وهذه قصيدة يتأسف فيها على بعض أفراد قبيلتة ممن عصوا امره وخالفوه مؤكدا انة يريد العزة لهم وينهيها بأبيات من الحكمة والزهد بالدنيا..وهي يسندها على الشيخ نمر بن عدوان أمير البلقاء :
يا الله بالمطلوب يا خير معبــــــــــود =يا عز عبد ٍ بالخفية شكا لـــــه
يا خير مدك على الناس ماجـــــــــود = ما خاب عبد ٍ كل يوم ٍ يسالـــه
تا سف لقلب به مجاديف ولهـــــــود = ومن الرفاقة خبث الحكي بالــه
عزي لربع طاوعوا شور محمـــــود = مدري بلاهم غيظ والا جهالـــه
والا بلاهم ردية الحظ وحســـــــــود = لا عاد محد ٍ خاسر ٍ من حلالــه
محاكي فيها على الرجل منقــــــــود = ومجالس ٍ ما فيهن الا الرزالـــه
والله يوم ٍ لحق بشهود وعـــــــدود =إني أدور عزهم بالعدالـــــــــــه
إلا ول لي من هوى النفس مقصـود= الا معزتهم على كل حالــــــــــه
يا مشير بالفرقا طلت وجهك السـود = طرق المراجل ما عليها كفالــــه
المرجلة حبله طويل وممــــــــــدود = يا كود من تقصر عن الما حباله
والى قصر حبله فلا هو بمزيــــــود = كم واحد ٍ يهفي مقامه فعالــــــه
اللي يريد الجود ماهو بمــــــــردود = شوف العيون ولا يريد الدلالــــه
يرخص بعمره يوم يروي شبا العود = أيضا ولا يبخل على من عنى له
يلعن صبي بنشوته ما ادرك الجــود = ولا هام هومات المراجل ببالــــه
هذاك لا ينعى ولا بمفقــــــــــــــــود = ودك مع الخفرات يلبس دلالــــه
يا العبد لا يطغيك في نفسك الــــزود = تراك مثل الفي عجل زوالــــــــه
دنياك لو تعطي مواثيق وعهــــــود = بواقة ما يامن العبد جالـــــــــــه
دنياك مادامت لسعدون وسعـــــــود =وعبدالعزيز اللي حضرنا فعالـــه*
ايضا ولا دامت لكســـــــــرى وداود = كم اذهبت حـــي تحطه قبالـــه
وصلوا عدد ما حنت المزن برعــود = أو هل مامور المطر من خيالـــه
وعداد ما لبوا بمكة هل القـــــــــود = علــى محمد هو نبي الرسالــــــه
* سعدون المعني هنا : سعدون بن عريعر شيخ بني خالد على وقته توفي سنة 1202هـ ..
* سعود : هو الامام سعود بن عبدالعزيز بن محمد بن سعود ثالث أئمة الدولة السعودية الاولى توفي سنة 1229هـ
* عبدالعزيز : هو الامام عبدالعزيز بن محمد بن سعود استشهد وهو يصلي سنة 1218هـ وقول مشعان حضران فعاله اي كان بالغا حاضر افعاله وبعض مغازيه..