العودة   منتديات الفطاحله > منتديات الأدب العربي/يمنع الفيديو > القصة والرواية والمقال

إضافة رد
 
أدوات الموضوع
قديم 28-03-2006, 10:51 AM   رقم المشاركة : 1
ذيب السنافي




معلومات إضافية
  النقاط :
  الحالة :

 

افتراضي قصة بلا عنوان:)الاجزاء كاملة


أشرقت الشمس على مدينة الرياض وكانت شوارعها شبه خاليه حيث كان اليوم يوم الخميس صباحاً الساعه 8والكل تقريباً نائم

===========
كانت خيوط الشمس الذهبيه تلامس الأطراف العليا لذلك البيت الصغير في حي الشفاء ومنظر خارجي يوحي بالسكينه والهجوع ....

لكن تخيل ندخل للباب الخارجي ولين ذيك المرأة التي تكاد تنهي العقد الخامس من العمر جالسة على الحديدة توازن النار تحت الحديدة علشان بتصلح المريصعات لزوجها وعيالها واسمها ام صالحوهي من النساء الي طبيعتهن هاديه تنادي بنتها( لننتقل للحوار مباشرة):

أم صالح : نورة نورة تعالي يايمه وجيبي معك العجين ولا تنصين تجيبين معك سكين ,,

نورة : لبيه يايمه هذا انا جايه

شوي ينفتح الباب ولين ذيك الغزيل وش حليلها عمرها 20 سنه ولابسه جلابيه حلوة وعامله شعرها قرن طووووويل ويوصل لنهاية ظهرها وعيونها وساع وعليها ذرعان سخاف من سخف ذرعانها تتعجب كيف شالت قدر العجين بدون ماتنكسر ذرعانها وعليها ذاك الساق المبروم الي كنه عصى خيزران

نورة : هذا العجين يا أحلى أم بالدنيا وهذي السكين تبين شيء ثاني يايمه ,,

أم صالح : اجلسي معي ياحبيبتي خليتس تعلمين ماتحرقين المريصعات ,,,

نورة : أنا تعلمتها يايمه بس ودي أتعلم على الجريش لين الحين ما أعرف لها يايمه ,,

أم صالح : ماعليتس يابنيتي اليوم لين جت أختس فوزيه بخليها تعلمتس عليها

نورة : هي بتجي اليوم أهم شيء تجيب عبودي وحمودي عيالها ولا تخليهم عند عمانهم ولا والله لا أعض خشمها خخخخخخخخخخخخخ

أم صالح : عاد رجلها بهواها يابنيتي إذا قال زوجها لا,,مافي يدها شيء وانا أمك ,,

نورة : يا الله بعض الرجاجيل يايمه مدري وشلون طبايعه حسبي عليه
=====================
خلصوا الفطور ويوم دخلوا لين أبو صالح جالسن عند التلفزيون يتفرج على المملكة هذا الصباح
====================
حطو الفطور عنده وحطوا صحين صغير فيه عسل أصلي جايبه الأب من واحد ثقه يجيبه من الجنوب عسل صدر وجابت نورة بريق الحليب والشاهي والكيسان والبيالات وحطتها
===================
أبو صالح : بعدي والله ببنيتي جعلي أشوف عيالتس

نورة : (استحت وحمرة خدودها ونزلت رويسها ) أها يبه وش قاعد تفرج عليه

أبو صالح : تصرفين ياطخمة الفرس

نورة : يووووووه يابوي خلاص عاد

أبو صالح : وين صويلح الله يصلحه

صالح : احتس يايبه في الحصان وولم العنان

أبو صالح : أي حصان أنت ياله بغل ويخب عليك

صالح : أفا يبه ماهيب هي

أبو صالح : يالخاسي أقومك لصلاة الفجر وتدخل الدورة وتتساهاني لين أروح وتعود تنوم ماتخاف من ربك

صالح : والله يايبه مدري غصب عني يعني أنا زي السكران ماني في وعيي ومرفوع عني القلم

أبو صالح : مرفوع عنك القلم يمال والله اللي الي يتلوى على جنوبك

صالح : يسلمك ربي يبه الله يخليك لنا فوق روسنا

أبوصالح : غصبن عليك يالهثوي خخخخخخخخخخخخخخ

صالح : غصبن علي ولا تزعل ياحلو أنت

أبو صالح : أفطر وخل عنك السوالف
============================== =======

العصر جت فوزيه عند اهلها وهم عند الباب الي فتح لهم نورة وكانت لابسه ذيك التنورة البيضاء وعليها بلوزة ورديه وفالة شعرها ماشاء الله
========================
فوزيه : السلام عليكم

نورة : وعليكم السلام ياقلبيه حمودي امووووووووووووووووووووووواه ياقلبيه أشوى أنك جبتيهم ولا كنت متحلفه فيك هلا خالو عبووووووودي أموووووووووواه يحبي لكم ياحلوين

فوزيه : مالت عليك يعني أنا مالي قيمه ألا بهم

نورة : بصراحه أيه

فوزيه : طيب أوريتس

فوزية : هلايمه (حبت راس أمها ) وشلونتس عساتس طيبه يمه وشلون أخواني وخواتي؟؟

أم صالح : ابشرتس الحمد الله شلون رجلتس وخالتس أم محمد

فوزيه خالتي ماعليها تسلم عليتس ومروحه معي كسوة لتس هديه وأما رجلي جعلها الفاقوش مبهذلني هالأيام ماغير أنتبهي لعيالتس أنتبهي لعيالتس ومدري وش أصالي عياله ولا بيته ولا اغسل ولا وش أسوي ماغير يامر وينهى ويضيق علي وبس ولا معونه أبطي عظم يعاوني

أم صالح : ماعليه يابنيتي هو جنتس وهو نارتس تصبري لين الله يفرجها

============================== =================

ذاك اليوم سيروا على الجيران عندهم عزيمه وراح الكل ولا بقى أحد في البيت ألا نورة وعيال اختها
============================== =================
(عزيمة الجيران)
جلست أم صالح جنب أم شليويح وفوزيه جنب أم السلمي وكان مقابلهم أم جارتهم المصريه أم زينات والسوريه أم هاني

أم شليويح : (وكانت ذرعانها مليئة بالذهب وكأنها محل مجوهرات متنقل وتفخة كأنها بالون وفي خشمها زميم محلي الظاهر أنه صفر) قالت : أبك الرجاجيل ذولا نتزين لهم ونتحلى وأبك ولا واحد معهم يقنيه المعروف والله ثم والله مايجيبهم ألا العين الحمراء الكلاب ذولا

أم السلمي : عني أنا مايقدر زوجي يفر يحبن مووووت ولا مني زينت له الكليجا راح بخرايطه وبعدين صحيح أنا رفلا بالبيت بس معوضته من نواحي أخرى أخلي أذانه يصفرن وحاطتن عليه قفول

أم زينات المصريه : الله الرقاله دول ولاد كلب لما تديهم بالجزمه يحبوك ولما بتخلي ليهم فرصه بياكلوك بس بصوا ياقماعه أدو ليهم فلوس بيجو لحد رجليلكو

أم هاني : شوبكن مش متفاءلات أنا جوزي عم بيأكلني كل يوم علقة ومابشتكي جوزي وهو حر والوحده منا لازم تصبر على جوزا,,, وبعدين شبكي يا أم صالح ماعم بتحكي أنتي وفوزيه بنتك

أم صالح : وش احتسي فيه يمال الفاقوش كلكن ماغير قاعدات تبهذلن رجالكم ولا قاعدين هم يبهذلونكم وأنا الحمدالله أبوصالح ماخلى علي قصيرة جعله ذخر لي ولعيالي وفوزيه لا تعاينونها رايه من رايي وماراح تقول شيء مالت عليكم حريم
============================== ==========
طلعت أم صالح وبنتها فوزية رايحات البيت
============================== =========
تلفون البيت يرن في بيت ابو صالح رن رن رن

ردت نورة : نعم (بنفخة رجاليه )

محمد : (صديق أخوها صالح ) صالح موجود

نورة : (عرفت صوته وهي معجبه فيه من سوالف صالح عنه ) لا والله مو موجود من أقوله ؟؟

محمد : قولي له محمد الله لا يهينك

نورة : أبشر
(طخ .....صفقت السماعه بوجهه)
=========================
وصلت أم صالح وفوزيه للبيت
=========================
أم صالح : النوري يالنوري

نورة : نعم يا ماما

أم صالح : وين ابوتس واخوتس

نورة : مابعد جو يايمه

أم صالح :جيبي لي مويه وأنا أمك والله أني ظميانه

فوزيه : نورة ماصاحوا عيالي

نورة : لا بالعكس ياختي مبسوطين ومستانسين مع خالتهم ومالقاها ألا هم

========================
دخل صالح البيت ويا أبوه
========================
أم صالح : وينكم رايحين ياصالح ( والأبو كان صاد في المطبخ يشرب ماء)

صالح : رحنا نخطب لأبوي

أم صالح : وشو لا عاد وأنا امك صدق وين كنتم فيه

صالح : بكيفك أنا قلت لك وقد أعذر من أنذر

أبو صالح : وش فيكم خير ان شاء الله وشو الي صدق ومدري أيش ؟؟

أم صالح : ( تبكي ) هذي آخرة العشرة يابوصالح تخطب تبي تعرس علي

أبو صالح : (عرف السالفه ومقالب صالح ويلتفت على صالح وفي وجهه ذيك النظرة ) يالي ماتستحي تعال أوريك شغلك (وفسخ العقال ) تعال يالهيس الاجرب

صالح : (طق منحاش ) وش اسوي يبه أمي تحبك وتصدق بسرعه

أبو صالح : (يمسح دميعات أم صالح بطرف غترته ) أفا يا أم صالح ونتي مصدقه بعرس عليتس بعد هالعمركله معتس أفا أموت ولا أعرس عليتس بسم الله عليتس خلاص يابعد شيبات شنبي خخخخخخخخ

أم صالح : خلاص أصلن ما صدقت بس خفت ولدك جايبه على أنها صدق
============================== ============================== ==============

تعبت من الكتابه أكمل لكم الحلقة الثانيه بكرة وبفكر لكم بأحداث مثيرة وجميله وعاطفية







توقيع ذيب السنافي
 
  رد مع اقتباس
قديم 28-03-2006, 04:57 PM   رقم المشاركة : 2
عهود




معلومات إضافية
  النقاط :
  الحالة :

 

افتراضي


خخخخخخخخخخخ

وقسم بالله اني بس اقراء وضحك
مره مره تضحك القصه


ذيب بأنتظار باقي القصه والقصه تدور حول نوره صح؟







توقيع عهود
 
  رد مع اقتباس
قديم 28-03-2006, 05:25 PM   رقم المشاركة : 3
ذيب السنافي




معلومات إضافية
  النقاط :
  الحالة :

 

افتراضي


حسب الي ودكم أنا لين الآن مافكرت في أحداث معينه بس لين جاء بكره وجيت أكتبها لفيتها حسب الإتجاه الي أنه يناسب خخخخخخخخخخخخخ







توقيع ذيب السنافي
 
  رد مع اقتباس
قديم 28-03-2006, 11:13 PM   رقم المشاركة : 4
الريم
وردة الفطاحله/عضو شرف
 الصورة الرمزية الريم







معلومات إضافية
  النقاط : 10
  الحالة :الريم غير متواجد حالياً

 

افتراضي


لووووووول

ياهوه يا ذيب من جد منتا سهل ابداان

تسللللم ويعطيك العافيه

ولا تطول علينا بالحلقه الثانيه







توقيع الريم
 
آخر تعديل الريم يوم 28-03-2006 في 11:17 PM.
  رد مع اقتباس
قديم 29-03-2006, 12:50 AM   رقم المشاركة : 5
الخنساء
عضو شرف
 الصورة الرمزية الخنساء





معلومات إضافية
  النقاط : 10
  الحالة :الخنساء غير متواجد حالياً

 

افتراضي


يعطيك العافيه ذيب قصه واقعيه
واحداثها مثيرةبانتظار النهايه
اسلوبك في سرد القصه سلس ومن
البيئه
سلمت وسلم فكرك
اجمل تحيه







توقيع الخنساء
 
  رد مع اقتباس
قديم 29-03-2006, 01:38 AM   رقم المشاركة : 6
احساس أنثى
الماسة الفطاحلة V.I.P
 الصورة الرمزية احساس أنثى







معلومات إضافية
  النقاط : 10
  الحالة :احساس أنثى غير متواجد حالياً

 

افتراضي


تسلم ياذيبنا

والله عندك مواهب متخفيه


بانتظار الجزء الثاني بس لاتطوله
طلبت لاتكون النهايه حزينه زي القصه ألي قبلها
ترى ضاق صدري وصدقت ألي قبل

ولا ترى بحذفها <<<<<يعننها مشرفه القسم

لاأمزززززززززززززززززززززح
كل شي يجي منك حلو

تحياتي ياحياتي







توقيع احساس أنثى
 
  رد مع اقتباس
قديم 29-03-2006, 09:28 AM   رقم المشاركة : 7
ذيب السنافي




معلومات إضافية
  النقاط :
  الحالة :

 

افتراضي


الريم

ماما الخنساء

احساس انثى

أضحك الله أسنانكم بكل مسرة

مدام أعجبتكم شيء حلوووووووو الحين بكتب الجزء الثاني بس مدري وش أكتب لكن بأبعد الحزن عنها لأني اليوم مبسوط
أشكركم على المرور







توقيع ذيب السنافي
 
  رد مع اقتباس
قديم 29-03-2006, 10:11 AM   رقم المشاركة : 8
ذيب السنافي




معلومات إضافية
  النقاط :
  الحالة :

 

Talking قصة بلا عنوان :) الجزء الثاني2


في بيت في حي ظهرة البديعه جنوب الرياض كان ذاك البيت من طراز حديث وصغير كان في نفس اليوم العصريه قبل المغرب بنصف ساعه
============================== ===
جالس أبو محمد ومرته ومعهم ولدهم محمد بامان الله يشربون شاهي عقب وجبة الغداء الثقيله الي صلحتها أخت محمد ناديه ,,, شوي وهو يسولفون ألا جتك المطفوقه ناديه على البيبان زاحفه وتطمر ذيك الطمرة من جوا البيت للحوش وأمها وأبوها وأخوها محمد يشوفونها وكانت ناديه حلوة وأمورة ونشميه بس مهبوله وفيها رجه وعليها ذاك الشعر المنسدل فوق متونها لين نصف ظهرها ورابطها في يديها عند المعصم قطع قماش مشجره وعليها ذاك الخصر الي كنه خاتم تعجب كيف شال باقي جسمها ولونها حنطي فاتح وعيون مكحوله وسيعه وساقين ماشاء الله كنها قزاز من صفائها
============================== ==
ناديه : هوا والله أني فرس الي طمرت ذا الطمرة كلها خخخخخخخخخخخخ

أم محمد : وجع يالعوبى قصري حسس لايسمعونتس الجيران مالت عليتس <<<(الأم لسانها متبري منها )

أبو محمد : خليها يا أم محمد تستانس وش عندها الضعيفة ضايقن صديرها حتى هالخبال حاسدتها عليه

أم محمد : يابو محمد بنتك ذي يبي لها أحد يشكمها مرجوجه

محمد : يايمه ترى البنات الي زي كذا لين تزوجت تغدي دجاجه خوفي من الي ساكته وهاديه وهي عزباء ترى هي الي تجيب الطعه

ناديه : لا والله أقول اسكت بس لا أفضحك <<<<<<<<(معلمها محمد الخبيل أن قليبه مع نورة )

محمد : وراتس عصبتي ياحبيبتي ياقمر يا أختي ترى أمزح أنا ولا أنتي أحلى وحده في العالم وراح تصيرين أطلق شنب وبيحمد ربها الي بياخذك أن الله عطاه مثلك

ناديه : أيه أحترم نفسك

أبو محمد : وشي فضيحته مسوي شيء هو علميني أخاف أنك تخبين على ذا الأثول ثم بكرة يجيب لنا مصيبه
ناديه : لا يبه أنت صدقت بس أبي أهبلبكم أنت وأمي

أم محمد : مالت عليتس يالعوبى يا المحليه يالمصديه ماتستحين على وجهتس

ناديه : يمه ليه أأأأأ مانيب أنا ماعاد أتحمل ذا العيشه يعني عشانه ولد تسخفين له وأنا تهاوشيني (تبكي)

أبو محمد : تعالي وأنا ابوتس بسم الله عليتس كلكم في الغلا سوا يابنيتي جعل والدينا في الجنه بس أمتس حريصتن عليتس وتبيتس تطلعين مرة ولا موب قصدها شيء

============================== ============================
شوي التلفون رن رن رن رن رن محمد قام يطالع الجوال ولين الأسم صويلح الدبشة يتصل بك
رد محمد على الجوال

محمد : ارحب

صالح : هلا والله وينك يا أم الهكي همانا متفقين تجي تقهوى عندي

محمد : يارجال وراك نسيت ترى اتفاقنا عقب المغرب ولا نسيت

صالح : والله أنا احسبه عقب العصر بس يالله خلاص عقب المغرب باضبط المشب وبشب الضو وبحتريك

محمد : خلاص يا أغلى صديق في العالم

صالح : خلاص أوكي

============================== ===========
صالح يهوجس : أغلى صديق؟؟؟!!!! وش قصته ذا قالب أخلاق معي لا هوب يتهزى بي زي أول ويحبني وينشد عني ؟؟؟!!!

محمد يهوجس : يالبيه ياصديقي ولا اقول يالبى النوري ولا عليك تبطي عظم أنت وشنبك المحلوق بس لأجل عين تكرم مدينه يالجحش أخ أخ يالنوري ياعمري يالنوري
============================== ============
جرس بيت صالح رررررررررررررررررررررررررررررر ررررررررررن <<< ( جرس القديم ذاك الأخضر حق المدارس )

صالح : طيب طيب من عند الباب

محمد : أفتح الباب يالرخمه أنا خويك

فتح الباب صالح

صالح : هلا ابو حميد

محمد : لا هلا ولا مرحبا أنت بنت تقول من ورى الباب مين أفتح الباب وواجه الرجال يالدجاجه

صالح : ياخوي الطبع يغلب التطبع

محمد يهوجس : اقول يسلم راس الي مصبرني عليك ياشيخ وأبوك أخ يابوك أنا أشهد أنه شنب موب أنت الظاهر أنك طالع على خالك زكريا مالت عليك أنت وهو

صالح : الي ماخذ عقلك يتهنى به تفضل وراك قاعد تهوجس

محمد : اي والله يتهنى به أخ يالن .. قصدي أهوجس في الحياة في الحياة

صالح : تفضل هنا جنب المركى استرح

محمد : هلابك والله وش اخبار الوالد والوالده و..و..و..و والبيت كله أن شاء مرتاحين؟؟

صالح : ابشرك الحمد الله ,, أسمع بروح أنا شوي وبجي أوكي

محمد : اوكي
============================== ===============
في هذا الوقت كانت نورة ترسم موديلات فساتين علشانها تبي تخيط لها فستان بس جالسة عند حوض النخله الي في بيتهم في آخر البيت من الجهه الثانيه ولا درت عن ذولا وخبرها دايم أن أخوها بعد المغرب جالس في ذاك المشب يتفرج على مباراة على شيء في التلفزيون وراحت تبي تدخل المشب في نفس اللحظه الي كان محمد مكوكي على الضو يقلبها ويصلح فيها ,, ودخلت نورة المشب
============================== ============
نورة : السلام عليكم <<<(وهي ساهيه تعاين في الرسمات )

محمد : (من غير شعور ولا انتبه ) وعليكم السلام والرحمه

نورة : (استغربت الصوت والتفتت) وقالت وش عندك ياصلوح ؟؟ وش قاعد تسوي ؟؟

محمد : ( توه انتبه للصوت الناعم ذا موب صوت خويه والتفت من الروعه بسرعه ) وقال هاه

نورة : يمه بسم الله

محمد : بسم الله

============================== ===============
وناحشت نورة وشقت الشعيب يم البيت وهي ماهيب في وعيها ,, والخبل محمد قعد فاتح ثمه ولا يدري وش يسوي وعرق وحالته حاله ومستحي ويقول في نفسه : والله الوهقه وش الي جابني عند ذا الدلخ مالت عليه والي توهقت الحين بتقول متعني ولا قصدي شيء أن لله وأنا إليه راجعون ,, بس خل عنك ياقلبيه كنت متوقعه أخلاق وحبيته على أخلاقه بس أثر الأخلاق معها جمال وعيون وكل شيء ياربيه وش ذا الزين عنك أنها على قولة ذاك يوم يقول حظيظ ربي عطى له يووووووه أنا ماعاد أصبر اليوم والله ماخلي ابوي ينوم مكلمه يجي يخطبها حسبي عليك ياصويلح الدبشه الي يشوف شكلك يقول وع أخذ من ذولا وأثر الجحش في الشارع والغزال في البيت وأثناء غرق محمد في الأفكار والهواجيس دخل صالح وهو
============================== =============

وبكره أكمل الباقي ولا يوم السبت تعبت من الكتابه وعندي شغل بخلصه







توقيع ذيب السنافي
 
  رد مع اقتباس
قديم 29-03-2006, 10:12 AM   رقم المشاركة : 9
فهدة الهياثم
وردة الفطاحلة





معلومات إضافية
  النقاط : 10
  الحالة :فهدة الهياثم غير متواجد حالياً

 

افتراضي


كل يوم تبهرني بشيء جديد من إبداعاتك المتميزه .............وإلى الأمام ياذيب السنافي... "إسم على مسمى"







توقيع فهدة الهياثم
 
  رد مع اقتباس
قديم 29-03-2006, 10:13 AM   رقم المشاركة : 10
ذيب السنافي




معلومات إضافية
  النقاط :
  الحالة :

 

افتراضي


حياك الله أخي رماد إنسان يخليك ربي

ومشكور على ردك وتعقيبك







توقيع ذيب السنافي
 
  رد مع اقتباس
إضافة رد

مواقع النشر (المفضلة)


الذين يشاهدون محتوى الموضوع الآن : 1 ( الأعضاء 0 والزوار 1)
 
أدوات الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع


الساعة الآن 07:31 PM.


Powered by vBulletin® Version 3.8.7
Copyright ©2000 - 2024, Jelsoft Enterprises Ltd.
جميع الحقوق محفوظة لمنتديات الفطاحلة