزواج....صح سووها وايدين غيره لكن بالنسبه لحمدان...تو الناس...!
عنود كانت اغلب الوقت مشغولها ويا عمتها ام خالد... وتقريبا جهز ثلاث ارباع القسم... صبغوا الغرف بشكل حلوو وحطوا اثاث غرفة النوم وركبوا السيراميك والستاير ...باقي عليهم الغرفة اللي مقررين يخلونها مكتب لعبدالله والصاله...وكانت في نفس الوقت تحاول تقضي الوقت بانها تشتري زهابها واغراضها وتخلص... كانت يوميا تتصل بعبدالله وتسلم عليه وتتخبر عن خليفه...علاقتهم صارت مستقره .. لكنها ما تخلى من الحلاوة.... عنود كانت تتجنب تذكر اي شي من تجهيزات العرس لحصه مراعاة لمشاعرها... بس كانت تروحلها في الاسبوع مرتين او ثلاث...هذا غير التيلفونات اللي بينهم...وبمساعده نوره وفطيم قدرن يطلعنها شوي من الجو اللي هي فيه...وبدت ترجع لحياتها الاوليه..لكن ببطء شديد...يالله احسن من مافيش...
خليفه الوحيد اللي ما تغير مزاجه....كان دايما بروحه...يركز على دراسته اشد التركيز...ويوم اييب درجات كامله ماكان يفرح بها....شعور باللامبالاه كان مسيطر عليه....كان كل همه انه يخلص دراسته ويرجع... باقي اربع شهور ويخلصون ويرجعون...كان يلاحظ انه عبدالله يحاول انه يطلعه من هالجو....لكن هو مب قادر ينسى ربيعه...وينسى الطريقه اللي توفى فيها.... واخر مره شافه فيها وكيف كان مظايق منه ...لو كان يدري انه بيروح عنه ومابيشوفه مره ثانيه ماكان بيتصرف او بيحس بهالشعور تجاهه...شو عرفه..!! انه بيوصله خبر وفاة سيف بهالطريقه...حادث..!!!.. ياكرهه للحوادث... يسرق منك الانسان اللي تغليه فلحظه...بدون تحذير..وبدون انذار مسبق عشان الواحد يتوقع الموت....بس جي فجاه....تسمع خبر فلان اللي كان معاك من ساعه انه مات الحين....!!!..الله ياخذ اللي اخترع السيايير.... ياكرهي للحوادث... اللهم لا اعتراض....والله يصبرني على خسارتك ياسيف...
اليوم اول يوم من ايام رمضان.... بيت بو خالد كانوا كلهم معزومين عشان يفطرون رباعه فبيت بو سلطان... وطبعا قبلوا هالعزومه...وحصه طبعا ماتقدر تروح عشان العده... وفطوم قررت انها تقعد وياها وتفطرمعاها وماتروح...لكن حصه اصرت عليها انها تروح وياهم وتستانس وماخلتها تيلس... على هالحال سووا بيت بو خالد فطورهم من كل شي وكثروا منه..وشلوه وياهم لبيت بو سلطان.. نزلن الحريم وسارت داخل البيت اما بو خالد وعياله دخلوا الميلس... كانت فطوم مرتبكه...صح انها دخلت هالبيت من قبل في ملجه عنود...بس ما ركزت فيه عدل..وماكانت تعرف حمدان عدل ساعتها...لكن شعور غريب بالحنين مسكها وهي تدرك ان هذا هو البيت اللي ساكن فيه حمدان....دخلت مع الحريم للبيت...وكانت لمة حريم وااايد ماشاء الله... ام خالد وام سلطان..وحريم العيال مريم ومنى حريم سلطان وحميد..وعيالهن...وميره وعيالها ..وحمده وعيالها...ونوره وفطوم وطبعا عنود...يوم قرب الاذان يأذن..حطوا لهم الشوربه والتمر والماي والعصير...عشان يفطرون ... عنود ونوره خلصن بسرعه ونشن عشان يركبن لغرفة عنود ويصلن... يوم يت فطوم بتنش وياهن زقرتها عمتها ام خالد..
ام خالد: فاطمه بنتي...تعالي هني...
استغربن ثلاثتهن من هالاستدعاء... قالت لها عنود
عنود: يوم تخلصين تعالي فوق..بس ركبي الدري ثاني غرفة على ايدج اليمين...اوكي...بنسبقج نحن..
كانت فطوم مرتبكه فما سمعتها عدل...لكنها قالت..
فطوم: اوكي..
وسارت عند عمتها ويلست عدالها...اللي كانت يالسه ام سلطان...وفطوم كانت ملاحظه ان عين هالاخيره عليها من دخلت...
فطوم: هلا عمووه... آمري..
رزت ام سلطان بفيسها...
ام سلطان: شحالج بنتي..؟؟ شحال اهلج.؟
فطوم: بخير الله يعافيج خالوه..
ام سلطان: وشحال امج... وابوج..؟
فطوم: الله يسلمج ياربي كلهم بخير وعافيه...
ام سلطان: عسى مرتاحه فبيت عمتج..
استغربت فطوم من هالتحقيق...!!!
فطوم: الحمد لله هم مب مقصرين وانا مرتاحه وايد عندهم...
ام سلطان: انتي تدرسين في الجامعه والا في التقنية مثل ولدي حمدان..؟؟
فطوم: لا انا في الجامعه...
ام سلطان: هييي.ماشاء الله...كم باقلج عن تخلصين...؟
فطوم: هههههه خالوه انا توني اول سنه...يعني بعدني اربع سنين...على الاقل...
ام سلطان: وناويه تكملين دراسه لين التخرج..؟؟
فطوم: اكييد ان شاء الله...
ام سلطان: هييي..ماشاء الله..الله يوفقج يابنتي...واختج متى بتعرس.؟؟ قالولي مالجه..
فطوم: والله يقولون بعد كم شهر...يمكن نفس الوقت اللي بتعرس فيه عنود وعبدالله..
ام سلطان: هيي ياحيهم والله...الله يوفق البنات...بنقوم نصلي...
فطوم: انا بسير عند البنات بصلي فوق وبننزل...
ام سلطان: برايج بنتي...
تنفست فطوم الصعداء على قولتهم عشان خلص هالتحقيق الغريب.... احين شو تبابها هالعيوز تحقق وياها...!! ... لا يكون تبا تخطب..؟ متفيجه تو الناس ..!! بس ادركت فطوم في خاطرها انها حبت هالفكره...وانها مش معارضه..لكن اعتراضها الوحيد هو الوقت....مب وقته الحين....هزت راسها وهي تحاول تطرد صورة حمدان عن راسها وركبت الدري...ووقفت في الممر متردده... شو قالت عنود...؟؟؟..ثاني غرفة على شو..؟؟ اليمين والا اليسار..؟؟؟....همممممممم... تجدمت فطوم وحطت اذنها على الباب اللي عاليمين...هدوء....طبعا هدوء..اكيد يصلن...بس اخافها مب هي الغرفه...!!!..المشكله انها حتى ماتذكر اي حجره دخلت في الملجه... راحت للغرفه اللي مجابله عاليسار وحطت اذنها...بعد هدوء.....ياهي حاله...ياويلي وين ادخل وين اروح..!!!...بعدين فكرت...محد في البيت بنات غير عنود... والرياييل اكيد في الميلس او المسيد الحين...عشان جي عادي اذا غلطت...سمت بسم الله ودخلت الغرفه اللي عاليسار...
الغرفه مب هي نفسها...هذي لونها سماوي...وولاديه...ياويلي...مب غرفة عنود... بس الحجره فاظيه...خذت حريتها وتاملت بالغرفه... عملية.. وحلوه...وستايلها يديد...ومرتبه بعد... بس الشبريه هي الوحيده اللي فراشها متلعوز شوي...يوم طاحت عينها على التواليت صدمتها صورة حمدان في برواز شوي كبير...وظحكت..خقاق وحلو اكيد بيحط صورته....مب سادتنه المنظره يتامل بعمره بعد حاط صورته... تجدمت ريولها بدون ماتحس للتواليت... حاولت تمنع نفسها عن التامل في هالصوره الكاشخه.... مدت ايدها لواحد من العطور..ويوم شمته عرفت انه هذا اللي يستخدمه حمدان دايما لانها دوم تشمه فيه...قعدت تلعب شوي بالاغراض المتناثره...مشط..كريم...مفاتيح ...وتخطت بنظرها الصوره وصدت للمكتب.... مكتب كبير فيه كمبيوتر والطرف الثاني منه متكدسه الكتب والاوراق ..كديد ياحليله.... وبدون ماتقدر تقاوم اكثر..مدت ايدها ومسكت البرواز... ورفعتها عشان تشوفها عدل... وخذت وقتها وهي تتامل في الملامح الحلوه...والعيون البنية الحلوه...والحواجب الغليظه شوي والمقوسه بشكل خطير وحلو...والخشم الرفيع والطويل...والشفايف المتوسطه والمبتسمه....ماشاء الله عليك ياحمدان.... سمعت باب ينفتح قريب وايد منها ..وفي جزء من الثانيه ادركت انه باب الحمام الي كان مسكر من الصبح...وعلى طول وبشكل غريزي دست الصوره ورا ظهرها وهي تشوف وبرعب فظيع حمدان اللي طالع من الحمام ومحسّر يديه ومبين انه كان يتوضى وتوه قايم من النوم...مب متسفر..بس لابس كندورته... وصل قلب فطوم لحلجها...يالفظيحه..يالفظيحه... .ياربي موتني احين... ولا اواجه هالموقف....الله ييخسني انا من بقره...شو مدخلني حجرة الريال...يوم دريتي انها مب الغرفه المطلوبه طلعي انزين.....!!..لااا قاعده تفتش وتتامل بقوة عين....ذوووقي الحين الاحراج والفظيحه... وعند منوو..؟؟ عند حمدان ولسانه اللي مايرحم حد.....يارب ساعدني...
حمدان كان منصدم صدق... بس بسرعه استوعب الموضوع وذكر انهم عازمين بيت عمهم..بس الصراحه ماتوقع انها تحظر....والاخس ماتوقع ابدا انه يشوفها فحجرته....كان قلبه يدق بشكل جنووني... وهو يتامل فويهها المنحرج والمحمر...وعيونها اللي ماخازت عن ويهه ..وهي شكلها مب حاسه انها قاعده اطالعه من الاحراج اللي تحس فيه...ابتسم...فديت هالويه الزايغ... تجدم شوي صوبها وهي تتراجع على ورا...وظحك
حمدان: هههههههه...اوكي ..اوكي....غبت عنكم اسبووع...بس لو دريت اني بشوفج عقبها فحجرتي جان من زمااان غبت هالاسبووع....
نزلت عيونها وتمت ساكته مب عارفه شو تسوي وشو تقول ...وكيف تتصرف....آآخ يالفظيحه..
حمدان: ياحيالله فطييييم....حيالله الطويييله....مبروك عليج الشهر...
فطوم:... آآ...الــ ....اللـــه يبــار،،،ك... فيــــ ....ك....
وزادت ابتسامه حمدان... لاحظ انها داسه شوي وراها....ولو مب داسه هالشي وتخاف اطلعه جان شردت من الصبح...لكنها تخافه يشوفها....التفت صوب التواليت وين ماكانت واقفه ولاحظ غياب صورته... ذاب قلبه بين ظلوعه.... وحسد الصوره من خاطره لانه فطوم ماسكتنها.... وبما انه متفيج وتوه قايم من النوم...وباله رايق ومستانس بشوفة فطيم...ليش مايغايظها شوي...
حمدان: شليها اذا تبغين...!!
رفعت فطوم عيونها بخوف وارتباك...
فطوم: اشل...شوووو...؟؟؟؟؟؟
رفع حواجبه ونعس عيوونه وهو يطالعها بمكر ويبتسم...
حمدان: اللي داستنه ورا ظهرج....
غمضت فطوم عيونها بقو ووصل بها الاحراج لابعد حد....
فطوم:..انا.....انا....هممم...ك نت...كنت ادور غرفة ...عنود.... وو....بالغلط دخلت حجرتك....وو ...بس كنت اشوفها... ماقصدت...سوري...
كسرت خاطره ...وظحك وهو يشوفها بعدها داسه الصوره.....!!!
حمدان: عندج النسخه الاصليه وتشوفين الكوبي...؟؟؟ ...
ابتسمت فطيم ابتسامه خفيفه...وهي تشوفه يمد ايده ويحرك صبوعها كانه يقولها " هاتيها" ... طلعت الصوره وعطته اياها .... شلها وردها على التواليت مثل ماكانت...
حمدان: ادري انج ماكنتي تتوقعيني هني...وادري انج انحرجتي... بس لا تخافين هالشي بيني وبينج... انا زايغ احينه عن يهزبني ابويه... يييت تعبان من الكلية ورقدت وتوني ناش..وبصلي في الغرفه وبسير افطر...
استغربت فطوم من هالشرح والسوالف اللي طلعها حمدان...وعرفت انه واحد من الاثنين.. يا انه يحاول انه يرفع عنها الاحراج...يا انه مرتبك مثلها ومب عارف شو يقول...وفي الحالتين حبت منه هالتصرف...
فطوم: حجرة عنود اللي مجابله صح..؟؟
هز حمدان راسه بالايجاب... وراقبها وهي تطلع من غرفته ..كان يبا يوقفها...يقولها شي...اي شي.. بس عشان تقعد اكثر... بس فات الوقت وطلعت وسكرت الباب وراها.....ابتسم وهو يتفداها فخاطره.... مسكينه انحرجت...بس ياحظ حجرتي يوم دخلتها والله...فرش السياده وحاول يركز فصلاته قد مايقدر... اما فطوم دخلت حجرة عنود ووويهها احمر...وحصلتهن مخلصات صلاة...
عنود: عنبوو وين سرتي انتي هالكثر سوالف ويا عمتج..!!
فطوم: هههههه هي... سون لي تحقيق هي وامج..مادري شو عندهن...المهم لا تظهرن..تريني شوي بصلي وبننزل رباعه...
دخلت الحمام وتوظت وصلت المغرب... وعقبها نزلن رباعه لغرفة الطعام وين تيمعن كل الحريم للفطور...
وبعد الفطور قعدن كلهن يسولفن ويظحكن وبعد ما صلوا الرياييل التراويح روحوا بيت بو خالد لبيتهم ... وفطوم بالها مب عندها...ولاحظت نورة عليها هالشي....وقررت تسالها عقب شوفيها... اول مادخلن البيت حصلن حصه يالسه بروحها في الصالة واطالع التلفزيوون وجدامها كوب عصير مشروب نصه... وصحن هريس ماكول شويه منه....
نورة: السلام عليكم...ها حصيص..لا تقوليلي هذا فطورج..
حصه: وعليكم السلام... شربت شوربه المغرب... وهذا فطوري..شوفيها..مب نعمه...
فطوم: نعمه الحمد لله بس عاد هذا فطور..؟؟؟ مايشبع ياهل...
حصه: ما هنالي الصراحه اكل بدونكم...ماعليه بنتفاول بعدين...شو اخبارهم قوم عمي..؟
نورة: والله يسرج حالهم ربشه...
حصه: ياحيكم يوم استانستوا...بس عاد مب كل يوم هالسالفه....وتخلوني بروحي...
فطوم: ههههههه لالا خلاص مب سايرين..
نورة: هي صدق..الا عشانه اول يوم رمضان حبوا انهم يتوالفون ويفطرون رباعه بس باقي الايم فبيتنا...مب سايرين مكان...
فطوم: بسير انا ابدل ثيابي وبصلي العشا...
نورة: انا بعد...
حصه: عيل انا شو ايلسني..بسير بعد اصلي...
نورة: بس مب تنخشن فحجركن...نزلن تحت عقب...
في نفس الوقت بعدها بفتره كانت حصه اول وحده خلصت صلاتها ونزلت تحت .وكانت امها يالسه وياها وابوها .... رن التيلفون وشلته...كان عبدالله...
حصه: آآلوو...
عبدالله: مررررررحباااا فديييييييييت هالصوت يعلني ماخلى منه..
رفع خليفه نظره واطالع عبدالله باستغراب....منو يتفدا هذا....؟
حصه: هلاااا والله وغلاااا....مبرووك عليك الشهر...سبقتك..
عبدالله: الله يبارك فييييييج ويخليج...شحالج حصيص.. ؟
تغيرت ملامح خليفه وعيونه متعلقه بويه عبدالله المبتسم....يحاول يخمن شو قاعده تقوله حصه...في هاللحظه رد له الحنين..والشوق....والحب لها اللي عمره ما اختفى ...بس كان مندفن لفتره فقلبه...ياحظك ياعبدالله... وعبد الله منتبه لنظرة خليفه... وهو حاس باللي فقلبه... بس مايقدر يدخل بهالامور...
حصه: بخييير الغالي شحالك انته..وشو الدراسه وياك...؟
عبدالله: الحمد لله ماشي الحال...هانت ماباقي شي وبنرد ان شاء الله....انتي شحالج وشحال الاهل..؟؟
عبدالله كان مستانس من صوت حصه اللي مبين عليه مرتاح...ويحس ان حالتها تحسنت اكثر...
حصه: كلهم بخير وسهااااله...عندي امايه وابويه...وبعد شوي بتي نوره وفطيم...منو تبا ترمس....؟
عبدالله: عطيني امايه بباركلها بالشهر..
عطت حصه امها السماعه وهذي قعدت ترمس ولدها وتتفداه وتوصيه على نفسه.. وبعد ماخلصت كلمه ابوه شوي وبعدين سكروا عنه....
وفي نفس الوقت اللي نزلت فيه نوره دخل خالد البيت ويلس وياهم وشكله مستانس...
خالد: هااااا... شو تسووون..؟؟ نوروه سيري هاتيلي هذا الاصفر..كاراميل...
نورة: حشى توني يايه امرت عليه...ههههههههه اصفر اون...صدق انك طالع على الشايب...
راحت نوره ويابت كذا صحن حقهم... وحطته ...ويلست عدال حصه..
خالد: مشكووووووووره... اماااايه..عندي لكم خبر...
ام خالد: خيير ياولدي...
خالد: خيير يا ام خالد.... ميره حامل...
الكل ابتسم واستانس...
خالد: لا والله..؟؟ مبرووووووووووك ياولدي تستاهل...
نورة: مبروووووووووك..عيل ما رمست هي ويا ويهها....
خالد: بعد تبينها تخبركم قبل ماتخبرني...؟؟؟....
بو خالد: يتربا فعزك ان شاء الله...
خالد: وفعزك يابووويه الله يخليك لنا....
حصه: عاد ان شاء الله تطلع بنت... مسكينه شميم مخلينها بين اولاد متلعوزه وياهم...
خالد: هههههه فديت شماااني انا...ثرني بتشرط عيل...؟؟ الحمد لله على هالنعمه..واللي ايي حياه الله..
ام خالد: صدقت ياولدي...
خالد: انزين اقولكن..قومن سون فواله حق الميلس...ربعي قايلين بيتسحرون عندنا...نبا شي زين...
نورة: فاااااااالك طيب...بنسويلكم فواله...
خالد: فاااالج مايخيب بنت حمد...يالله فمان الله..
طلع عنهم خالد وسار صوب الميلس.. وبو خالد قام يرقد عشان ينش في الليل قبل السحور...
وتمن هن الثلاث...
نوره: وين فطيم..؟؟
حصه: ماطلعت من دخلت تصلي...
نورة: بسير اشوفها...
خلت حصه مع امها وسارت لفطوم..حصلتها يالسه بشكل غريب فحظن الدبدوب .. سرحانه وهي حاطه صبعها الابهام فحلجها... ..
نورة: بسم الله مثل المدمنين.... هاااي فطوم....بلاج..؟
انتبهت لها فطوم ..
فطوم: هااا....هلا نوروه..!
نورة: هلا نوروه اون...شو بلاج..؟؟
ويلست عدالها عالارض...
فطوم: ماشي...
نورة: والله انج جذابه...فيج شي..من ردينا من بيت عمي وانتي مب صاحيه...
فطوم: شوفيني يعني...؟؟؟
نورة: بالج مشغووول....شو صار..؟؟
تنهدت فطوم...
فطوم: نورووه.. صارلي موقف عووووذ بالله منه...والله تمنيت اني اموووت ولا انحط في هالموقف...!!
نورة: بسم الله..شو صاار خبريني...
فطوم:......... هممم.... يوم كنت راكبه ابا اسير غرفة عنوود...ظليت الطريج..... وبدال ما ادخل الحجرة الثانيه على ايدي اليمين....دخلت الحجره الثانيه على ايدي اليسار...
قالتها فطوم بسخريه.... ونوره في البدايه ما فهمت...بس يوم استوعبت شهقت وغطت حلجها بايدها...
نورة: لا تقووووووووووولين..!!!!
فطوم: والله....
نورة: وبعديييين..؟؟؟؟
فطوم: مادري نوره...مادري شو ياني ودخلت الحجره...كانت فاظيه فقلت بشوووف...مستويه فظوووليه... وكنت في نص الحجره يوم طلع حمدان من الحمام وشافني ماسكه صورته...
حاولت نوره تتمالك نفسها ..ومره ثانيه غطت شفايفها بايدها بس هالمره عشان تغطي الابتسامه اللي ماقدرت تكتمها...
فطوم: ظحكي...ظحكي شعليج....لو سعيد مابتحسين بهالاحراج....بس حمدااااااااان...!!!!...انا ...وفحجره حمداااااااان.... فكري فيها....
نورة: هههههههههههه الله يعينج...شو سوااابج..؟؟
فطوم: ماسوا شي..بالعكس...حاول يرفع عني الاحراج... بس انا خلاص كنت ميته من القفطه والله...مادري شو ياني...انا استاهل.... بس ماروم اجابله مره ثانيه بدون ماذكر نظرته يوم شافني...
نورة: ههههههههههه حليلك ياحمدان.....
عصبت فطيم..
فطوم: احين حليل حمدان مب انا.....؟؟...حليل الياعده انزين...
نورة: فطوم... انتي ماتعرفين حمدان زين...بس نحن عايشين وياه طول عمرنا....وانا اقولج...ماكد شفته يهتم بوحده مثل ما مهتم فيج...وانا متاكده انه يحبج...
بطلت فطوم عيونها...وارتجفت اييدها..
فطوم: نوره لا تقولين هالرمسه.....
نورة: انا اقول اللي اشوفه...
فطوم: نوروووه لا ادخلين هالسوالف في بالي.....
نورة: انتي شو شعورج صوبه...!!
قالت فطوم بانفعال...
فطوم: مااااااعرف....
نورة: ماتحسين انه غير عن الشباب....مرح وحنون وسواالف...
فطوم: حنوووون..؟؟؟ دخيييييل والديج سكتي....حنون اون....
نورة: هههههههه خلج من المغايظ هذا جزء من طبيعته... بس صدقيني حنوووون لابعد حد....اكثر واحد يحس فينا حمدان...ويراعي شعورنا....وماينسانا مهما كان لاهي بحياته ودراسته...وربعه....لكنه دوم يحصل وقت حقنا ..وايي يطلعنا من الجو اللي نحنا فيه شوي...انتي بروحج تشوووفينه...
تنهدت فطوم مره ثانيه....وهي تعترف بصحة كلام نوره...
فطوم: نوره... دخييلج..سكتي...لاتحاولين ادخلينه فمزاجي...خليني ماريد احب ولا اريد اتعلق بحد...ابا ادرس وانا مرتاحه...
ابتسمت نوره..
نوره: بس انتي مش مرتاحه.... !!
فطوم: اووفففف...لا...مب مرتاحه...ولد عمج هذا يدخل في القلب غصبن عن خشم اي شخص...بس انا ماااريد ...والله ماريد....
نوره: هههههههههه والله في اغنية توصف هالحاله بس ماذكرها... المهم انتي لا تفكرين بهالموضوع وايد...اذا الله كاتب لج انج تتعلقين بحمدان.. فأهلا بك في القافله...هههههههههه كلنا متعلقين بحمدان... اما الحب ...شي ثاني...ما تفكرين في بعقلج...هذا قلبج يتحكم به...المهم عيشي حياتج...وخلي كل شي على ربج... وترا حمدان صدق ماشي يعيبه وكل ماتشوفه وحده تتمناه.... انا لو ماكنت اعرف سعيد جان خذت حمدان ...
فطوم: هههههه ويا ويهج...بتشوفين جان ماخبر سعيد....
نورة: ياويلج والله بيصفعني.... المهم بخصوص حمدان لا تحاتين...انا ابصم بالعشر انه شعور متبادل... ودام انه متبادل...يعني حاطنج في باله...واذا حاطنج في باله.....خلاص عيل ارتاحي وخلي كل شي عليه....حمدان اللي يباه يحصله بتوفيق من الله...الله يعطيه على قد نياته....
فطوم: مالت عليج انتي اللي خليتيني اظهر جدامه واتعود عليه....كله منج....
نوره: هههههه الله بيكتب لي اجر ان شاء الله اذا وفقت بين اثنين....
فطوم: وايد تستبقين الامور تراج....
نوره: ادري...تو الناس عليج وعليييه.... عشان جي اقولج عيشي حياتج....جدامج اربع سنين في الجامعه تخلصينهن....اربع سنين يسون واايد وايد...
فطوم: الله كريم...
نوره: المهم قومي تعالي وياي المطبخ بنسوي فواله حق الميلس.... هي صح ماخبرتج...ميره حرمة خالد حااااااااامل...
فطوم: لا والله..؟؟ حليييييييلها..تستاهل...
نوره: هي حليلها....من خمس سنين ماحملت عشان يدلعون شميم....المهم يالله نسير...
نشت فطوم ونوره وسارت الصاله... وسارت معاهن حصه عشان تساعدهن... كان سعيد وعليا وعيالها في السياره على طريق دبي – العين... وسعيد راسه مصدع من صياح هلال...
سعيد: يابوووي سكتيييه هذا ولدج لاانزلكم هني احين....اخلي واحد من هالبتان يشلكم...
عليا: حافظ عليك ياسعيد... المفروض تتحمله دامك تباه يشبهك..
سعيد: ياخي والله ذليتونا على هالشبه.... غيري ويهه يالله ماباه يشبهني...
عليا: غصبن عليك ..انا اباه يشبهك...
سعيد: تبينه يشبهني...!!..من زين شكلي يعني....احين بلاه هو يصيح شو يبا...
عليا: اوهوووو قلنالكم الولد يطلع ظرووس...هات صبعك ..تهيّس..
مد سعيد ايده وخلى هلال يعظه على صبعه..ورد سحبها وهو يظحك...
سعيد: هههههه غربلك الله ارنب....
عليا: اهبي هباك الله.... رد الشهاده عويهك...
سعيد: ههههههههه اشهد ان لا اله الا الله.....يابوج عطيه شي يعظه اشوفه سكت يوم عظني...
حاولت عليا تعطيه اللهايه بس رد فرها....
سعيد: طااالع...!!. دلوع بعد....اقول عليا...!!
عليا: هلا...
سعيد: احين عبدالله اول مايرد بيعرس..؟؟؟
عليا: ان شاء الله...
سعيد: همممممممم....ونحن..؟؟
عليا: نورة بعدها تدرس...
سعيد: ادريبها تدرس...بس عبدالله اذا بيعرس بيعرس على نص الكورس الياي حق نوره... يعني مابيكون باقلها شي عن التخرج....شحقه مانملج عيل...!!!
اطالعته عليا بنص عين..
عليا: شحقه تملج وانته تعرف البنت زين مازين...؟؟...
سعيد: الله يسامحج ياعليا.... شو يعني اعرفها ما املج يعني..؟؟؟...
عليا: لين عرس عبدالله خير...شاورووها وشوفوا قوم امايه...
سعيد: عاد هني العووق...قوم عموووه مايتفاهمون.... بالزوووووووور يخلوني اسلم عليها....وعقب على طول يصكونها بعين عشان تطلع من المكان اللي يالس انا فيه....امحق شووفه الصراحه...مابيخلوني املج...
عليا: ههههههههههههه ان الله مع الصابرين...جذي عرسكم بيكون احلى...
سعيد: كيف يعني..؟؟
عليا: يعني اذا ملجت بتكون متعود عليها ..متعود على صوتها...متعود على شوفتها وسوالفها....فما بيكون باقلك شي تتعرف عليه بعد العرس غير اشياء قليله.... بس اذا ماملجت...بعد العرس بتكون فتره حلوه تتعرفون فيها على بعض...مع انكم كل واحد خابز وعاين الثاني ومتفاهمين...بس بعد ..العرس غير...
سعيد: هههههههههههههه يالمكاااره...اونها تقنع....لا الغاليه.. انا ونوره حتى لو ملجنا...عرسنا بعد بيكون غير ..غير..غيييييييير....
عليا: هههههههههههه ياعيني عالحب....هالكثر عاد..!!!!
سعيد: ههههههههه هي عيل شو اتحسبين....؟!..
عليا: ههههه ثرها مب هينه نوووره يابت راسك.....
سعيد: فديتها انا...بس لا تتخققين يعني....على فكره هي متخبله علي مثل ما انا متخبل عليها...ويمكن اكثر...لا اتحسبين ولد خالج هين بعد...!!.
عليا: ههههههه الله يهنيكم...وانا ادريبكم اصلا من سنين....والله تناسبون بعض...
ابتسم سعيد وهو مستاااااااانس..
سعيد: ادري..هههههههههه...تسلمين والله حرمه اخوويه....لاحظتي انتي ان ولدج سكت...!!..الهرم عيبته سوالف العرس...ابشرج بمستقبل حااافل ويا البنات حق ولدج هذا بو ظروس...
عليا: ههههههه حرام عليك...بسم الله عليه حبيييبي...
سعيد: وهذي اللي مفروره ورا مسكينه عطيها ويه...تراها رقدت...
عليا: سلامه..!!... يووووه احين يوم بنوصل العين بتم تصيح يوم بتنش...
وصلوا الجماعه الساعه خمس الا ربع للعين... وكانت فطوم واقفه تتريا بروحها..يوم شافتهم ربعت توايه اخوها وعليا ...وشلت هلال ولوت عليه وباسته وهي مستانسه..
فطوم: قسم بالله تولهت عليكم....
عليا: والله حتى البنات هناك يقولن البنات صار هادي من عقب فطوم...
فطوم: ههههههه اليوم بسير بربشهم...
عليا فتحت باب السياره اللي ورا وقعدت توعي سلامه....وسعيد يتخبر فطيم عن علاماتها في المنتصف...يوم طلعت نورة من المطبخ وهي متحجبه بشيلتها البيظا...يوم شافتهم وقفت بعيد وهي قافطه من شكلها المعتفس...وعيونها على سعيد ...وسعيد يوم شافها ظحك لها وهو مستانس...
نورة: انتوا يييتووا...؟؟
سعيد: هههههههه انا بعد تولهت عليج ... مالت عليج نورووه هذا سلام...!!! تعاااالي...
نورة: لالالالالا ريحتي مطبخ.....!!
سعيد: هههه برايج انزين شحلاتج....تعالي اقولج...
نورة: لالا.... بسير ابدل ثيابي وبييكم اسلم...
سعيد: طالع هاي....مب يالسلج انا بترياج....
نورة: بتتريا غصبن عنك...خمس دقايق بس والله...
وربعت داخل البيت عشان تبدل ثيابها وهم يظحكون عليها....دخلت عليا داخل عشان ادخل سلامه وهلال للصاله... وتمت فطوم واقفه لان سعيد قالها توقف وياه يوم بتي نوره..عشان محد يشوفهم وينقد عليهم...
يوم طلعت نوره كانت مبدله ثيابها ومتغسله ومتعطره... يت صوبهم وهي تبتسم...
سعيد: والله ماشي فرق عندي ويا هالويه....
نورة: لا شي فرق... غير يوم ريحتي شياط وحالتي حاله وغييييييير يوم انا متعطره ومتعدله...
سعيد: اتمين نوره صح والا لا...؟؟؟
قفطت نوره...
فطوم: ياعيني ياعيني...مغازل عيني عينك...
سعيد: جب انتي...
ظحكت نوره....
نورة: ياحيالله من يااااااانا.... ماشي باقي عن الاذان غير شوي... والرياييل كلهم متيمعين في الميلس...يالله سير اقعد عندهم...
سعيد: بس..؟؟ هذا سلامج.. يايه تراويني انج متعطره ومتعدله وعقب خلاص يالله روح...!!
نورة: هههههههههههههاي...شو تباني اقولك..؟؟
سعيد: شحالك سعيد.؟؟شخبارك..؟؟ شو حياتك..؟؟...تولهت عليييك..... شي من هالنوع...!!
حطت نوره ايدها على خواصرها...
نورة: هذا كله قلناه في الايميل...عن الخريط..!!
سعيد: عمري غير يوم تقرينها وغييييييييييير يوم تسمعينها وتشوفين معناها في العيون...
رفعن نوره حواجبها وهي قافطه وتبتسم...
نورة: انته شو بلاك اليوم....؟؟!!
ابتسم سعيد
سعيد: ابا املج....
بطلت نوره عيونها وحلجها وفطوم نفس الشي....
نورة+فطوم: شوووووووووووو...؟!!!!
يوم شافهن سعيد محتشرات...
سعيد: احم...ماشي باقي عن الصلاة....بسير الميلس وبنتفاهم بعدين...باي
وسار الميلس قبل ما يقولن اي كلمه ثانيه....
دخلت نورة مع فطوم البيت وهي مستغربه...
نورة: شو ياينه اخوج..؟؟؟ منو دخل فكرة الملجه فراسه..؟؟
فطوم: شو دراني فيه...بعدين هذا سعيييد مايحتاي حد يدخل افكار فراسه...بروحه بو الافكار...
نورة: ماقدر املج..
فطوم: ليش..؟؟ شو وراج.؟؟
نورة: ماقدر املج ...
في هاللحظه وصلت الصاله وين كانت حصه مع عليا...دخلت وسلمت على اختها..
نورة: هلا والله...يعلني ماخلى من هالويه الحلوو.... شخبارج اختاه..؟؟
عليا: بخيييييير وعافيه شحالج انتي نوير..؟
نورة: نشقح الحمد لله.. امي بعدها ماظهرت من المطبخ..؟؟
عليا: ماشفناها...
نورة: اسميييها امي...من الصبح انا يالسه وياها في المطبخ..وبروحي شفت ان كل شي جاهز بس باقي يشلووونه الميلس... لكن هي لااا...لازم الاشراف هذا..
عليا: ههههه هذي هي امج...اذا ماتعبت عمرها ماترتاح...
نورة: الله يهديها..الصراحه مب سايره المطبخ توني مبدله ثيابي...
عليا: سلمتي على خطيبج..؟؟
نورة: هههههه هي سلمت عليه...
لاحظت نوره بطرف عينها ان حصه نزلت عيونها للارض...ومر شبح الحزن على ويهها... اكيد تذكرت سيف..عشان جي هي ماتقدر تملج... مجرد كلمه خطيب تذكر حصه بسيف..كيف عيل اذا ملجت نوره..؟؟؟
اذن المغرب...وشربوا الشوربه وساروا يصلون...وبعدها رجعوا وفطروا فطور كامل...كانوا مستانسين بشوفة عليا بينهم.... وعليا وايد تستانس يوم تروح عند اهلها يومين تغير جو وياهم وتاخذ علومهم...
في امريكا خليفه كان مرتبك بسبب مشاعره...مب عارف كيف يعالجها...وحمد ربه انه حاليا بعيد عن البلاد...لانه مب قادر يتوازن...لازم يوصل لحل بخصوص هالمشاعر بعدين يقدر يجابل اهله ويعرف كيف يتصرف...مؤخرا ادرك انه بعده يحب حصه...وكره نفسه لانه تذكر مشاعره هاي بعد وفاة ربيعه..شوه يعني..؟؟ توفى سيف خلاص يعني انا لي الحريه اني ارجع احبها واخطبها...لا...لا مايصير...احس انها خيانه....الكل بيقولون ماصدق ربيعه يتوفى عشان ياخذ حرمته...واصلا حصه الاحتمال الكبير انها ترفض...هو يعرف سيف الله يرحمه...بسرعه الواحد يتعلق فيه...فما بالك بزوجته...!!!...اكيد بترفض اي واحد من بعده حتى لو كان ولد عمها...آآآخ يالقهر شسوي...؟!...تذكر اخر مره سال نفسه هالسؤال...كانت يوم قرر انه يصارح حصه بمشاعره عن طريق رساله....وتذكر الرساله اللي مازالت رغم طول الوقت اللي مر في بووكه...كان خاطره يقطعها ويعقها في الزباله...لكن ماهانت عليه...وقت طويل خذه وهو يكتب هالرساله... وحط فيها كل آماله...واحلامه... وتفاؤلاته بان حصه بتكون له...كانت هالرساله عزيزه عليه....مايتحمل يشوفها فمكان مثل الزباله...هالرساله انكتبت يا انها تكون في ايد حصه..او في ايده هو....ومافي اي مكان ثاني لها....الوقت....الوقت هو اللي بيعالج كل المشاكل...وبيعطيه الحلول....واذا كانت من نصيبه...مافي اي شي بيمنعه...مثل مايقولون الصبر مفتاح الفرج...خلنا ندرس ونتخرج ونصبر...وبنشوف...
نورة كانت توها مخلصه صلاة التراويح وقت مادخلت عليها فطوم بتيلفونها... وقفلت الباب وراها
فطوم: مسكي....
ومدت يدها بالتيلفون...اطالعته نوره باستغراب
نورة: حق شو..؟؟
فطوم: سعيد يبغي يرمسج...
نورة: خبله انتي ...ينيتي..؟؟
فطوم: يووه ذبحتوني انتي وخطيبج هذا..مسكي رمسيه وانا بلعب بالكمبيوتر شوي...يباج فسالفه...
مسكت نورة التيلفون متردده... وراقبت فطوم وهي تقعد عالكمبيوتر وتشغله...
نورة: آلوو..
سعيد: هلا نوااااري....شحقه تقولين لاختي خبله...؟؟
نورة: ههههه وانته اخبل عنها...شو تباني؟
سعيد: اماااااااا سؤااال...فيه وحده تقول لخطيبها شو تباني..؟؟ ابااج كيفي...حرمتي..
نورة: ههههههه ويا هالراس عن المصاخه...اقصد شو تبا تكلمني في التيلفون...تعرف انه من الممنوعات...
سعيد: ادري يابوج ..وممنوع اشوفج بعد...بس اباج فسالفه...
نورة: خير ان شاء الله سعودي...؟
سعيد: ياويــــــلي ويـــــــــلاااااااااه.......ط ارت السالفه...!!
نورة: ههههههههههههه نقـّــع فيها بتنزل لك ..
سعيد: ههههههههه خيـــــبه..صدق بدووو...نقع فيها اون..سمعيني انتي..
نوره: اسمعك..
سعيد: شحقه انصدمتي يوم طريت الملجه...
نورة: لانه شي يصدم...
سعيد: سمعي انا ماقصدت الحين...قصدت بعد عرس عبدالله بنملج..بيكون باقلج كم شهر بس عن التخرج وعقبها بنعرس ترانا...
نورة: لا سعيد..ولا حتى بعد عرس عبدالله....
سعيد: ليش ان شاء الله..؟؟؟
نورة: بسبب حصه...
سعيد: شو بلاها حصه مب صاير عليها شي...
نورة: لا صاير عليها.....ريلها متوفي...وهي بعدها ماعرست... وانا ماريد احسس اختي بالخساره اللي هي فيها....
سعيد: هممممممم...وشو تقترحين يعني يافهييمه...
نورة: نتريا لين ماتعرس حصه ...
سعيد: خييبه...واذا حصه رفضت كل حد اييها بسبب المرحوم..؟؟
نورة: لا ان شاء الله بييها نصيبها....
سعيد: نورة...كلامج مب منطقي....لين متى يعني تبيني اتريا...؟؟؟ كفايه اللي ترييناه سنين...ماصدقنا حصه تنخطب عشان ايي اخطبج...ومب ذنبنا اذا سيف توفى... بالله يعني هي ماعرست موليه نحن بعد مابنعرس..؟؟
نورة: انته لا تاكل قرصك نيي.....ان شاء الله لين عرس عبدالله وتخرجي انا حصه بتنخطب...
سعيد: سوري بس مادريت انج تعلمين بالغيب ويا ويهج...
نورة: ما اعلم بالغيب... بس مثل ما حسيت بوفاة سيف من سمعت بالحادث....احس بعد ان حصه بتنخطب...
سعيد: حسيتي بشووووو...؟؟؟ مافهمت
نورة: حسيت بوفاة سيف...يوم سمعت بالحادث...وراحت حصه المستشفى....حسيت ان الامور بتطور للاسوا..وان سيف بيتوفى...استغفر الله مادري كيف بس احساس....
سعيد: الله يرحمه...على العموم احساسج هذا مب تاكيد..فكري فيها شوي....يا عمري الواحد مايدري بعمره متى بيموت...ابا اعرس اخاف اموت قبل ماعرس...
شهقت نورة...
نورة: ....... سبـــــــــــــال...
وسكرت فويهه...وهي تفور غيض...وسعيد ميت من الظحك عليها...عرف انها بتعصب..بس كان يبا يحاول وياها يمكن تتاثر بالسالفه وتوافق عالملجه...رد اتصل لها على تيلفون فطيم وهو يفكر بغلاة هالانسانه عنده...
ترددت نوره قبل ماترد عليه...بس ردت في النهايه وتمت ساكته وهي تسمعه يظحك وتسبه في خاطرها...
سعيد: هههههههههههه...حياتي..
نورة: جـــــب...
سعيد: فديتج اسولف وياج والله...لا تزعلين...
نورة: عيل هاي رمسه ترمسها يالخايس..
سعيد: لا والله مب خايس ريحتي حلوه...وتوني ياي مصلي بعد...
ظحكت نوره...
سعيد: يعلني ماخلى من هالظحكه...نورووه...حرام عليج...ابا املج ماروم اصبر....
نورة: عشااني...اصبر لين ما اتخرج بس وبنشوف شو يصير....
سعيد: نوروووووه....!!
نورة: عشاااااني....
سعيد: هممممممممممم اتمنى حصه تقدر اللي قاعده تسوينه فينا عشانها...
نورة: حصه اللي فيها كافيها...ماري ازيد عليها... اصبر الصبر زين...
سعيد: ان شاء الله يابوج..بصبر....
نورة: انته وين يالس..؟
سعيد: فسيارتي والله...شو رايج تين عندي ونسولف...مغمجه السياره محد بيشوفنا...
نورة: ها ها ها.....هاها هاهااي...لالا ..دخيلك بموت من الظحك...
سعيد: ههههههههه ياويلي يا سخاافتج...ماتقول والله ياريت...حلاته من شووور...واحين بييك... لا...قاعده تطنز بي.... مافيج رومانسيه مثل باقي الخطيبات...
نورة: ههههههههههههههههههههههه...خليت الرومانسيه حق عقب العرس....
سعيد: لااااااه..عيل دام جي السالفه ابا املج...مايخصني...عشان اشوف رومانسيتج الي داستنها عني...
نورة: ههههههههه لالا...ماشي ملجه...اصلا يكون بعلمك انا مابملج الا قبل عرسي بكم يوم بس...
سعيد: نعم نعم.....نعم..؟؟؟؟ اسكيووزمي ماسمعتج عدل...
نورة: هي بعد شوو...عشان تزهق مني قبل العرس..؟ لا سووري
سعيد: يوووووووووه هذا الشبل من ذاك الاسد...لحقتي اختج عليا....
نورة: صدقها...
سعيد: يااااااااااالله تعيني عليج...
نورة: هههههههههههه آمين...
سعيد: هههه مستانسه بعد ويا هالراس..المهم..فطوم عندج.؟
نورة: هي تلعب عالكمبيوتر...
سعيد: قوليلها تجهز وتنزل...بنسير الشارجه...
نورة: ياااااااااالله بهالسرعه بتسيرون..؟؟ اصبروا انزين الناس رمضان وعادي تروحون الفجر حتى..
سعيد: افااا...تبيني اسوق نص الليل وامسك خط دبي..؟؟؟ ماتخافين علي..
نورة: اخاف والله بس ادريبك عاقل ومب متهور...
سعيد: فديتهم انا...والله عندي شغل الصبح ولازم اسير...برد لكم الجمعه ان شاء الله..
نورة: همممم اوكي على راحتك...
سعيد: شي فخاطرج نواري.؟؟
نورة: سلااامتك سعودي..وانته؟
سعيد: رضاج...
نورة: هههههه الله يرضى عليك ياولدي...
سعيد: هههههههه ..ولدتي عنز والا كبش قولي آمين...
نورة: ههههههههههههه اللي بييبهم عيالك ويا هالويه...تبا عيالك يظهرون جي..؟؟
سعيد: هههههههه جب يالله لا تخليني افكر بهالسوالف... بسير انا
نورة: هههههههه انزين..دير بالك على نفسك...فمان الله
سعيد: ان شاء الله..مع السلامه الغلا...
سكرت نورة عن سعيد وهي تظحك ....وصدت لفطوم اللي مندمجه بالكمبيوتر...
نورة: فطوم...يقولج سعيد يالله...
فطوم: اوووكي...تفاهمتوا.؟
نورة: ههههههه هي الحمد لله....
سكرت فطوم الكمبيوتر وشلت تيلفونها...ويايه بتطلع..
نورة: صبري..
مسكت نوره سلسلتها اللي دايما لابستنها...فظه ومكتوب فيها الله..بشكل وايد حلو...فصختها وحطتها فايد فطوم..
فطوم: حق شوو..؟؟
نورة: اباج تعلقينها فسياره سعيد...
فطوم: هههههههه ياويلي انا...ان شاء الله بعلقها..
نورة: يالله بنزل وياج...
نزلن البنات..ودخلت فطوم حجرتها تشل اغراضها وتتلبس ونوره سارت للصالة عند امها وحصه وعليا...
ام خالد: وين فطيم عنج..؟
نورة: آآ..سعيد يترياها في السياره وسارت تتلبس وتشل اغراضها ..
ام خالد: بيروحون الحين.؟؟ فديت سعيد ماسلمت عليه...
نشت ام خالد ولبست برقعها وطلعت لسياره سعيد تسلم عليه...وداخل البيت طلعت فطوم وشاله شنطه صغيره وسلمت على البنات وعليا وطلعت وين كانت عمتها واخوها واقفين عدال سياره سعيد...
فطوم: هاااا عموووه..انا بسير شي فخاطرج علينا..؟؟
ام خالد: سلاااااااامت روحج بنتي..سلمي على اهلج وابوج....
فطوم: يوصل ان شاء الله... فمان الله... لفت عالسياره وركبت وسكرت الباب..
سعيد: يالله عموه تخلفنا العافيه عليكم...فمان الله
ام خالد: الله وياك ياولدي لا تسرعوون...
سعيد: ولا يهمج...فداعة الله...
دخلت ام خالد البيت يوم كان سعيد يريوس بالسياره وقبل مايطلع من الباب الكبير بسيارته دخلت سياره ثانيه... ماشافوا منو فيها...بس سعيد ابتسم ...ووقف سيارته..
سعيد: اوووووووه هههه الشيخ حمدان بن محمد...صبري
بطل بابه ونزل وهو يظحك...وفطوم قلبها يدق بشكل غير طبيعي ..ما تغشت لان السياره مخفي...وبيني وبينكم...عشان اطالع بحريه...وشافت حمدان وهو يوقف سيارته..وينزل وهو يظحك ويسولف بشي هي ماتسمعه...محلاه...كندوره سودا وسفره حمرا..نقطة ضعف فطووم هاللبس ...وعاد منوو لابسنه..حمدان...سلامي عليك والله....
حمدان: ويييييييييييين ياخي بتروح يوم انا يييت عاد...؟؟
سعيد: عن الخريط هذا..انته امبوونك ياي وماتدريبي اني موجود في العين...
حمدان: صح انزين بس عاد خلاص شفتك ومالي خاطر اقعد ويا الشواب..
سعيد: منو شواب؟؟ عمك سار يرقد...
حمدان: مب عمي...خالد وناصر وربعهم...
سعيد: ههههههههه هذيل شواب...حرام عليك...
حمدان: المهم اقعد شوي...يالله ساعه والا ساعتين مابظرك...
سعيد: والله ماقدر ...اختي في السياره ومحملين اغراضنا ...خلاص بنروح..بس يوم برد بالجمعه ان شاء الله بتصلك..
حمدان: همممم..خلاص على راحتك....الله وياك...ولا تسرع..
سعيد: خليت السرعه لك...هههه مب كل الناس شراتك...
حمدان: وهذا اللي معدل علي انا ...لو تصبر شوي بتشوف سيايير المعجبات توها لاحقتني...لاني غير عن الناس..
سعيد: هههههههههههه خسك الله مابشوف غير سيلانيات الحاره ..
حمدان: هههههههههاي..ودّك انته اصلا...شو تحسب السيلانيات اي حد يطيحهن..؟؟؟ ..السيلانيات غيير...فن...يبالهن واحد فاهم شخصيتهن وطبيعتهن....شو عبااالك انته...!!!
وهز حمدان راسه هزة هنود....وهو يلعب بحواجبه...مات سعيد من الظحك... ويوم خلص ظحكه..قال..
سعيد: انته سوالفك ماتخلص.... برايك بتلعن خيري هاذي عالتاخير...المهم نتلاقى ان شاء الله بالجمعه..شي فخاطرك..؟؟
ابتسم حمدان على طاري فطوم...ثره لسانها مايطول عليه هو بس..حتى لاهلها....لا زين والله....
حمدان: سلامت راااسك... فمان الله..
سعيد: فداعة الله...
ويوم عطى سعيد ظهره لحمدان عشان يركب السياره وفتح الباب...رفع حمدان ايده وسوا باي باي لفطووم...اللي صدت عنه صوب ثاني وهي قافطه تخاف سعيد يشوفه... متهور ...طول عمره متهور هالحمدان.....
روح سعيد واخته الشارجه... وحمدان سهر ويا عيال عمه فبيتهم.....