العمر ما يعد بنقص ولاّ زياده= من سنينٍ مضن لك لو قوي العزوم
عمرك اللي تعيشه في هناء وسعاده= خالي البال ما تشغلك بعض الهموم
راضي برزق ربك ماشيٍ في ركاده = ما تعيقك عواصف او رياح السموم
تعرف ان الخلايق مدرعمين ببلاده= مثل قطعان تركض بالسهل والحزوم
كل منهم يبي الدنيا وياصل مراده = مهما يفعل فلا به من ضميرٍ يلوم
ما يفرق حلال ولا حرامٍ بزاده = المهم كيف يصبح بالفلوس مخدوم
بعد ماكان خادم صار راعي سياده= يحسبنه مخلد والزمن له يدوم
ما تفكر بمن قبله رعاة وقاده = كيف راحوا وخلوا كسبهم والحلوم
كان تبغى السعاده والعمر في مداده= لاتكن اي حقد لو ظلمك الخصوم
ولا تفكر بظلم اللي تحيقر جواده = ولا تدور طموحٍ ياخذك للوهوم
ولا تنافق لشخصٍ شان ترفع مزاده= تمدحه كذب حتى ترفعه للنجوم
وانت تدري بأنه ما يساوي جراده = مرتشي او حرامي لو يصلي ويصوم
ومن يجاهد لنفسه ذالك اعظم جهاده= فجاهد النفس لاتغريك بعض الطعوم