[عبدالله المفضلي]

مادخلت بصفّهم مسّاح جوخ = وماعبدت الاّ مجير المستجير
طيّبين الناس بعيوني شيوخ = والرّدي لو ينقل عظامه حقير
يستبد الرعب بقلوب الدلوخ = يحسبون المرجله شيءً خطير
المذلّه راسخه فيهم رسوخ = يأكلون العيش بحياض الشعير
يطمع الثعبان بضعاف الفروخ = ياخسارة ريش طيراً ما يطير
يشغل التفكير والعاقل يدوخ = النقايض عند معدوم الضمير
يرضخ الرجّال للواقع رضوخ = ويتحمّل حر لفحات الهجير
بالكرامه مسكن الانسان كوخ = عن هوان النفس بالقصر الشهير
ياحياة الهون ساعه بالشموخ = والبنادم لو حيي عمره قصير
مثل ماهو بالشجر حنظل وخوخ = كل شرّاً ينتهي بقدوم خير