[الطائر المهاجر]

بمناسبة العيد الوطني للمملكة العربية السعوديه
ارجو من جميع الشعراء والشاعرات
وضع قصائدهم الوطنيه في هذا الموضوع

الطائر المهاجر
1- سعودي وافتخر

سعودي وافتخر بارضي ولا ني بالفخر مغرور = الى من قيل لي وش ديرتك قلت السعوديّه
رفيع الراس بافعالٍ حقيقه ما تعرف الزور = تسطرها تواريخ الفخر صفحات ورديّه
كتبنا المجد بعد المجد سنينٍ ماضيه ودهور =على صدر الزمن مكتوبةٍ بحروف ماسيّه
لنا الماضي لنا الحاضر لنا مستقبلٍ من نور= لنا التأثير في الدنيا ببصماتٍ حضاريه
من الإسلام منبعها فمنهاجه لنا دستور = على درب الموحّد صادق الأفعال والنيّه
ابو تركي سليل المجد نور الكون في الديجور= ومن بعده رجال ارواحهم للدار مرهيّه
توحدنا بعد كنا ضحية جهلنا والجور = وصرنا كلنا اخوه نعيش بكل حبيّه
من الآمر إلى المأمور منهجنا الإخاء والشور= على درب التساوي والعدل باوضاع مرضيّه
وقدوتنا رجالٍ لاجلنا لو داسوا المخطور = يبون الدار مثل الشمس في الأكوان مرئيه
والى من بانوا الحسّاد واللي بفعلته ماجور = يبان الجد وقت الجد بافعال النداويه
لتبقى ديرتي رمز الرخاء تحيا امن وحبور= بفضل الله وفضل اللي رعاها بكل حنيّه
ابو متعب ابو كل الشعب في برّها وبحور= اذا ناموا بقى ساهر لتبقى الدار محميّه
عزيز النفس متواضع ولا يرضى بحني ظهور= ولا تقبيل يدّينه من اللي جاه لتحيّه
حماك الله يابلادي لتبقي حصننا المعمور= تعيشي لو فنينا كلنا نفدي السعوديه

2-هلا بك عيدنا الغالي

هـلا بك عيدنا الغالي هلا والحب لبلادي = هلا بالـورد والكادي ابارك للسعوديّه
تعودونه سنين طوال بفخر وعز الامجادي = رفيعي الراس بالعالي على العادي نداويّه
عبرنا للعـلا نبني حضاره فوق الاجسادي = وكلٍ يفتخر انّه سعودي اصل وجنسيّه
حميّة دوم تلقـاها وشهـامه للكـرم حادي = رجالٍ وين ما نمشي سباعٍ حزّة الهيّه
سعوديه من اقصى الشرق لاقصى الغرب والوادي = ومن اعلا الشمـال لتهمها والروح نجديّه
هلا بك عشقي الأول هلا بك فجر ميـلادي = هلا بك والغرام اكبر بقلبٍ صادق النيّه
تعالي افرحي حبّي وغنّي واطربي الشادي = على حبّك تلاقينـا ياشمس الكون يافيّه
سعوديين يالعزوه يا فخري بكل الأعيادي = نبي وقفة رجل واحد لاجل أمن السعوديّه
جسد واحد فكر واحد ما بين الحضر والبادي = وحب الدار يجمعنا على خـوّه وحنّيّه
حصاني الحقد لو كثرت تبي الفرقه والافسادي= نعرّيها ونحمي الدار ونكشف من خفى غيّه
سعوديين ما نقبـل تطول الـدار الانكادي = نفاديهـا بدم القلب والأرواح مرهيّه
نعيش بحاضرٍ احـلا ونبني مجد الاحفادي = حمـاك الله يا بلادي بعالي المجد دريّه

3- الزعيم

السفينه لا لقت رجلٍ حكيم = قادها والموج عالي ما يهاب
لو يخفّف سرعته فهو الفهيم= عارفٍ بالبحر وانواع الشعاب
كل دربٍ لو بدى لك مستقيم = البخيص أدرى وحاسب له حساب
لا تعجّل بالحكم تصبح خصيم= للسفن اسرارها وقت الضباب
ديرتي تفخر بمن فيها زعيم= في قراراته رسم درب الصواب
يجتهد يختار مَنْ فكره سليم = للمواجب رجلها عال الركاب
ولا تبيّن وانكشف إنّه غشيم = بالركاده يسنحه ببلا عتاب
والمعادي لو نوى أمرٍ عظيم= يكسبه بالود في حسن الخطاب
كاشفٍ سرّه ويدري به سقيم = ينتظر يقفي مثل زل السحاب
خطنا الواضح على الوضع القديم= ما تغيّر يوم عن شرع الكتاب
ومن تغيّر بالتطرف من خميم= وصار ضد الدار ماله من صحاب
طوعوه اللي يبونا في جحيم = يخدمون اللي دفع كشف الحساب
انعمي يادار بالخير العميم = ولا تخافي من حصاني أو ذئاب

4-نحمد المعبود

نحمد المعبود علاّم السريره = من عطانا رجال تحكم بالعداله
من ذراري فارسٍ ساد الجزيره= وشيّد البنيان ساسه باعتداله
امس حنا في ذرى المذكور خيره= وابتدينا اليوم مع راع الأصاله
مرحبا بك الف شيهان المسيره= يابو متعب من سبق فعله مقاله
كل شعبك جاء يبايع عن بصيره = كلهم مستبشرٍ يا طيب فاله
خادم البيتين حنّا لك عشيره = والشعب كله يحبك لا جداله
من البحر للبحر وجبالٍ عسيره= شرق ولاّ غرب ولاّ اقصى شماله
موطن واحد كبيره مع صغيره = مملكه وحده على هدي الرساله
مرحباً مليار ماهي بالكثيره = بابو متعب من يشوف إنّا عياله
ومرحبا مليار عضده يا نصيره= ياولي العهد يمناه وشماله
ابو خالد فخرنا في كل سيره= درعنا والحصن في قو احتماله
عهدنا الميمون ما نخشى مصيره= دامكم فيّ نتفيا في ظلاله
نفتخر بافعالكم في عز ديره = ونشكر الله حكمكم ما به مثاله
الشعب لو نام بعيونٍ قريره = انتم اللي بالسهر ترعوا حواله
انعموا يالشعب بخيورٍ كثيره = وارجهنوا كل واحد في حلاله

5- صقر الجزيره

هـلا بك عيـدنا الغالي هـلا والمجد لبلادي = هـلا يا كل فرحتنـا نرددهــا بالانشادي
هـلا بك يا ديـار السعد فعيدك عيد ميلادي= هلا والفجر من نورك عطاني النور لاحفادي
هلا بتـاريخ عزتنـا إذا تاهت خطاوينا =
نهض صقر الجزيره ليل يلبي صوت المنادي = يسجل للأمل خطوه ولا يخشى من العادي
يجمّعنـا بعـد فرقه فلا حـاضر ولا بـادي = اخـوّة دين في دوله عطت للـدين القيادي
وتشرق شمس تنسينا قرونٍ من مآسينا=
عهـود الخير تتوالى من اعيـادٍ الى اعيادي = وراها رجال من عزمه بنوا للدار الامجادي
رجـالٍ تكـره الـراحه ولا تهنـا بمرقادي = تبيها فـوق في العالي تبيها فوق الاشهادي
تبيها نجمةٍ تسطع وتقهر من يعادينا=
بدار السعد شفنا السعد ومجد بكل الابعادي = حضاره فوق نتصوّر وامان وطيب في الزادي
يعيش الناس في نعمه بكل السهـل والوادي = بعـد ذاك الفقر والجوع في ازمـان الاجدادي
رعاك الله يابلادي من الذلات تحمينا=

6- النجم الصاعد

ذا نجـم ولا بارقـات الرعــودِ = والا شهابٍ محـرقٍ كل وجـاس
اشـوف يوضي مستمر بصعـودِ = ما هاب في دربه من الجن والناس
ولا خاف من عاذل ولا من حسودي = فطويق ما هزه عواصف ونسناس
هذا رفيع الشان هذا السعودي= رمز الكـرم والمرجلة طيـر قرناس
فخر العرب واصل العرب بالوجودي= درع العقيده عزها الركن والساس
حامي حمى الإسلام ضد اليهـودي = ومن سولت نفسه على كل الاجناس
اصل الحضارة من قـديم العهـودي = يشهد له التاريخ ماهوب هوجاس
ومن يخطي التقديـر فيه الشهودي= يسأل صحارينا عن قبور الادنـاس
ومن يستغـل لطيبنـا في برودي = للصبر حد كان ظلمك من خسـاس
ومن مد يدّه صادقٍ بالوعــودي = حنا نحشمه دام للخيـر غـراس
يـادارنا حنّـا رجـال العهـودي= نفدياك بالارواح مايلحقـك باس
نخضـع لأمرك دايمٍ لك جنـودي= ولغيرك فلا والله يخضع له الـراس
إلا سجــودٍ للطيـف الــودودي= رب خلقنـا دوم للـدين حـراس
ولا من انتخيتي انتخيتي اسـودي = قبايـلٍ تاريخهـا رفـع الاقـواس
وان دندنت ابواقهم بالجحــودي = حنا رجال الجد للحرب مقبـاس
يا عزوتي يا تاج راسي عضـودي = الــدار تبغي منّكم كل نومـاس
تبـي رجــالٍ واثبه كالفهـودي = في دين في عقلٍ من العلم لبّـاس
يتجنب الـزلات يبـذل جهــودي = كـلٍ بدربـه بـاذلٍ كـل الانفاس
لاجل الوطن نعمل نغيض الحقودي = من قال ما نقـدر بليّـاه نحتـاس
ولاجل الوطن ندرس علوم تفـودي= في يوم نستغني عن الغرب الانجاس
لك يا وطن حق وعلينا السـدودي = ومن لا يسد الدين للحق بخّـاس