[الطائر المهاجر]

لا تشتري بيت ما تدري اساساته = ولا تدري الأرض صلبه او بها ريبه
يمكن تجاري ولا تعرف حكاياته= حتى يجي وقت تظهر لك عذاريبه
مهما تصلح فلا تامن بناياته = ولا احدٍ يبي يشتري دامه وضح عيبه
ولا تقرب اللي غدا كنّه بنياته = عنزه تقوده فلا من قدر او هيبه
يبيه ينقال طيّب منكر لذاته = متفتّح الفكر مرنٍ في اساليبه
ما يدري الوضع غيّر من مساراته= فكلٍ بهالوقت يبحث عن مكاسيبه
دامه تساهل فعندي العلم واثباته= بيتِ تقوده مره ماافلح مناديبه
فبعض العذارى مثل طفلٍ بنزواته= ان ما تحكمه يضر النفس وصحيبه
وتنتج بغاثٍ تعاني دوم علاته = فالطفل للأم لو راسه كثر شيبه
ولو قلت اعدّل اذا من شفت هفواته= ماعاد يمدي ولو حاولت ترهيبه
سبحت في بحر ماتدري بموجاته = جرك لقاعه غريقٍ دون تدري به
لابد تمشي بشرع الله وآياته= ولاتخاف البشر لو زاد تحزيبه
فالحق يكسب فلا تيّس بحرواته= والصبر محمود تجني من عواقيبه
ورجلٍ تنازل عن المبدا بنهاياته= مهوب رجلٍ ولو شفته كبر جيبه