ماعاد لي واهس اتابع للاخبار

[الطائر المهاجر]

ماعاد لي واهس اتابع للاخبار= ولا عاد لي شفٍ بكذب السياسه
دام العرب في وقتنا مالهم كار= جدار قصير واهي دوم ساسه
يطمره فرس اويهود لهم ثار= او طامع مايكتفي بملي كاسه
والمشكله عرباننا لو هم كثار = البعض منهم صايرٍ كالبساسه
اللي قوي يفرس ضعيفٍ ولو جار=واللي ضعيفٍ خوف يحني لراسه
يتبع قوي بذلةٍ لاجل دينار = والاّ يتسلق في نفاق وخساسه
واللي صريح وصادق بكل الاسرار= تاكله ارضه لا وصلها دساسه
وحتى يعيش بلا مخافه ولا اضرار= يبلع لسانه او يعطل حواسه
اصقه وابكم ماله عيون وانظار= ويبعد عن اهل الهرج واهل البلاسه
ودامه بأمن فلا تشتته الافكار= يقنع بوضعه بالعقل والكياسه
وينظر لمن حوله من ديار وامصار= الناس فيها عايشين بتعاسه
حب الوطن ايمان ما فيه نحتار= لو جار وقتك يستحق القداسه
وطاعة ولي الامر من طبع الاخيار=ومن قال غيره ما صحى من عماسه
وحدة وطن ماترتضي غدر غدار= وتردع عدو جاهلٍ في قياسه
ومن باع داره للعدا لاجل دولار=هذاك خاين يندعس فوق راسه
ماعاد به بالكون عدلٍ ولا صار= ماغيرظلم وكبت باسم السياسه
حتى ببلاد تدعي العدل باصرار= كلها شعاراتٍ ومكر ودلاسه
فالرجل الابيض حاكم كل الاقطار=وصهيون خلفه توجهه في نجاسه
مستعمرين الكون في خبث واجبار= ومن لاخدمهم فصخته كالمداسه
مستخدمين اذناب ثيران وابقار=تثير فتنه لاجل بعض الطفاسه
اوراق ترفع ثم تحرق بلا نار= ومن لبّسه لابد يفصخ لباسه
الارض تبقى والخلايق بالادبار= ومن ضحك له وقته يجي بانتكاسه
فالعاقل اللي تاركٍ طيب الاذكار=العدل منهاجه ونبتة غراسه

[الطامي]

كلام سليم
صح السانك
ولاهنت

[منيع]

جزل ومبدع يادكتور وابيات تحتوي الكثير من مايدور ويجول في خواطرنا
لاهنت
تحياتي لكم

[داعي الشوق]

صح لسانك وفكرك
جزاله بكل معانيها

قصيده حكيمه وشاعر حكيم
ابدعت وعوايدك ياعود

.. ( ومن ضحك له وقته يجي بانتكاسـه

صح لسانك ولاهنت

[بنت النور]

صح لسانك وعتلى شانك
لاهنت
ابيات في مكانها ومحلها
ابدعت واتقنت
دمت بود

[عبدالله الشويمان]

حــب الـوطـن ايـمـان مــا فـيـه نحـتـار
لـــو جـــار وقـتــك يسـتـحـق الـقـداسـه
وطاعة ولي الامر مـن طبـع الاخيـار
ومن قال غيره ما صحى من عماسه
وحــدة وطــن ماترتـضـي غــدر غــدار
وتـــردع عــــدو جــاهــلٍ فــــي قـيـاســه
ومـــن بـــاع داره لـلـعــدا لاجــــل دولار
هــذاك خـايـن يـنـدعـس فـــوق راســـه


صح لسانك يا أبو عبدالله

قصيدة جزله وانت جزل كالعاده.

لا هنت لا هنت

[الطائر المهاجر]

شكرا الطامي
على كريم المتابعه
لاهنت
اطيب التحيه

[الطائر المهاجر]

شكرا منيع
على كريم المتابعه
لاهنت
اطيب التحيه

[الطائر المهاجر]

شكرا داعي
على كريم المتابعه
لاهنت
اطيب التحيه

[الطائر المهاجر]

شكرا بنت النور
على كريم المتابعه
لاهنتي
اطيب التحيه