السلام عليكم
مساكم وصباحكم كله خير
يقولون كلن يغني على ليلاه وبطريقته الخاصه...!
وانا غنيت على ليلاي وبطريقتي الخاصه..وأقول
.
.
.
.
جددي حزني إذا طال الغياب=واستبيحي الجرح مع طول المغيب
عذبي قلبي وزيديني عذاب=واتركيني في صحاري الهجر اغيب
كني الظامي أطارد لي سراب=كلّ ما قرّبت له أسرع يغيب
فرحتي غابت وطافت كالسحاب=والحزن حاضر وقلبي يستجيب
ماهتنيت الزاد وانواع الشراب=ساهرن ليل العنا كني صويب
اسألي قلبي وتلقين الجواب=واسألي شوق المتيم لك يجيب
عن معاناتي ابرسل لك كتاب=واقري المكتوب في شرح الحبيب
ليه ياعمري تخليني مصاب؟=ماهقيت اني معك مثل الغريب !
عندي لهجرك مشاريه وعتاب=ياقسى قلبك هجيرك لي عجيب
فكري الحاير تغشاه الضباب=ارحميني ليت روحك تستجيب
كم على شانك تعليت الصعاب=واعتبرت الصعب في وصلك قريب
عقلي اللي عقبكم فاقد صواب=وانتي اللي له دوا وانتي الطبيب
ارفقي في حالتي صارت عذاب=لا تخلين الجفا ياخذ نصيب
ادفني ذاك الزعل واطوي الغياب=واشرقي شمس ٍ في عيني ماتغيب
عبدالعزيز بن سعد العمار
1432هـ