الرجل لا من وصل ستين عام = ابتدا يطلب مثل موتر قديم
لا يغرك با"لبدي" لو هو تمام = البلاوي داخله شيٍّ عظيم
لو كشح بالنور في وسط الظلام= كهربه متلامسٍ ماهو سليم
ولو مشى بك خطوتينٍ للأمام = لاتوهق .. ما يوصّل للنسيم
المكينه كل مافيها عدام= وحنّة الدفرنس تسمع بالنظيم
لو تصلح ما تصلح بانتظام= دربه التشليح مع باق الرميم
فالدخاتر لو بهم بعض افتهام= البعض عينه على قرش السقيم
بين متسعود ووافد ما ينام= يلتغف ينهب مدامه في نعيم
وبين الاصلي من رقى فوق السنام= دون علم ولو زعم إنّه عليم
من قشور الغرب جمّع بالختام= والشهاده بالهدايا والبريم
شيوله شغال بياع الكلام = والجشع طبعه ولا له من غريم
وان خطا مسموح مايلقى ملام= فالوزاره كلهم ربع ونديم
عنصرية طب في قل اهتمام= والقدر شماعة اهمال الغشيم
فالضماير غارقه وسط الحرام= ما تفكر في حساب ولا جحيم
الرجل لامن دخل سن الصرام= لايحرك ساكنٍ يبدا الصريم
يجتنب ما لذ من شرب وطعام= فالمضره وارده باكل الدسيم
والمطامر يتركه وسط الزحام= يحتفظ بالجهد حتى في الحريم
ينشغل بالفكر يكتب للأنام= عن فوايد من تجارب في الصميم
والمواعظ في عدال الإلتزام= فالتزمت بالضرر نار الهشيم
يقتنع بالرزق يحيا في سلام= مع جميع الناس مايكسب خصيم