[عبدالله الشويمان]

المشاركة الأصلية كتبت بواسطة فلاح بن منشار

الله يبقيك يابو عبدالله

هلا ياصاحبي عثمان مثلك تاج فوق الراس = وكل اهل الفطاحل بالموده والوفاء ناسي
انا انسان عادي لي مشاعر مثل باقي الناس= ونظم الشعر متنفس وفيه اصور احساسي
ولد شاعر كريم وشيخ ربعه مجلسه وناس = تربينا على حب الوطن والقدس هوجاسي
موظف بالحكومه واصرف الراتب على الخُلاس= على الجوال والكهرب وما يخفاك هنداسي
احس جروح قومي من حدود الصين الى مكناس=وكل المسلمين اخوان واعرف ان ذا ساسي
اخذت من الحياه ادروس شفت ان البشر اجناس= بهم راعي الوفاء والطيب واكثرهم توناسي

صح السانك يا اخ فلاح بن منشار..

سبحان الله شوف التقارب بين ابياتك وابياتي..

هذه الابيات مطلع من قصيدة قلتها في ديرتي منذ سنه تقريباً بعنوان((وفاء واخلاص)) ..

وفا وخلاص وعلمٍ هايض من داخلي بحسـاس=أقول اللي يجول بخاطـري ويـدور بالراسـي
ونا شاعر ولد شاعر ولدت بديـرة النومـاس=مدينه بالقصيم وفيها ناس أجواد ..هم ناسـي
هم أهلي هم عزاويي وهم تاجٍ وفوق الراس=وأهل الديره أهلٍ لي وربعٍ طيبهم كاسي
أيا المذنب أيا دار الكرم والجود مثل الماس=زلالٍ في هلك مع طيبهم ما مثلك اجناسي
على جال الذنائب من فياضٍ جا مطرها رياس=على كل اتجاه الاوديه والسِّيل عساسي
تسميت المذنَّب من قديم ومن عهد جساس=وبني إهلال صالوا فيك وجالوا في زمن ماسي
الا يا المذنب اللي عامرٍ بالخير مابك باس=وهذا من فضل ربي زهيت بزين الالباسي
زهيت ومن عهد عبدالعزيز اللي وضع له ساس=بأرض المملكه أسس أساسٍ للبناء راسي
محبه فيك اقول الشعر وقلبي طايب الاحساس=لأنك ديرتي وديرة هلي تاجٍ على راسي