قصيدته المشهورة "الشيخه"
يالله يامدير الهبايـــب والادوار = شانك عسى تصريف شانك لنا خيــــر
يالله ياعالم خفيات الأســــــرار = يامعتنــي بالخلق والي المقاديـر
قلته ونوم العين عن جفنها طـــار = والقلب كنه فوق حامي المجاميـــر
جانـا الخبر يالابتي ولّية الــدار = سكانها الأجناب هم والبقاقيـــــر
من عقب ما كنا بها مثل الاســـوار = نامر وننهي نحمــــي الجار ونجير
من عقب ماكنا هنيا كما الـنـــار = نقطع بها شر وناصل بها خيــــــر
حنا الذي ترجع لنا كل الأشــــوار = لا صار بالقالات شوار وامـشيـــــر
حامينها في لابة تسقي الامـــــرار = عدوهم ما يحتسب للمخاسيــــــــر
لابد ما ناتي لابانــــــــات زوار = باسلاف عجلات تعدى المظاهيـــــــر
يهوّمن هومات بعيدات وعســـــــار = وكم ذيرن من غافل مابعد ذيـــــر
كم فاجن العدوان غرات وجهـــــار = الى انتون كم يسبقن من معاييـــر
ظعاينن حطن ملكهن بسنجــــــــار = وبنن على الخابور زين الدواويــر
وتواهلن الزور حصن لهن كــــــار = ومن البطين الى الرها له معابيـر
وكنن مع الحاوي وداجن بالامصـــار = وجابن خفارتهن بفكر وتدبيــــــر
وحطن على السلمان طيحات الامطــار = وصارت لهن لينه وخضرا مصاديــــر
و(أبا ذراع) أضحى مقيم على الـدار = وشالن حلال المحمرة والمساميــر
ومالن على رجم الهيازع وسنــــّار = وجابن حلال المحمره من ورى النيـر
نامر وننهي مانداري بـــها ادوار = ونهدي العاصي بخسر ومخاسيــــــر
وراجن على الشنبل وداسن الأخطــار = وهدن بها العاصي بيسر وتيسيــــر
ثم انتحن مع كفة الشط عــــبــار = وهاجن وماجن فوق روس العناقيـــر
واقفن وكالن من شثاثا بالاسعـــار = وحطن لملموم المسمى مساييــــــر
واقطعن ينون الخطايا والاقفــــار = وكم طيرن جول الحبارى مخاميــــر
وخلن فوق الشبك عج الرمك طــــار = و حلو هاك اليوم خز المعاشيــــر
واركن على ورد الدجاني لهب نــار = وغدو بها الويلان مثل المداويـــر
وشدن وحطن الثمامي بالايســــــار = وخلن على المطران مثل المعاصيــر
سارن بناالزرفات باقبال وادبــار = من غوطة الفيحا الى غسلة الديــر
في كل درب بالمناعير عبـــــــار = ياما تجوب خيولنا من مشاويـــــر
نروم من زين المنازل ونختـــــار = ونستارد الخوه بحدب البواتــــير
لياما نخونا اللي على نجد حضــار = وجانا كتاب من زبون المقاصيـــــر
ماجد بن عريعر حر الاوكــــــــار = يقول وليت داركم يالمناعيــــــر
الشيخ اللي حيف على البيض بالغار = يقول حل بداركم (حرب ومطيــــــر)
وجيناه مثل السيل طمام الاوعـــار = لياما غدت عنها البوادي شعاثيــر
أولاد عم ولابنا قول شبشــــــــار = وشيخ لنا عنده جلال وتقديـــــــر
أولاد عم وما حذانا لهم جــــــار = حنا عليهم نحمي الجار ونجيـــــر
حنا شبات الحرب وان شبت النـــار = وتوايقت بين الحنايا الغناديـــر
حنا بني وايل بعيدين الاذكـــــار = اليا تناخو بالجموع المشـــاهـير
حنا هل الجمع المسمى الياســــار = بمركاضنا يشبع به الذيب والطيــر
وين انت ياللي تايـه منك الابصـار = جيناك حوله من شثاثا وابا القـير
هـج (الدويش)و مالقينــاه بالدار = زبن على الحـره وذيـك الشناخـيـر
باغي عليهم صـايرن مثل ماصــــار = ذبح الشفـايا واغتنـام الخواويـر
كســيرة ماقط ذكـرت بالاذكـــــار = فيهـا القلايـع مثل روس الخنازيـر
صحنا عليهم صيحة باللقا الحـــار = حتى جبرنـاهم عن الدار تجبــــير
لولا شفــاتي فيـك يانجد ماأحتـار = فكـري ولا كثرت علي التفاكـــيــر
ولولا شفــاتي فيــك ماجيت مــرار = نادى نذيرات الهواجيــس ونديـــر
وندير حيــلات بالاريـــا وتبصــار = وارجي من الباري عساها مسافيـــر
نجد جـفتنا وكــل دار لنـــــــا دار = ماهي معـافه مـير جوع ومداهـيــر
قطعـاننــا ترعى زماليــق نـــــوار = لياما غدى فـوق الاباهر قناطـيــر
مـابين مسنــاد ومــا بين محـدار = يامـا قطعنــا بدربن من مشاويــر
ياما ركــبنا بالسرى قب الامهــار = وبعيرات الأنضــا كنهن السنانيــر
نعتاض عن دار عليها الدهر جـــار = ديد العسل فيها تعيش المفاقـيــر
مثل المسوح اللي ترزم على حــوار = دار مريه بالشتــا تسمن الضـيــر
دار لها بالقيــظ غدران وانــهــــــار = والتمّـن المجروش ملي الجواخـيــر
وصلاة ربي عد مابالســـما طــــار = طيرٍ وعداد ماوردن ظمايـا على بير
على الرسول المصطفى سيد الأبــرار = نور العباد اللي يشيع التباشيــر