بعيد الهقاوي(عويد المطرفي) ونايف السميري
نايف السميري :
ياسلام الله على شاعرٍ حلمه بعيد
.................... من رجالٍ فالمواقف تبين افعالها
يابعيد اقرب هنيا معي علمٍ جديد
.................... دوب زان الليل والخيل من خيالها
بعيد الهقاوي :
مرحبا ياشاعر(ن) يوم اشوفه يوم عيد
.................... من رجال(ن) تدعم افعالها بأقوالها
جـــيت يانايف وربي يـــدبر مايـــــــريد
.................... والمعاني عمها يخـــتلف عن خالها
نايف السميري
ليه يوم انك تفك البعير بغير قيد
.................... مع جمالٍ مايسر الموده حالها
اخبرك رجال مدرك وتفكيرك سديد
.................... بس هذي كيف راحت عليك احبالها
بعيد الهقاوي :
البعــير اللي تقــــوله ترى باسه شديد
................. الحمول الكايده كلها يشتالها
مايفيد النصح في واحد(ن) راسه عنيد
................. خل كل الناس يا صاحبي في فالها
نايف السميري :
ياعويد لاتدور مع المفلس رصيد
.................... كلمةٍ صحيح لو قالها من قالها
صح راح تفيد لكن ماضنك تستفيد
.................... العدود اللي تردها مغور جالها
بعيد الهقاوي :
والله اني مااطلب المـــد من كف الزهيد
.................... نعـــمل الحسنات والله يجــيب إبدالها
انت لو تدري عن الوضــــع كله ماتزيد
.................... جرح ناس(ن) ذاقت المـرّ في فنجالها
نايف السميري :
المثل يقول مال الحديد إلا الحديد
.................... دور اللي صرفها ماينقص مالها
المعاني ماتبي واحدٍ قلبه بليد
.................... شفها في واحدٍ مايجي يبرالها
بعيد الهقاوي :
احسب انك فيك رحمه واثر قلبك جليد
.................... تنكر الرحمه على الناس ضمن اعمالها
يوم اسوي خير مااحسب لزيد ولاعبيد
.................... ارجـــي الله في ليال(ن) يغـــــيب هلالها
نايف السميري :
قالها مطلق لمستور وافهم يارشيد
.................... من معه حيله ليا وقفت يحتالها
ليه مادورت دربٍ يجنبك الصعيد
.................... واسترحت من القضية ومن موالها
بعيد الهقاوي :
ماعليه من نصائح ملوية القــــــصيد
.................... حافظ(ن) فكري تحت غترتي وعقالها
ليه ادور راي غيري وانا رايي جويد
.................... مااعطي اليمنى لناس(ن) تمد شمالها
نايف السميري :
ياعويد والله اني سعيد مع السعيد
.................... ماحسد اهل الخير فاللي يحوشه فالها
والدعاوي كلها لو نقول ولو نعيد
.................... كلمةٍ مع نفس مخراجها مدخالها
بعيد الهقاوي :
الرساله جاتــنا يالسميري فالـــــبريد
.................... والحسد مايفقد الناس روس اموالها
اعرف انك للجزيله ياابو باسل تصيد
.................... والغــصون اليابسه مايضـــل ظلالها