مفروض يعطي ثوبه الحرمـة ويلبـس ثوبهـا

الطامي · 04-06-2009, 08:59 AM

العمر يفنـى والحيـاة أحـلام والدنيـا متـاع=يا كـمّ نفـسٍ روّحـت مـا حقّقـت مطلوبهـا
يا منخدع في ضحكة الدنيا ترى الضحكة خـداع=لا تأمن الدنيا ولو تضحـك لـك مْـع جنوبهـا
إن ما تغانمت المراجل قبـل ساعـات الـوداع=بَعَد وفاتك ماهي بصوبـك ولا انـت بصوبهـا
والمرجلة ماهيـب سلعـة تنشـرى والاّ تبـاع=كم ناسٍ يقومون ويطيحـون مـا فرْحـوا بهـا
اللي مولّع بالضياع يـروح لـدروب الضيـاع=واللـي مولّـع بالمراجـل مـا يغـرّ دروبهـا
والغيب ما يُعلم لكـنّ العقـل سِيـد الإختـراع=ليا اشتغل عقلك عرفت الناس وش فـ"قلوبهـا"
وإن كان ما انته مستفيد من الدّماغ الاّ الصّداع=ما غير حـظ الصّيدليّـة مـا تبـور حبوبهـا
لا صرت ما تتعب على ( والنِّعم ) قدر المستطاع=صدّت ولفّت لك ظهَرهـا واعْطَتِـك عرقوبهـا
وليا تملّكْت الكـرم والحكمـة وطـول الـذراع=لا تشغلك نفسـك تـراك اعطيتهـا ماجوبهـا
والواحد اللي لا كريـم ولا حكيـم ولا شجـاع=مفروض يعطي ثوبه الحرمـة ويلبـس ثوبهـا

الشاعر/ وصل العطياني