يسعد صباح العيون اللي تناظر من ورى الشاش =عيون ما صوّب عيوني لما عينٌ سواها
ترسل سهوم المنايا والهوى من بين الارماش=مع نسانيس نور الصبح صوبني هواها
وانا جفوني لها واحد لحاف وواحد فراش =يوم ان شوفي قبل يحكم على النظره قراها
يامن يداوي جروح القلب واعامله بالكاش=والا يخبر كحيل العين وين القا دواها
يوم ان جرح العيون السود مايبرى بالانعاش=ولايداويه طب اللي جروحي مادراها
انا اشهد ان الهوى طبعه ظلوم ودوم غشاش=ناره بقلبي ليا شفت اللما يشعل سناها
ياليتني طير واحلق بجنحاني والارياش=في جو ديرة وليف الروح واسبح في فضاها
واشاهده كلما مد الخُطى وابني لي اعشاش=واسكن جواره وامني الروح واحقق مناها
واعيش في جوه اللي للمخايل فيه رشاش=من وبل مزن السحاب اللي يهلل من سماها
وانقش على باب داره يابرى حالي بمنقاش= يسعد لي العين والنظرات يسعد لي لماها