[الطائر المهاجر]

قولوا لها لو كان بالود ودي = يرجع زمان فات يوم اننا صغار
يومي انا ويّاك يدّك بيدّي = وقلوبنا بالحب ماخافت اعصار
ما نحسب لعاذل ولا لقول ضدي= ولا كان في الحسبان وقتٍ اذا جار
لكن تبيّن ما حسبنا بجدّي= سراب خادع كنه اليوم ما صار
الوقت وقّّف معلنٍ للتحدي = وتفارقت ارواحنا بفعل الاقدار
مدري السبب انتي او اني بشدّي= فوّت فرصه ماتكرر بالاعمار
وهذي النتيجه في حسابٍ وعدي= كلٍ بدربه راح والحب تذكار
وقلبي على لاماك بيّح لسدي= من حرّ ما يوجس تهيّض بالاشعار
العود ناحل والزمن به يهدي= وبعدك اعيش بليل ما يعرف اقمار
كلما اطالع صورتك باح بدي= وتجاوب دموعي على الخد مدرار
مالوم دمعي لو وسم فوق خدي= آثار حزنٍ بين الاضلاع كالنار
ولا لوم وقتي فالسبب فعل يدي= فرطت في حب ندر بين الاخيار
الله يسهل لك دروبك بجدي= ويعينني بالصبر في كل مشوار