[الطائر المهاجر]

الأب لا منه بذل كل مجهود = مع العيال فلا عليه الملامه
لامن طلع فيهم نكيدٍ ومنكود = ونفوٍ غريب بين بوم وفدامه
فالهادي الله خالق جحوش وفهود= وما قدر الرحمن نرضى تمامه
كم من رجل بالطيب ما عنه منشود = خلف لئامٍ ما مشوا باستقامه
وكم من لئيمٍ منحرف ما وفى عهود= انتج رجال بالوفى والشهامه
ولا من بحثت الأمر في عقل وركود= تدري بأن الأم ساس السلامه
فالطفل من صغره وهو تو مولود= يطور صفاته قبل يبدا فطامه
كانت حنون وعقلها يازن الطود= يصير ناضج بالفعل او كلامه
وكانت انانيه تصعفق بلا ركود= يصير مهزوزٍ بعقل الحمامه
لا من كبر ما همها أي منقود = يلحق ولدها لو مشى في عتامه
تغطي عليه ولاتبي يدري العود= حتى يفاجى بعلته والرخامه
ماعاد يمدي يمسكه باية قيود= ولو هو قسى زاد انحراف ونقامه
ماله سوى انه يشغله دونما حدود= ولا يغيب عنّه غير وقت لمنامه
يضحي من اجله باي مكسب ومردود= بالبيت حوله كاسبه بالندامه
ويصير له قدوه على الخير معهود= عقله يقوده في دروب الكرامه
ومهما فعل فالهادي الرب معبود= اما صلح وإلا طلح في ختامه