رد: مني سالفه .. ومنك سالفه..
*** الحمد لله على السلامة حوريه طفولتك كانت مليئة بالمغامرات هههههه ... وانا عندي سالفة باسدحها مع سالفتك يونسون بعض. في اجازة من الاجازات قررنا نسافر لدولة تشتهر بالطبيعة الخلابة والجو الخيالي .لكنها تشتهر بالمطاعم السيئة وان اللي يزورها لازم تجيه نزلة معوية عاد حنا اخذنا العلم زين واخذنا كل احتياطاتنا وكأننا بنروح للبر ما خلينا شي يخص المطبخ الا وحملناه معنا وكنا عائلتين وكل وحدة تذكر الثانية أخذنا معنا موقد صغير وقدر وولاعة وحتى الخبز والجبن اخذناه من عندنا من كثر ماحذرونا من أكلهم عقدنا العزم اننا ماناكل من عندهم شي وصلنا البلد بحمد الله سالمين ومبسوطين من الاحتياطات اللي معنا ومن المطار للفندق وصلنا وحنا ميتين تعب وجوع بس مستحيل ناكل من عندهم . قررنا نطبخ وشبكنا الموقد على الكهرب وسوينا ذيك المكرونه اللي ما مثلها عاد لازم نعطي ربعنا في الرحلة أرسلنا القدر مع وحدة من البنات لهم عاد هم على بالهم مستحين رجعوه وجت البنيه المسكينه بقدرها من أخر الممر لغرفتنا اللي باخر الممر من الجهة الثانية قالت ماما يقولون مانبغى. عاد انا رجعتها بالقدر وقلت قولي لهم تقول أمي والله تاخذونها ولا ترى أزعل منكم. والبنت رايحة جايه بقدرها أثاريهم شايفينها موظفين الفندق عاد يوم جلسنا وحطينا مكرونتنا بعد يوم حافل بالتعب والجوع واذا بالباب يطرق؟ سألنا : من الطارق ؟ واذا به ............... مدير الفندق<<<قلبت فصيح المهم المدير بكبره عاد بيدخل علينا عشان يمسكنا متلبسين طبعا قعد زوجي ساعة وهو يجادلهم وكأن حنا ما سوينا شي خطأ المهم مكرونتا صارت ايس كريم وحنا نجاول نتخلص منهم وكانوا بيحولونا للتحقيق عاد فرصة وجتهم لحد عندهم مسكونا متلبسين وأخذوا أدوات الجريمة الموقدوالقدر أخذوه بقرارة المكرونة اللي فيه ما خلونا نغسله عشان تبقى اثار الجريمةوقالوا بكرة نتصرف معكم .ولانحملكم غرامة مالية على مخالفة التعليمات. المهم من بعد هالموقف تأدبنا وصرنا اذا ما اشتهينا أكلهم ناكل خبز وجبن ونقول الحمدلله جت على كذا. ***