الليالي فرقتنا كيف تجمعنا الليالي=وكل حلمٍ ما تحقق والأمل اصبح زهيد
آه يا جرحٍ تجدد آه انا واسم حالي= دنيتي عيّت تصافي والزمن طبعه عنيد
كلما ظنيت هانت جاني شيٍ ما طرى لي= بين فرقى وبين حظٍ واقفٍ لي كالضديد
وبين همٍ في ضلوعي زاد بالقلب اشتعالي= لو تجاهلته للحظه جاني مع همٍ جديد
اتصبر عل تفرج والصبر عيا احتمالي= بين غار وبين نارٍ تشتعل مثل الوقيد
الزمن ماهو لمثلي لو اساير باعتدالي= واضحٍ يبغى الخلايق تتبعه مثل العبيد
شان يحيوا مثل خرفانٍ تناطح في ختالي= للتبن ترعى وتسكت ماتفكر بالبعيد
ان ثغت بالشكر طارت مثل صقرٍ للعلالي= وان بدى منها احتجاجٍ طالها كل الجحيد
لو رضيت اللي انكتب لي خفت من وضع العيالي=في زمن من دون ظهرٍ تصبح بدارك شريد
والله اني صرت مدري وين ياخذنا المآلي= مير انا سلمت امري لرب يفعل مايريد