اخواني اعضاء منتدى الفطاحلة الكرام اقدم لكم هذه القصيدة وارجوا ان تحوز على رضاكم .
يالايمي في البر لا تكثر اللوم=ارجوك لا تكثر علي الهذاري
والله لولاي اركب الجيب واحوم=واقطع به افجوج الخلا والصحاري
في كل وادي اسج بالجيب واهوم=وابعد عن هموم الزمان الحضاري
الشاصي اللي كل مافيه منظوم=ماكنه الا مصمم للطواري
كل ما حصل بالبال تكدير وهموم=القاه دايم لي خويا مباري
مفلله والعفش في الحوض ملموم=وسبير جاهز خلف كتفي يساري
والى طرت لي مشيتي ولو بعد نوم=احدد المشوار حسب اختياري
ماني محدد موقعا فيه ملزوم=منين ما ريضت شبيت ناري
وافرح الي شفت السما كلها غيوم=وهبت من الغرب الجنوبي ذواري
وافرح الى هلت على ضلع وحزوم=وقام يتطاير من رشاشه غباري
وافرح ان شفت السيل من بعده يزوم=وقام يتحدر من علو انحداري
وافرح لشوف الروض معدي وموسوم=وافرح الى شفته كساه الخضاري
هذا اختصار لواقع منه محروم=اللي حياته كلها خنفشاري
وانا حياتي ومتعتي دايم الدوم=حب الطبيعه واتساع الصحاري