قال الشاعر الكبير محمد العبدالله القاضي التميمي
يسند على الشاعر محمد العلي العرفج التميمي :
البارحة يـوم المخاليـق ضلـوا=نيام والهاجـوس بالقلـب فاجـا
أركبت ربعٍ فوق الانضـا تعلـوا=عيرات يطون موحشات الزراجـا
من جورة الفيحا بليـل استقلـوا=والصبح عند الليث سفر الحجاجا
ابو زيد مقدمهم لا غابـوا اللـوا=وقربت خطى ربعه وكثر المناجـا
يثني خلاف الربع إلى ما استذلوا=ربعه إلى ثار الدخـن والعجاجـا
عيد الهجافا ريفهـم وان تحلـوا=زوله عقب قطع الخرم والفجاجـا
عد يجونـه مـن بعيـدٍ وملـوا=صملانهم لانش حطـوا لهماجـا
عطوه خطي واسمعـوا لا تملـوا=وقولوا عشيرك فيه مثل الخلاجـا
على الذي بين المعاليـق ذلـوا=وبدر البها في غرتـه كالسراجـا
ونهـود كالرمـان للثـوب قلـوا=وبدر الدجا له بالحجاج التعاجـا
ولفه محين داخل القلـب خلـوا=رمح الهوى من بين الأضلاع لاجا
ياما انهلوا زرعٍ بقلبـي وعلـوا=وياما دهانـي بالمعايـا ولاجـا
وياما خطف قلب الهواوي وشلوا=جيش الشقا والهجر وقل المراجا
للروح ياريف المراميـل سلـوا=بالعون جافينـي ظبـي الزراجـا
يابو علـي حبـان قلبـي تغلـوا=وتبدلوا بالصـد عقـب المعاجـا
ولاقط فينا يانهـا السـد جلـوا=ولا ايحم المجمول من له تلاجـا
مصيونـةٍ كـل الملامـا تحلـوا=زوله ولا يوم على الشين عاجـا
دونه شغاميـمٍ عصـاتٍ وسلـوا=حدبٍ مضاريبـه لهـن انثجاجـا
افزع لمشغـوفٍ قواديـه ضلـوا=وانا امتحنت وصاحبـي باتهاجـا
جرحي عنه كل الدخاتيـر كلـوا=وانـت لجـرح قلبـي عـلاجـا
افزع لمن له يافتى الجود خلـوا=قلبه لميـدان العـذارى مداجـا
فردّ عليه ابو زيد مرتجلاً هذه الابيات :
حي الجواب وحي من عوسر اللوا=حيه عدد ما ساج باليـم ساجـا
أو عد ما هلـت مـزون وهلـوا=اهل السخا والجود بالضيف لي جا
ترحيب احلى من حليـب وتلـوا=سكر نبات ذوب شاهـي وكاجـا
وابها من العنبر مع اللي تفلـوا=والذ مـن در البكـار العساجـا
عذب النبا كان النشاشيـد كلـوا=عسار للقيفان مـا كـان عاجـا
عدل الغرايب من ضميـر تحلـوا=مثل المطر بامر الولي باندراجـا
عينيك باللي يوم جا الـب هلـوا=ولا خير باللي ما يهلي إلـى جـا
عسلوجة مامنه الادحـاش علـوا=فعد انهوده مثل بيـض الدجاجـا
إن كان اهل عدم الوصايف تغلوا=سقنا لهم ما كان ناجد ومـا جـا
فان كان مالك يافتى الجود اجلـوا=ابشر بصبيـان امنـاه العلاجـا
إلى ثار مثلوث الـدوا واستقلـوا=كم راس شيخ عن علابيه ما جـا
كم اطلقوا من عيطموس وخلـوا=شوقه عليه امسلهب الريش راجا
ما قل دل وما كثـر منـه ملـوا=والهرج كثره يالقطامـي سماجـا
تحياتي للجميع