الجزء التاسع والخمسين

وقف عبدالله عند باب الصاله.... مايتحرك..وايده مازالت على مقبض الباب... يدور بعيونه على ويوه الحريم اللي يطالعنه بعيونهن المفتوحه والمدهووشه..وهو صدره يرتفع وينزل...بسبب تنفسه السريع... كان شكله مبهدل وبلا سفره بعد... كان ناوي يخبرهم...بس من بعد نظرتهم المتخوفه ... ضعف... وماقدر...مايقدر يخبرهم...مش بهالطريقه...
وقفت العيوز وهي حاطه ايدها على صدرها منصدمه.... بينما عنود يالسه مكانها متيبسه....وعيونها معلقه بكندورة ريلها الخايسه...وارتفعت انفاسها شوي شوي....الباقي كانت ردة فعلهم متوتره...متخوفه..وكانت رداة فعل مختلفه...
ام خالد: عبدالله..!!!!!!....شفيك ياولدي عسى ماشر..؟
مشت صوبه وهي تمد ايدها تبا تمسك ولدها عشان تتاكد بنفسها انه بخير... بينما اشر عبدالله بايده عشان توقف مكانها وهو يهز راسه...
عبدالله: مافيني شي...بخير...انا بخير...ماشي صاير لا تخافون...
نورة: عبدالله ...شو هالدم على كندورتك...؟؟؟
عبدالله: آآآآآآ....مااااااااااشي...بس.. ..بس ...ووواحد من الربع انيرحت ايده..وانا عالجته...بس...ماصار شي.. ييت ابدل ثيابي...هو خيسني دم... مب دمي هذا...
كان يتكلم بطريقه غير مترابطه وبشكل مشوش....وشكله ماكان طبيعي...لكن الام ولانها تبا تصدق هالشي ..صدقت..وحمدت ربها بان عيالها بخير...عنود ما ارضاها هالجواب..ويوم صد عبدالله وركب فوق وهو يركض..تبعته عشان تستفسر شو صاير....عبدالله بخير وهذا شي واضح .. لانه يتحرك بسهوله..مافيه شي يعوره..لكن حد ثاني فيه شي اكيد.... وطلعت وراه للطابق الفوقي..
نورة: مافيه شي امايه لاتخافين.... ياي يبدل ثيابه بس..
يلست العيوز عالكرسي وهي تتنهد..
ام خالد: خوفني حسبي الله عبليسه... شقا يدخل علينا جي روعنا...!!!
نورة بعد كان قلبها منقبض.... اطالعت باب الصاله المفتوح...وهي تفكر...
حمده: ماعليه عموه تلقينه مستعيل..
قالت الام بحسره..
ام خالد: حتى ماسلم عليه ولا حبني...مب عوايده..ماشفته من اربع ايام...
ميرة: تلقيينه مدوووده ومستعيل ما انتبه عمووه..لا تشرهين عليه....
ام خالد: الله يهداهم الشباب دومهم خبايل ويركظون...
نشت نورة في هاللحظه وطلعت برااا الصاله...ومن الممر للحوش... دارت على سيارة عبدالله مثل المفتش....السياره خايسه غبار وطين وشكلها فعلا يايه رأسا من البررر.... فتحت الباب الوراني وتنهدت...ليش ياربي كل ما اتشائم بشي يصير..ليش...؟؟ السيت الوراني كله خايس دم بعد...حد من اللي كان معاهم او حد من اهلي انا ياه شي...وعبدالله مغطي علينا السالفه....سكرت الباب وهي جاهزة للصياح من الحين....الليله مابتعدي على خير...
عنود دخلت غرفتها وشافت عبدالله بوزار وفانيله فاتح الكبت ويفتش فيه بعصبيه عن كندوره مناسبه...بينما الكندوره الخايسه طايحه عالارض..واغراض عبدالله التيلفون والبوك والسويج عالشبريه...
عنود: عبدالله....شفيك...؟؟!! ..
كانت عنود ايدها ترتجف وخايفه من اي جواب ممكن يطلع منه...اطالعه من بعيد وبحذر..مب مجرأة تتقرب منه...
عبدالله: ماشي....
طلع كندوره ولبسها بعصبيه...
عنود: والله انه فيك شي....خبرني عبدالله..
عبدالله: مافيني شي تراني جدامج مااااااااااااافيني شي....
عنود: عبدالله لا تكلمني بهالطريقه...
تنهد عبدالله بضيج وهو يحط بوكه والسويج في مخباه..والتيلفون في المخبا الثاني... وقام يعقم معاقم الكندوره بايد مرتجفه...
عبدالله: طلعيلي سفرة حمرا عنود...
انصاعت عنود للامر ويابت له سفره حمرا...وحطتها له عالشبريه...وقعدت تراقبه بحذر...وتراقب ايده المرتجفه وهي تتعثر بالمهمه المتوجبه عليها بتعقيم المعاقم... شي بسيط مب قادر يسويه...ليش هالتوتر..؟؟؟
خوز ايده وتنهد بظيج اقوى...وقتها تقربت عنود منه وعقمت له المعاقم اللي ماقدر عليهن...وتعمدت تتاخر عشان تستجوبه شوي..
عنود: مابتخبرني شو صاير..؟؟
تلفت عبدالله كانه فجاه مهتم بديكور الغرفه...وعيونه تلمع بشكل غريب كانه خايف...وتنفسه مب طبيعي بعد... قال بصوت مخنوق..
عبدالله: ...ماشي صاير ....
قالت بعناد...وهي تمسك كندورته وتشدها...
عنود: اذا ماقلت لي بتصل باخويه سلطان وبساله ترا....!!
اطالعها عبدالله بنظرة غريبه...وفجاه امتلت عيونه دموع....
عبدالله: مابيرد عليج عنود...
انصدمت عنود...فجت كندوره عبدالله وتراجعت على ورا ...
عنود: لا....لااااااااااااا......
ياها عبدالله ومسكها من جتوفها يهزها...
عبدالله: لا تخافين... ما مات... عنود خلج قوية عشاني...دخييلج لا تنهارين احين ما اتحمل اكثر...
تنفست عنود بقوه عشان تتمالك نفسها...
عنود: شو صاااااااار..؟؟؟
عبدالله: حادث....انجلبت السياره ماعرف كيف طارت جي وانجلبت جدامنا.. سلطان ان شاء الله بيكون بخير قالولنا في المستشفى انه بيكون بخير...انا ناصر اللي مخوفني...
بطلت عنود عيونها...
عنود: ناصر بعد..!!!!!!!!!...
هز عبدالله راسه...
عبدالله: ناصر اللي كان يسوق..وسلطان معاه... الدم اللي على كندورتي دم سلطان مب ناصر...ناصر..من برا..مافيه ولا شي..بس انا خايف من اللي داخل...ماعرف ماااعرف...
مسك راسه بايده بشكل يائس...اما عنود انهارت عالشبريه ..ماقدرت تتحمل ثقل الاحداث...وايد عليهم اثنين منهم يستويبهم شي...واحد ممكن يتحملون بس اثنين..؟؟؟؟ ..
يلس عبدالله عدالها ..وهو بروحه ماسك نفسه بالغصب... مايقدر يضعف الحين...اخوانه والعايله كلها محتاجتنه..
عبدالله: ماباج تخبرين اي حد ياعنود باللي صار....تسمعين..؟؟ ماظني امي تتحمل خبر مثل هذا ولا امج بعد...ولا حمده ولا ميره ولانورة....ولا حصه بعد...محد بيتحمل...لا ترمسين الا يوم اييب ابويه وخالد...تسمعين.؟؟
هزت عنود راسها وهي تمش دموعها..
عنود: انته دكتور...ظنك بيسلمون منها..؟؟؟
هز عبدالله راسه بحيره...
عبدالله: ماعرف..ماااااااعرف... الله يستر....
نش شل سفرته بعصبيه وطلع من الغرفه ونزل تحت بسرعه ومر بالصاله من دون مايلتفت لها ولا فيه يدخل ويرمسهم..بيفتحوله تحقيق...لانه حاس انهم مابلعوها الجذبه....طلع من البيت ومشى بسرعه للسياره ...ووقف... نورة كانت متسانده عالسياره وشكلها تترياه...اطالعها بحيره..مب ناقصنها هذي بعد...نورة اول ماشافته عقدت يديها فوق صدرها..
نورة: منو منهم متعور جذي..؟؟؟
عقد عبدالله حياته...شو دراها هذي..؟؟؟.. ومارد عليها..
نورة: السيت الوراني كله خايس دم بعد....ماظني جرح في الايد يسوي هذا كله..
تنهد عبدالله...هالبنت مب هينه...فتح باب السايق وهو يقولها بعصبيه...
عبدالله: اووووووووف....انتي المفروض حد يشغلج بالتحريات...
سكر الباب وشغل السياره ونزل جامته....
عبدالله: بطلب منج شي واحد...لا تخوفين امايه.... وكلمي عنود وقوليلها عبدالله يقولج خبريني باللي صار..بس لا تطرين شي لامي ..ولا ترمسين بشي لين ما نوصل نحن فاهمه..؟؟؟
ماتريته نورة لين مايطلع بسيارته..ركظت للبيت وعلى طول ركبت فوق عند عنود..عشان تخبرها هذي باللي صاير....
عبدالله اول ماطلع بسيارته اتصل بخليفه...
خليفه: مرحبااااا...
عبدالله: هلا خلوف...اقولك....وين انته..؟؟
خليفه: وعليكم السلام والرحمه..انا بخير ونعمه شحالك انته...؟؟
عبدالله: اووفففففففففف..مافيني عليك الحين وعلى مصخرتك...وين انته..؟؟
خليفه: بسم الله بلاك...انا في الميلس يالس...
عبدالله: وحمدان..؟؟
خليفه: وياي...
عبدالله: وحميد..وعمي..؟؟
خليفه: حميد احيده في الصناعية...وابويه داخل البيت...
عبدالله: تعال انت وحمدان وعمي بسرعه وبتلاقى وياكم فمستشفى توام...ولا تسرع.. باي..
سكر عبدالله فويهه بينما هو نفسه كان مطير لمستشفى توام... وخليفه بعد التيلفون عن اذنه واطالع فيه باستغراب...
خليفه: اظني مقلب...
حمدان: منو متصل..؟؟
خليفه: عبدالله..يقول تعال انته وحمدان وابوك لمستشفى توام بسرعه....
نقز حمدان من مكانه وهو ماسك ايده المكسوره...وملامح الخوف على ويهه...
حمدان: شو مستوي بعد..؟؟؟؟
رفع خليفه كتوفه بحركه حيره..
خليفه: ماعرف...
حمدان: خيبه احيدهم في القنص لايكون حد منهم صارله شي....قم قم...قـــــــــــــم طلع سيارتك وانا بسير بزقر ابويه...
ركظ حمدان برا الميلس ساير صوب البيت...بينما خليفه طلع وراه للكراج يطلع سيارته الكوبي...كان بيتصل بعبدالله عشان يستفسر مره ثانيه لكن كان خايف من اللي بيسمعه... وقرر يتريا لين مايوصل هناك ويشوف بنفسه شو صاير..الله يستر...

يوم وصلوا المستشفى..اتلاقوا مع عبدالله عند بوابه المستشفى... مش الطواري...الثانيه...وسلموا على بعض..
بو سلطان: ياولدي شوووو مستوي وقفتوا قلبي...
حط عبدالله ايده على جتف عمه وهو يمشي معاه داخل المستشفى..
عبدالله: اذكر الله ياعمي...ان شاء الله ماشي الا كل خير..يوم بنوصل فوق بنخبرك..
عبدالله ماكانت عنده القوه يخبر هالناس والجماعه كلهم بهالخبر...بيخلي الموضوع لخالد ولابوووه..اللي يوا المستشفى اول الناس بعد ما اتصل عبدالله فيهم...
ركبوا فوق لقسم العنايه المركزة...وخلاهم عبدالله هناك بينما هو راح لقسم الدكاتره ولبس اللاب كوت ماله وحط بطاقته...ويوم حط القلم...تذكر عليا..وقوم خاله..مايدرون...لازم يبلغونهم في وقت ياي... سال عبدالله الدكتور المعاين لحالة ناصر وسلطان.... لانه سوالهم اشعه اول ماوصلوا...وهذا عمل روتيني وطبيعي بالنسبه له لكن بالنسبه لعبدالله ..كان شي مصيري...
سلطان كانت اصابته في الراس....ارتجاج في المخ... وشرخ بسيط جدا في الجمجمة...يحتاج عملية سريعه...لانه الخوف من نزيف داخلي كبير...
بالنسبه لناصر..اصابته خطيره بالعمود الفقري... حركه السياره المفاجئه وتمسكه بالسكان سببت له اصابه عنيفه.. في اخر فقرات العمود الفقري... والعصب اللي في العمود معطوب...واحتمال الشلل كبير... لكن في امل بالنجاة اذا سفرووه وتم علاجه في الخارج علاج طبيعي..لانه الموضوع موضوع اعصاب لا غير..طبعا من بعد مايعالجون اخر الفقرات ويثبتونها بمسامير...
عبدالله من سمع كلمه شلل دار راسه وضعفت ريوله..يلس عالكرسي وهو يغطي ويهه بايده....وهو يردد في نفسه..شلل..؟؟؟ مستحيل....اخوي ناصر...يتشلل..؟؟؟ ...لا...لا ياربي لا....ناصر يفضل الموت على مصير مثل هذا... اللهم لااعتراض...اللهم لا اعتراض ياربي لكن دخيلك تروف بحاله وحالنا..وتنجيه يالله يارب...
بعد ماهدت شوي اعصاب عبدالله طلع من المكتب وراح لقسم العنايه ...وين الكل هناك كان منهار ويصيح... العايله والربع... ناصر وسلطان شباب محبوبين عند الكل...وطبيعي الكل يزعل عليهم... مشى عبدالله صوبهم وهو ماله خاطر يخبرهم بالمعلومات اللي سمعها توه.... التموا حواليه وهو ياشر بايده ويهديهم..بانه بيدخل بيشوف ناصر وسلطان وبيرجع لهم بعد شوي يخبرهم بكل شي يبغونه.. وبما انه دكتور كان مسموح له يدخل قسم العناية بحرية..اما هم فممنوع عليهم...
تفجج منهم عبدالله ومادخل حد معاه لانه ممنوع...سار لغرفة سلطان اول لانها اقرب له...وشاف راسه المربوط...كان نايم طبعا...مسك ملفه وقعد يقرا... وكلم الدكتور عنه...وقال انه موعد عمليته بعد ساعتين... الله يشفيك ياسلطان...خلاه وراح لناصر.... اخوه ناصر...البشوش..الطيب والعطوف...اللي مايحب يرفض طلب لحد....طايح على هالشبريه غايب عن الوعي...مافي اي رضه او اي شمخ يدل على انه مب صاحي..كانه نايم فعلا....وتذكر وبعنف..اول شي ذكره ناصر يوم سحبوه من السياره سحاب... كان سلطان ولد عمه...وده يتطمن عليه...(سلطان بخير..شوفوا سلطان....سلطان بخير..؟؟؟).... مع انه ماكان فوعيه تماما بس كانت رغبته بالاطمئنان على ولد عمه ورفيق دربه من الصغر قويه وايد..بحيث نطق بهالكلمات... الحادث كان غريب فعلا... ناصر كان في المقدمه بينما عبدالله معاه رياييل اثنينه في سيارته وكان يمشي وراهم...والسياره الثالثه اخر شي.. كانوا يسوقون بسلاسه وطبيعية...صح مسرعين شوي ...بس في هذيج المنطقه السرعه كانت شي طبيعي وعادي...فجاه جي انزلقت السياره وطارت في الهوا وانجلبت كذا جلبه ... وعبدالله يراقبها بذهول..ورعب....اخوه وولد عمه في هذيج السياره وشي طبيعي انه يحس بالموت في هذيج اللحظه...
اللي يشوف السياره يبصم بالعشر انه اللي طالعين منها ماتوا...الله سلم بس....
مسح دموعه اللي سالت من عيونه بدون مايحس...شلل ياناصر...؟؟ شلل..؟؟؟ ... الله لا قاله ان شاء الله... طلع من القسم وهو يشوف ان عدد المتواجدين زاد.... شي طبيعي...معارفهم واحبابهم وايد...خبرهم عبدالله وبشكل مختصر عن كلام الدكتور.. ويوم نطق بكلمه شلل...الكل هدى ..وانصدم....بس رجع يطمنهم بانه احتمال الشفاء موجود مع العلاج الطبيعي في الخارج.. وان شاء الله انهم بيسفرونه باسرع فرصه...
بعدها عبدالله خذ اذن لابوه وعمه بس بالدخول عشان يشوفونهم... متى مايقدر بيطلع اذن للبقية عشان يشوفونهم بعد..بس مايقدر يخلي الدنيا سايبه لهم .. لانه القسم هو قسم عنايه وحساس ومايحتمل الازعاج والربشه...
نورة من عرفت الخبر من عند عنود وهي مب في حاله...لكن قوت نفسها... هي تدري ان امها بتنهار..حصه بعد يمكن تنهار...لذا فهم محتاجين قوتها الحين.. خلت عنود بروحها في الغرفه لانه عنود مب متجرأه تنزل وتواجههم عن تفظح نفسها ...لانها مب قادره تتماسك....اما نوره فنزلت ولازمت امها ..وتظاهرت بالبرود وكانه ماشي صاير..ومافارقتها لانها تخاف اييها الخبر وهي مب موجوده...حصه نايمه...يابخت اللي نايم..ولاهي عن كل شي.. احسن لها والله خلها راقده لين ما ينتهي هالظرف... فطوم بعد من يت من الجامعه رقدت ومانشت للحين..وهي اصلا من يت من الشارجه قامت تلازم غرفتها بشكل كبير..بسبب خوفها من ان حمداان يطب عليهم كعادته..مع انه قاطع عهد على نفسه انه مايروح البيت دامه يدري ان فطيم هناك..عشان مايسببلها مشاكل اكثر من جذي..
بالنسبه لحمده وميره..كل وحده سارت تعشي عيالها وترقدهم استعدادا للمدارس باجر...وهن مب حاسات بشي.. شكلهن بلعن جذبه عبدالله مثل مابلعتها العيوز..لانهن بكل بساطه ..يبن يصدقن هالشي...يبن يصدقن ان الكل بخير ومافيهم شي عشان جي بالهن مرتاح...

الساعه تسع ونص وصل بو خالد مع خالد.. وبو سلطان راح بيته بعد مع خليفه عشان يخبر اهله هو بعد...
مصيبتهم كانت كبيره..ولازم يتكاتفون الحين ويصمدون لين ماتعدي على خير...
بو خالد كان احساسه فظيع...واحد من عياله يطيح هالطيحه العوفه..صحيح هو جامد وقوي ولين الحين متظاهر بالصبر...لكنه مهما كان ..شيبه وكبير في السن..ومايهون عليه واحد من عياله اييه شي ويطيح جدام عيونه بهالطريقه...
دخل هو وخالد الصاله... وطلب خالد من نوره تروح تزقر ميره بس... اما حمده بيخبرونها بالخبر بعدين...لانهم يدرون انها بتنهار هي الثانيه ومب زين يصير هالشي جدام خالد..الافضل تكون بروحها..
كانت العيوز اطالع في ويه ريلها مستغربه وقلبها منقبض...واطالع في ويه خالد المكتئب...وتدري ان الموضوع جايد وفيه شي..
ام خالد: شو صاير ياحمد....شو صاير خبروووني...؟؟؟
بو خالد: استهدي بالله ياموزه...صبري شوي..
ام خالد: لا اله الا الله...خبروووني شو فيكم...؟؟ شو صاير..؟؟
دخلت ميره واللهفة على ويهها.. ودخلت معاها نورة اللي بدا الحزن على ويهها...وقعدت عدال امها...تساندها.. اما ميره فيلست في كرسي مجابل عدال خالد...
وتكلم خالد بهدوء...لانه ابوه خانقتنه العبره من الصبح...
خالد: انا بقولكن..بس اباكن تقون نفووسكن....وتستهدن بالله...وتكثرن الدعاء..لانه اي شي ثاني مايصلح ولا يفيدنا في هاللحظه.... ناصر..وسلطان... همممم.. سووا حادث في البر.. (غمض عينه يوم سمع الشهقات ارتفعت..من ميره وامه..نوره كانت هادية)..وكلهم في العناية الحين...سلطان..بيسووله عمليه بعد (واطالع ساعته).. بعد نص ساعه..وان شاء الله بعدها بيكون بخير...اما ناصر...بنسفره باسرع وقت ان شاء الله .. اصابته خطيره في العمود الفقري... ولازم يتسفر...
صرخت الام صرخه مخنووقه بينما مسكتها نورة ولوت عليها بقووو...وهي تصيح بهدوء..والام كانت منهاره وتصيح بصوت عالي ..والشايب يالس ويطالع الزوليه بكآبة .. بينما ميره مدت ايدها تمسك ايد خالد بقوو..ودموعها على ويهها...وحاولت تتماسك... اطالعها خالد بنظره حزينه..
ميرة: قوم امي يدرون..؟؟
خالد: اخوانج بس يدرون وعمي...بس احيده عمي رد مع خليفه البيت عشان يخبرون امج وحرمه سلطان بهالخبر..
ميرة: اصابه سلطان وين؟؟..ماقلت لي...
خالد: اصابة سلطان في الراس...قالوا ارتجاج في المخ وشرخ بسيط في الجمجمه...وبيسووله عمليه وبعدها بيكون بخير ان شاء الله...
نزلت ميره راسها وهي تصيح بشكل اكبر...مد خالد ايده وخذها بحظنه... مايباها تعب نفسها خصوصا عشان حملها ..لانها في الشهر السادس الحين...
خالد: لا تخافين يام حمد...ان شاء الله اخوج ماعليه الا العافيه لاتخافين....
الشيبه كان ساكت طول الوقت...يطالع حرمته بعين حزينه... ماله قوه يهديها...بروحه هو مب في حاله...وقتها فكر... وين حصه..؟؟؟ ...
قامت العيوز من حظن بنتها..
ام خالد: ودوني اشوف ولدي...
بو خالد:....................
خالد: مب الحين يا امايه.... باجر الصبح بتسيرين انتي وحمده تشوفونه...الحين روحي ارتاحي وادعيله بيفيده اكثر...
ام خالد: هو ما بيموت صح خالد...؟؟ لا تقص عليه دخيلك قولي ان ناصر مابيموت...
بو خالد: ياحرمه ليش تفاولين عالولد... مافيه الا الخير ان شاء الله....
مسكت نورة امها...
نورة: نسير امايه....نسير حجرتج...عشان اطيحين شوي ترتاحين...
ام خالد: وين ارتااح وولدي في المستشفى ..وييييييين...!!
خالد: امايه سيري طيحي واستهدي بالله...باجر الصبح بوديج تشوفينه لا تخافين...
سارت الام مع نورة وحطتها في شبريتها ولحفتها.. وحطت لها كوب ماي عدال راسها...وسكرت الليت وطلعت... رجعت الصاله ..وين كانوا على حالهم..
نورة: منو بيخبر حمده بالموضوع..؟؟
خالد: وين حصه..؟؟
نورة: راقده من العصر...ماظني تنش احين...
خالد: سيريلها انتي وميره...لا تفاجؤونها بالخبر عن تتخبل علينا...
وصد لميره اللي كانت تصيح عداله..
خالد: ياميره استهدي بالله انتي بعد....شحقه تصيحون ..؟؟؟... ترومين تروحين تخبرينها والا..؟؟
هزرت راسها بصمت.. ومشت دموعها وقامت وطلعت مع نورة لبيت ناصر... بينما خالد يقنع ابوه يروح يطيح شوي في الغرفه ويرتاح... لانه خالد بيرجع المستشفى...

فبيت ناصر.. ويه ميره اللي مليان دموع وعيونها المحمره قالن الكلام قبل اللسان.. بالتالي حمده انصدمت وحست بشي جايد...اندفعت ميره ولوت على حمده بقوو...
حمده: شو مستوي ميره....؟؟ بلاج..؟؟
فكرت نورة..بانه مافي طريقه مبسطه تقدر تنقل فيه خبر مثل هذا لحمده...مهما كان..زوجها ..وحبيبها..وابو عيالها.... مابتتحمل... بينما ميره زادت الطين بله..
ميرة: قولي لا اله الله الله....
قالت حمده برعب..
حمده: قووولي شو مستوي....شوفيكم..ناصر فيه شي..؟؟؟؟
ميرة: قولي لا اله الا الله اول...
حمده: لا اله الا الله...يالله خبريني...
ميرة: سلطان وناصر...سووا حادث بسيط في البر....(شهقت حمده).. لا تخافين..كل شي ان شاء الله بيمر على خير.. كلهم في المستشفى احين...
عقت حمده بثقل جسمها كله عالكرسي.... وهي اطالع في ويوههن مب مصدقه..
حمده:..ناصر..!!...لا....لااااا ااااا...مستحيل...انت ي جذابه..
قعدت نورة عدالها تهديها...وتخبرها بالتفاصيل..وميره معاها...لكن مثل ماقلنا من قبل...مافي اي طريقه سهله لنقل خبر مثل هذا...والنتيجه ان حمده انهارت..خصوصا يوم درت ان الظربه في العمود الفقري...حمده مثقفه وتعرف ان الظربه في العمود الفقري مب هينه ابدا... وممكن يتشلل بسببها... مع انه محد درى لانه خالد مارمس عن الشلل ابدا..ومحد حد في باله ان ناصر ممكن يتشلل...لكن هي عرفت بنفسها..بانه هالشي ممكن يصير....وهالشي اللي خلااها تنهار اكثر..
قعدت ميره معاها تهديها بينما نورة رجعت البيت ودخلت على امها وشافتها مثل ماهي ...منسدحه وتصيح...طلعت وركبت فوق..ودخلت على عنود اللي قاعده متربعه على كرسي صالتها الصغيره حاظنه التيلفون وسرحانه ...
نورة: انتشر الخبر... باقي حصه..وفطيم...
عنود: توني متصله بعبدالله....سلطان توه داخل غرفة العمليات... وناصر على حاله...شو حالها عموه..؟؟
يلست نورة عدالها..
نورة: شو تتوقعين..؟؟... منسدحه على شبريتها وتصيح.. الله يعينا على هالفتره...
عنود: حمده حد خبرها...
نورة: توني يايه من عندها... وخليت ميره وياها..وحالتها هي الثانيه ماتسر...
عنود: امي بعد حالتها ما تسر...وحرمه سلطان اغمى عليها...قبل شوي مسكره عن خليفه...
هزت نورة راسها باسف...الوضع كله مؤسف... ويزعل...

عبدالله اتصل بسعيد ...مب زين مايخبرونهم ..بيزعلون وايد...وهم من الاهل ولازم يدرون...وخبره بكل شي...سعيد انصدم من الخاطر... واصر انه يعرف التفاصيل كلها..وحالة كل واحد منهم بالتفصيل....وبعد ماخلص ..سكر عن عبدالله وبلغ فيصل وابوه...وفيصل تولى مهمة انه يبلغ عليا بشكل مناسب...عليا مثل نورة..تتماسك في الظروف السيئه...وكانت عمليه جدا ..صح صاحت وزعلت وايد بس جهزت اغراض لها ولفيصل وعيالها ليومين... لازم تروح هناك تساندهم...بينا هلال ركب مع سعيد وطاروا للعين...فيصل شل عليا وراحوا وراهم هم بعد... وام فيصل تمت في البيت مع بناتها منى ومنال..ماتقدر تخليهم بروحهم وماتقدر تشلهم بعد.. ولو انه كان خاطرها تسير وتواسي ام خالد...بس ماباليد حيله..
الساعه 11 وصلوا هل الشارجه العين...سعيد وابوه ساروا المستشفى على طول وكان بينهم وبين عبدالله اتصال دايم.. بينما فيصل ودا عليا البيت وراح المستشفى بدوره...
عنود استاذن من عبدالله بانها تروح مع الدريول لبيت اهلها عشان اتم مع امها في هالوقت.. لكنه ماطاع انها تروح مع الدريول..وقال انه هو بنفسه بيي يشلها وبيوديها هناك....وهذا اللي صار...الساعه 11 ونص كانت عنود مع امها...وباتت هناك وياها... بينما نورة دخلت على فطيم اللي كانت تدرس..وخبرتها بالسالفه كلها...

مافي داعي اقولكم ان ذيج الليله محد منهم نام...والساعات كانت تمر ثقييله بشكل فظيع..

الساعه خمس الفجر....قامت حصه من النوم...وصلت صلاة الفجر... كانت شبعانه رقاد...بس يوعانه..وفكرت تنزل تسوي لها سندويش والا شي..لبست شيلتها البيظا ونزلت...واستغربت....شو صاير بالبيت.؟؟ الكل واعي... دخلت الصاله ووقفت منصدمه....وتاكدت من ساعتها..الساعه خمس الفجر...شو يسوون هذيلا كلهم في هالساعه هني..؟؟ نورة وفطيم وعليا وابوي وخالد وخالي هلال وسعيد وفيصل....
عدلت حصه شيلتها وسلمت بصوت ماينسمع...والكل يطالعها مدهوش..والتعب على ويوههم والحزن...مافيهم يخبرون حصه بعد....
تجدمت حصه وهي تبتسم باستغراب لعليا..وسلمت عليها..
حصه: انتي شو تسوويين هني..؟ متى ييتي..؟؟
سكتت عليا عنها وهي تبتسم لها بتعب..
مشت حصه لخالها..وسلمت عليه...
حصه: انته بعد خالي هني...شو هالمفاجأة.. ماخبرتونا...
بو فيصل: شحالج يابنتي.؟؟ هالكثر رقاد..؟
حصه: ههههههههه كنت سهرانه وبخيتها برقده...
تراجعت حصه ..كانت مستحيه لانه كلهم متواجدين...ويلست عدال عليا..
حصه: شوفيكم عليا...؟؟ ليش واعين الحين.؟؟
عليا: مافينا شي...
نورة: حرام عليج عليا...خبريها لا تخلينها جي...
تلفتت حصه حواليها...كلهم على ويووههم نفس التعبير....التعب والحزن...
حصه: شوووفيكم..؟؟؟؟ امي وين..؟؟؟ ..
عليا: امي بخير لا تخافين....
حصه: عيل؟؟...منوووو..؟؟؟؟ شووووفيكم..؟؟؟
حصه كانت تدري ان عبدالله وناصر في القنص عشان جي ماشكت فيهم..على بالها بعدهم في القنص...
عليا: اخوج ناصر في المستشفى حصه....
سكتت حصه...حست كانها تلقت صفعه قويه...ناصر في المستشفى.؟؟؟
حصه: ليش..؟؟
عليا: هو وولد عمج سلطان سووا حادث في البر... سلطان الحين بخير الحمد لله بس ناصر...حالته خطيره وهو في العناية الحين ولازم يتسفر...
وماكثرت عليا اكثر من جذي... وحصه اطالع فيها وهي ما تشوفها اصلا....تذكرت سيف..والعناية....العناية ...العناية.... ليش كل اللي احبهم يروحون العناية..؟؟؟؟....قعدت حصه مكانهاهادية...وماذرفت ولا دمعه...كانت صدمة كبيره ماقدرت تتحملها وهي توها قايمه من النوم.... امس نايمه والكل مستانس وكل شي طبيعي..قمت وحصلت الوضع منجلب فوق تحت.... مب معقوول..!!!..
سعيد كان كل شوي يرفع نظرة لنورة اللي مجابلتنه من اخر الصاله...معجب بصمودها وقوتها....يدري انها داخليا مب متحمله الوضع حالها حالهم...لكنها عشانهم صامده....كان وده يروح يضمها و يواسيها وويخبرها بان اخوها بيكون بخير ان شاء الله.... لكن طبعا مب قادر...
الرياييل كانوا يتكلمون ويشرحون كيف كان الحادث وكيف صارت الاصابه...ويتناقشون حول الموضوع وافضل بلاد يتسفر لها ناصر..باختصار..يتكلمون عن كل شي يدور حوالي هالموضوع...ويوم رمس الشايب اخيرا من بعد طول الصمت...ماسمعته نورة عن شو يتكلم بالضبط...كانت تراقبه وقلبها يعورها على حالة ابوها...فجاه الشايب صاح....بينما حظنه خالها هلال...ونورة تراقب...وماتحملت الوضع...ابوها يصيح..؟؟ اول مره تصير هذي...اول مره تشوفه بهالحاله...وماتحملت..وفجاه صاحت هي بعد ...لكنها قامت وطلعت برا الصاله وبرا البيت بعد ويلست في البلكونه تصيح... تتحمل اي شي...لكن شوفة ابوها يصيح ماتتحملها...
سعيد كان يراقبها..وعوره قلبه عليها وعلى الشايب بنفس الوقت....دموعه كانت متجمعه فعينه لكن كل شوي يمشهن قبل ماينزلن...
حصه قامت ودخلت غرفه امهاا اللي كانت يالسه عالشبريه وراسها بين ايديها...
حصه: امايه...
رفعت الام راسها ومدت ايدها وهي تصيح...وحظنت حصه وصاحت وصاحت ..وهي على بالها ان حصه يت تطلب المواساه..لكن اللي صار العكس..حصه قعدت تواسي امها...بينما هي بعدها مب مستوعبه اللي صار...

الساعه سبع..تلبست الام مع حمده...وركبوا مع خالد ووداهم المستشفى..بينما بو خالد طاح شوي في الحجره عشان يرتاح لانه من امس مب راقد... وبو فيصل راح معاهم مع فيصل... نورة كانت بعدها في البلكونه...ومعاها فطيم....بينما حصه تمت مع عليا وميره...سعيد من الساعه ست دخل غرفة الضيوف يطيح شوي...لكنه رجع نش من بعد ماهنت له الرقده.. طلع من البيت وشاف نورة منزله راسها للطاوله اللي في البلكون..وحاظنتنه بين ايديها..وفاطمه يالسه عندها...كسرت خاطره ويا صوبهم ويلس عدالهن عالطاوله...
رفعت نورة راسها مستغربه عشان تشوف منو اللي يا وانضم لهن...يوم شافت سعيد ابتسمت..
نورة: هلا سعيد...
ونزلت نظرها لحظنها... وهي تتراجع عشان تتساند عالكرسي...
بينما سعيد مد ايده ومسك ايدها وضغط عليها...متعاطف...
سعيد: ناصر بيكون بخير...لا تحاتين نورة....
نورة: الله يسمع منك...
ماعرف سعيد شو يقولها اكثر...غير انه متعاطف معاها...
سعيد: انا بسير المستشفى احين....تامريني على شي.؟
نورة: اذا دخلت على ناصر وشافك..سلم عليه..
ابتسم سعيد
سعيد: ان شاء الله بتسيرين عقب وبتسلمين عليه بنفسج...بس خلج قوية...
نورة: ان شاء الله سعيد...
ضغط على ايدها اكثر وعقب ابتعد عنها ووقف..
سعيد: فمان الله...
نورة+ فطيم: الله وياك...

خالد من بعد ماوصل الحريم للمستشفى وخلاهم عند خاله وعبدالله هناك .. خذ جواز ناصر واوراقه الضروريه وراح بوظبي.. لواحد من الشيوخ..وبما ان خالد منصبه عالي في الجيش...قدر ينظم سفره لناصر لالمانيا...وعلى حساب الجيش. مع مرافق...وخالد بيكون هذا المرافق..